ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެންބަރު އަޙްމަދު ނިހާން ހުސައިން މަނިކުގެ މައްޗަށް އުފުލާފައިވާ ދައުވާގައި ޝަރީއަތުން ގޮތެއް ނިންމަންދެން އޭނާގެ ޕާސްޕޯޓް ހިފެހެއްޓުމަށް ކްރިނިނަލްކޯޓުން އަމުރުކޮށްފިއެވެ. އަޙްމަދު ނިހާން ހުސައިން މަނިކު ދައުވާ އުފުލާފައިވަނީ އެމްއެމްޕީއާރުސީގެ ޚިޔާނާތާއި ގުޅޭ މައްސަލަތަކެއްގައެވެ.
ޕީޕީއެމްގެ ޕާލިމެންޓަރީ ގްރޫޕްގެ ލީޑަރ އަދި މަޖިލީހުގެ މެޖޯރިޓީ ލީޑަރުކަން ކުރެއްވި އަޙްމަދު ނިހާން ހުސައިން މަނިކުގެ މައްޗަށް ދައުލަތުން ވަނީ 6 ދައުވާއެއް އުފުލާފައެވެ. ނިހާންގެ މައްޗަށް އުފުލާފައިވާނީ ރިޝްވަތު ހިފުމުގެ ކުށުގެ 3 ދައުވާއަކާއި ރިޝްވަތު ލިބި ގަތުމަށް އެެދުމުގެ ކުށުގެ 2 ދައުވާއަކާއި މަނީލޯންޑަރިންގެ ކުށުގެ ދައުވާއެކެވެ.
މި މައްސަލަތަކުގެ އަޑުއެހުންތައް ފެށުމުން ވަކީލަކު އައްޔަންކުރުމަށް 15ދުވަހުގެ މުއްދަތެއް ދިނުމަށް ނިހާންވަނީ އެދިވަޑައިގެންފައެވެ. އެހެންނަމަވެސް މައްސަލަ ބައްލަވާ ގާޒީ ވިދާޅުވީ ގަވައިދުގައި އޮތީ 10 ދުވަސްކަމުން ފުރަތަމަ 10 ދުވަސް ކަނޑައަޅާކަމަށާއި އެ މުއްދަތަށް ބެލުމަށްފަހު ގަބޫލުކުރެވޭ ސަބަބުތަކެއް އޮތް ނަމަ އިތުރު ގޮތެއް ނިންމަވާނެކަމަށެވެ.
މިއަދުގެ އަޑުއެހުމުގައި ދައުލަތުގެ ފަރާތުން ވަނީ ނިހާންގެ ޕާސްޕޯޓް ހިފަހައްޓާފައި އޮތް އޮތުން ދަމަހައްޓާ ދިނުމަށް އެދިފައެވެ. މިކަމާއި ގުޅިގެން ޖަވާބުދާރީވަމުން ނިހާން ވިދާޅުވީ މިދިޔަ އަހަރުން ފެށިގެން ރާއްޖޭގެ އެއްވެސް ހިސާބަކަަށްވެސް ނުވަތަ ރާއްޖެއިން ބޭރަށްވެސް ދިއުމުގެ ވިސްނުމެއް ނެތްކަމަށެވެ. އަދި ބޭހަށްވެސް ރާއްޖެއިން ބޭރަށް ދާން ނޭދޭނެކަމަށާއި ޕީޖީ އޮފީހުން ބޭނުންވާ މުއްދަތަކަށް ބޭނުންވާތާކު ޕާސްޕޯޓް ބޭއްވުމުގެ އެއްވެސް އިއުތިރާޒެއް ނެތްކަމަށްވެސް ނިހާން ވަނީ ވިދާޅުވެފައެވެ.
މި ވާހަކަތަކަށް ފަހު މައްސަލަ ބައްލަވާ ގާޒީ ވިދާޅުވީ މައްސަލައިގެ އަޑުއެހުންތައް ފެށިފައިވުމާއި މައްސަލަ އަވަހަށް ނިންމަން ބޭނުންވާތީ ޝަރީއަތުން ވަކިގޮތެއް ކަނޑައަޅަންދެން ނިހާންގެ ޕާސްޕޯޓް ހިފެހެއްޓުމަށް ކަނޑައަޅާކަމަށެވެ.
އެމްއެމްޕީއާރުސީގެ ހިޔާނަތާއި ގުޅިގެން އެސެޓް ރިކަވަރީ ކޮމިޝަނުން ކުރިޔަށް ގެންދިޔަ ތަހުޤީގަށް ނީހާނާއި އެނާގެ އައިލީ ބައެއް މެމްބަރުންވެސް ހާޒިރުކޮށް ސުވާލުކޮށްފައިވެއެވެ.
ނިހާންގެ މައްޗަށް ދައުވާ އުފުލާފައިވާ މައްސަލަތަކުގެ ތެރޭގައި ހިމެނޭ އެއް ދަޢުވާގައިވަނީ 2014ވަނަ އަހަރު ޕީޖީއަކު ޢައްޔަން ކުރުމަށާއި މަޖިލީހުން ޖޭއެސްސީއަށް އައްޔަންކުރާ މެންބަރު ހޮވުމަށް މަޖިލީހުގައި ނެގި ވޯޓާ ގުޅިގެން، ރިޝްވަތުގެ ގޮތުގައި ރޮލެކްސް (ސަބްމެރީނާ) ބްރޭންޑްގެ ގަޑިއެއް ދިނުމަށް އޭރުގެ ޓޫރިޒަމް މިނިސްޓަރ އަޙްމަދު އަދީބު އަރިހު އެދުމުން، މ.ވިލާދަށުގެ މުޙައްމަދު މަނިކު މެދުވެރިކޮށް އަޙްމަދު އަދީބު ދެއްވި ރޮލެކްސް ބްރޭންޑްގެ ގަޑި ނިހާން ބަލައިގަނެފައިވާކަމަށެވެ.
ޕީޖީ އޮފީހުން ވިދާޅުވީ އަޙްމަދު ނިހާން ޙުސައިން މަނިކު ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރުކަމުގައި އަދި މާލިއްޔަތު ކޮމެޓީގެ މުޤައްރިރުގެ މަޤާމުގައި ހުރިއިރު، ކުރީގެ ނާއިބު ރައީސް އަޙްމަދު އަދީބު ދެއްވި ރިޝްވަތުގެ ފައިސާ ހިފާ، އެ ފައިސާ ބޭނުންކޮށްފައިވާކަން ތަޙުޤީޤަށް އެނގޭކަމަށެވެ. އަދި ނިހާނަށް ލިބިފައިވާ މިފަދަ އެއްވެސް ފައިސާއެއް ލިބުނުކަން އޭނާ 2014 އިން ފެށިގެން 2019 އާއި ދެމެދު ހުށަހަޅާފައިވާ މާލީ ބަޔާންތަކުގައި ހިމަނާފައިނުވާކަމަށްވެސް ޕީޖީ އޮފީހުން ވަނީ ވިދާޅުވެއެވެ.
ކުރީގެ ރައީސް ޔާމީނާއި ކުރީގެ ނާއިބުރައީސް އަޙްމަދު އަދީބާ ވަރަށް އަރިސްކޮށް އުޅުއްވި ނިހާނަކީ ރައީސް ޔާމީންގެ ވެރިކަން ބަދަލުވުމާއި ހަމައަށްވެސް ޕީޕީއެމްގެ މެމްބަރެކެވެ. އަދި ޕީޕީއެމްގެ ޕާލަމެންޓްރީ ގްރޫޕުގެ ލީޑަރުގެ ޙައިސިއްޔަތުން ރައްޔިތުންގެ މަޖިލީހުގެ މެޖޯރިޓީ ލީޑަރުވެސް މެއެވެ. އެހެންނަމަވެސް ވެރިކަން ބަދަލުވުމާއެކު އޭނާވަނީ މިހާރުގެ ސަރުކާރު ހިންގާ ކޯލިޝަންގައި ހިމެނޭ ޖުމްހޫރީ ޕާޓީއާ ގުޅިވަޑައިގެންފައެވެ.