މީގެ ހަތަރު އަހަރު ކުރިން މިޞްރުގައި ހައްޔަރުކުރި އަލްޖަޒީރާގެ ނޫސްވެރިޔާ، މަޙްމޫދު ހުސައިން ޖަލުން ދޫކޮށްލައިފިއެވެ.
ހުސައިން ޖަލުން ދޫކޮށްލާފައި މިވަނީ އެނާ ބަންދުގައި ހުންނަތާ ހަތަރު އަހަރު ފަހުންނެވެ. އެހެންނަމަވެސް އެނާ މިނިވަންކުރި ސަބަބާއި ގުޅޭ އެއްވެސް ވާހަކައެއް މިހާތަނަށް މިޞްރުގެ ރަސްމީ އެއްވެސް އިދާރާއަކުން ހާމައެއް ނުކުރައެވެ. ނަމަވެސް އޭނާ ދޫކޮށްލާފައި މިވަނީ މިޞްރާއި ޤަތަރާއިމެދު އަލުން ޚާރިޖީ ގުޅުން ޤާއިމްކުރިތާ އެއްމަސް ދުވަސް ފަހުންނެވެ.
ހުސައިންއަކީ ޢަރަބި ބަހުން ޚަބަރު ގެނެސްދޭ ނޫސް އިދާރާތަކުގައި ގިނަ އަހަރުތަކެއް ވަންދެން މަސައްކަތްކޮށްފައިވާ ތަޖުރިބާކާރު ނޫސްވެރިޔެކެވެ. ނުވަ ކުދިންގެ ބައްޕައެއްކަމުގައިވާ ހުސައިން އަލްޖަޒީރާގެ ޢަރަބި ގޮތްޕީގައި ފްރީލޭންސްކޮށް ގިނަ އަހަރުތަކެއް ވަންދެން މަސައްކަތްކޮށްދިނުމަށްފަހު ރަސްމީކޮށް އެ ނޫސްއިދާރާ އާއި ގުޅުނީ 2010ވަނަ އަހަރުގެ ތެރޭގައެވެ. އޭނާ ފުރަތަމަ މަސައްކަތްކުރީ މިޞްރުގެ ކައިރޯގައި ނަމަވެސް ފަހުންވަނީ ޤަތަރުގެ ދައުހާއަށް މަސައްކަތް ބަދަލުކޮށްފައެވެ.
2016ވަނަ އަހަރުގެ ޑިސެމްބަރު މަހުގެ 23ވަނަ ދުވަހު މިޞްރުން ހުސައިން ޙައްޔަރުކުރީ އޭނާގެ ޢާއިލާއަށް ޒިޔާރަތްކުރުމަށް އެނބުރި ޤައުމަށް އައި ދަނޑިވަޅެއްގައެވެ. އެފަހަރު ޤަނޫނީ ވަކީލެއްގެ އެެހީތެރިކަން ނުދީ 15 ގަޑިއިރަށްވުރެ ގިނަ އިރު އޭނާއާއިވަނީ ސުވާލުކޮށްފައެވެ. އެއަށްފަހު އޭނާ ދޫކޮށްލުމަށްފަހު އޭގެ ދުވަސްކޮޅެއް ފަހުން އަނެއްކާވެސްވަނީ އޭނާ ޙައްޔަރުކޮށްފައެވެ.
މިޞްރުގެ ދާޚިލީ ވުޒާރާއިން ބުނީ ހުސެއިން އަކީ ދޮގު ޚަބަރު ފެތުރުމުގައި ޙަރަކާތްތެރިވާ މީހެއްކަމަށާއި މިޞްރުގެ އަގު ވެއްޓޭފަދަ ޚަބަރުތައް ލިޔުމަށް ބޭރު ޤައުމުތަކުން އޭނާއަށް ފައިސާދޭކަމަށެވެ. ނަމަވެސް އޭނާއާއި ދެކޮޅަށް ރަސްމީކޮށް އެއްވެސް ދަޢުވާއެއް އުފުލާފައެއް ނުވެއެވެ. އޭނާ ޙައްޔަރުކުރުމުން އަލްޖަޒީރާއިންވަނީ ހުސެއިން ދޫކޮށްލުމަށް ގޮވާލާ ބައިނަލްއަޤްވާމީ މީޑިޔާ ކެމްޕެއިނެއް ފަށައިފައެވެ. އެހެންނަނަމަވެސް މިޞްރުގެ ސަރުކާރުން މި ވާހަކަތަކަށް އެއްވެސް ވަރަކަށް ބެލުމެތްނެތި ވަނީ އެ ޤައުމުތަކުގެ ޤާނޫނުތަކާއި ބައިނަލްއަޤްވާމީ ޤަނޫނުތަކާއި ޚިލާފަށް ހުސެއިންގެ ބަންދުގެ މުއްދަތު އެތައް ފަހަރެއްގެ މަތިން އިތުރުކޮށްފައެވެ.
ހުސައިން ޖަލުގައި ހޭދަކުރި ހަތަރު އަހަރުގެ ތެރޭގައި އޭނާއަށް ނަފްސާނީ އަދި ޖިސްމާނީ ގިނަ އަނިޔާތަކެއް ދީފައިވާކަމަށް އެނާގެ އައިލާއިން ބުނެއެވެ. އެކަހެރިކޮށްފައި ގިނަ ދުވަސްތަކެއް އޭނާ ބެހެއްޓުމުގެ އިތުރުން، 2017ވަނަ އަހަރުގެ ތެރޭގައި އޭނާގެ އަތް ބިންދުމުން އެކަށީގެންވާ ޞިއްޙީ ފަރުވާވެސް ދީފައެއް ނުވެއެވެ. 2018ވަނަ އަހަރުގެ ޖަނަވަރީ މަހުގެ ތެރޭގައި ޔުނައިޓެޑް ނޭޝަންސް ވޯކިންގ ގުރޫޕު އޮން އާބިޓްރަރީ ޑިޓެންޝަނުންވަނީ ހުސައިން ހައްޔަރުކޮށް ބަހައްޓާފައިވަނީ އިންސާނިއްޔަތާއި ހިލާފު އަނިޔާވެރި އަދި ކަރާމާތް ގެއްލޭފަދަ މާހައުލެއްގައިކަމަށް ނިންމާފައެވެ.
2019ވަނަ އަހަރުގެ މެއި މަހުގައި ހުސައިންވަނީ ކައިރޯގެ ތޯރާ ޖަލުން ގީޒާގައި ހުންނަ ހޯލްޑިން ސެލްއަކަށް ބަދަލުކޮށްފައެވެ. އޭނާ އެތަނަށް ބަދަލުކޮށްފައިވަނީ އޭނާ ދޫކޮށްލުމަށް ތައްޔާރުވުމުގައި އެޅި ރައްކާތެރިކަމުގެ ފިޔަވަޅެއްގެ ގޮތުގައެވެ. ނަމަވެސް އެންމެ ފަހުގެ ހުއްދަތައް ލިބެންދެން ހުސައިން އެ ހޯލްޑިން ސެލްގައި ބަހައްޓާފައި ހުއްޓާ އޭނާވަނީ ކުއްލިއަކަށް ޕްރޮސެކިއުޓަރެއްގެ އޮފީހަށް ބަދަލުކޮށްފައެވެ.
އޭގެ ފަހުން އޭނާ އަނެއްކާވެސް އަނބުރާ ޖަލަށް ގެންދިޔައެވެ. ހުސެއިން ދޫކޮށްލުމަށް ނިންމުމަށްފަހު އެ ނިންމުން ކުއްލިއަކަށް އަލުން ބަދަލުކުރި ސަބަބެއް މިޞްރުގެ އިދާރާތަކުން ހާމަކޮށްފައެއް ނުވެއެވެ. އެއަށްފަހު އޭނާއާއި ގުޅުންހުރި އައު ތަހުގީގެއް ފަށާފައިވާކަމަށް އިދާރާތަކުން އޭރުވަނީ އިޢުލާނުކޮށްފައެވެ.