އެމެރިކާއިން އދގެ އިންސާނީ ހައްޤުތަކާއި ބެހޭ ކައުންސިލަށް އަލުން ގުޅުމަށް ނިންމައިފިއެވެ. މީގެ ތިން އަހަރު ކުރިން އެމެރިކާގެ ކުރީގެ ރައީސް ޑޮނަލްޑް ޓްރަންޕުގެ ވެރިކަމުގައި އެ ޤައުމުންވަނީ އދގެ އިންސާނީ ހައްޤުތަކާއި ބެހޭ ކައުންސިލުން ވަކިވެފައެވެ.
އެމެރިކާއިން އެ ކައުންސިލުން ވަކިވީ އިސްރާއީލާއި ދެކޮޅަށް އެ ކައުންސިލުން ތަފާތުކުރާކަމުގެ ތުހުމަތުކޮށް، އެއްވެސް ހެޔޮ ބަދަލެއް އެ ކައުންސިލުން ނުގެންނަކަމަށް ބުނެއެވެ. އެ ކައުންސިލުން އެމެރިކާއިން ވަކިވުމަށް ނިންމި ނިންމުމާއި ޓްރަންޕުގެ " އެމެރިކާ ފަސްޓު " ސިޔާސަތާއި އޮތީ ވަރަށް ބޮޑަށް ގުޅިފައެވެ.
އެމެރިކާގެ ސްޓޭޓް ޑިޕާޓްމަންޓުގެ ރަސްމީ ފަރާތަކުން ވިދާޅުވީ ފެބްރުއަރީ މަހުގެ 8ވަނަ ދުވަހުގައި އެމެރިކާއިން އދގެ އިންސާނީ ހައްޤުތަކާއި ގުޅޭ ކައުންސިލަށް އޮބްޒާވަރެއްގެ ގޮތުގައި އެމެރިކާއިން އަލުން ގުޅުމަށް ނިންމާފައިވާ ނިންމުން އެ ޤައުމުގެ ސެކެޓްރީ އޮފް ސްޓޭޓް، އެންތޮނީ ބްލިންކެން އިޢުލާނުކުރައްވާނެކަމަށެވެ.
ސަރުކާރުގެ ފަރާތުން ވާހަކަދެއްކެވި އޮފިޝަން ވިދާޅުވީ ކައުންސިލަށް ހެޔޮ ބަދަލު ގެނައުމަށް އެންމެ އެދެވޭ މަސައްކަތްތައް ކުރެވޭނީ އެ ކައުންސިލްގެ މަސައްކަތްތަކުގައި ހަރުދަނާ އުސޫލުތަކުގެ މަތިން ބައިވެރިވެގެންކަމަށް އެމެރިކާއިން ޤަބޫލުކުރާކަމަށެވެ. އަދި އެ ކައުންސިލަކީ ހުދުމުހުތާރުކަމާއި އަނިޔާވެރިކަމާއި ދެކޮޅަށް ދުނިޔޭގެ ހުރިހާ ސަރަޙައްދުތަކުގައި މަސައްކަތްކުރަމުންދާ ފަރާތްކަމަށް މުހިންމު ފޯރަމެއްކަމަށް އެމެރިކާއިން ޤަބޫލުކުރާކަމަށެވެ. އެ ކައުންސިލަށް ގެންނަންޖެހޭ އެދެވޭ ބަދަލުތައް ގެނެސް، އެންމެ އުސް ފަންތިއާއި ހަމައަށް އެ ކައުންސިލް ގެންދިޔުމަށް މަސައްކަތްކުރުންކަމަށް އޭނާ ވިދާޅުވިއެވެ.
47 މެންބަރުން ހިމެނޭ އދގެ އިންސާނީ ހައްޤުތަކާއި ގުޅޭ ކައުންސިލްގެ އައު ދައުރު ފެށުމަށް ހަމަޖެހިފައިވަނ މި މަހުގެ ފަހު ކޮޅުގައި ސްވިޒަލޭންޑުގެ ޖެނީވާގައެވެ. 193 މެންބަރުން ހިމެނޭ އދ.ގެ އާންމު މަޖިލީހަށް އައު މެންބަރުން މި އަހަރު ހޮވުމަށްވަނީ ހަމަޖެހިފައެވެ. އެ ކައުންސިލަށް ހޮވާ މެންބަރުންގެ ދައުރަކީ ތިން އަހަރެވެ. އަދި ޖެހިޖެހިގެން ދެ ދައުރަށްވުރެ އިތުރަށް އެއްވެސް ޤައުމަކަށް ކައުންސިލްގެ މެންބަރުކަމެއް ނުކުރެވޭނެއެވެ. އެ ކައުންސިލަށް މެންބަރުން ހޮވަނީ ޖޯގުރަފީގެ ގޮތުން ޤައުމުތައް އޮންނަ ސަރަޙައްދުތަކަށް ބަހާލައިގެން އާންމު މަޖިލީހުގައި ނަގާ ސިއްރު ވޯޓަކުންނެވެ.