މިޔަންމާގެ ޑިމޮކްރަޓިކް ލީޑަރު އާންގ ސަންގ ސޫ ޗީ ހއްޔަރުކޮށް ސަރުކާރާއި ދެކޮޅަށް އެ ޤައުމުގެ އަސްކަރިއްޔާއިން ބަޣާވާތްކުރުމުން އެކަމާއި ދެކޮޅަށް އަޑުއުފުލާ، އެ ޤައުމުގެ 70އަށްވުރެ ގިނަ ހަސްފަތާލާއި މެޑިކަލް ޑިޕާޓްމަންޓުތަކުގައި މަސައްކަތްކުރާ މުވައްޒަފުން މަސައްކަތް ހުއްޓާލައިފިއެވެ.
މިޔަންމާގައި މިހާތަނަށް 140،664 މީހުންނަށް ކޯވިޑް-19 ޖެހި 3،146 މީހުންވަނީ މަރުވެފައެވެ. އެ ޤައުމަކީ ދެކުނު އޭޝިޔާގެ ޤައުމުތަކުގެ ތެރެއިން އެންމެ ގިނަ ޢަދަދެއްގެ މީހުން މަރުވެފައިވާ ޤައުމެވެ.
އަލަށް ޤާއިމްކޮށްފައިވާ މިޔަންމާ ސިވިލް ޑިސްއޮބީޑިއަންސް މޫވްމަންޓުން ނެރުނު ބަޔާނެއްގައި ބުނީ ކޯވިޑް-19ގެ ސަބަބުން މިޔަންމާގެ އާބާދީގެ ބޮޑު ބައެއް ނާޒުކު ޙާލަތެއްގައި ވަނިކޮށް ޤައުމުގެ އަސްކަރިއްޔާއިން އަމިއްލަ މަސްލަހަތު އިސްކޮށްފައިވާކަމެށެވެ. އެހެންކަމުން މިޔަންމާގެ 30 އަވަށެއްގައި ޞިއްޙީ ދާއިރާގައި މަސައްކަތްކުރާ ފަރާތްތަކުން މަސައްކަތް ހުއްޓާލާފައިވާކަމަށް އެ މޫވްމަންޓުން ބުންޏެވެ. ޤާނޫނާއި ޚިލާފަށް ޤައުމުގެ ވެރިކަމާ ހަވާލުވެފައިވާ، އަދި ޙާލުގައި ޖެހިފައިވާ ބަލިމީހުންނަށް އެއްވެސް އަޅާލުމެއް ނުބަހައްޓާ އަސްކަރިއްޔާއަކުން ދޭ އެއްވެސް އަމުރަކަށް ކިޔަމަން ނުވާނެކަމަށްވެސް އެ މޫވްމަންޓުން ބުންޏެވެ.
މަސައްކަތް ހުއްޓާލާފައިވާ އުމުރުން 29 އަހަރުގެ ޑޮކްޓަރަކު ބުނީ ޞިއްޙީ ދާއިރާގެ މުވައްޒަފުން ބޭނުންވަނީ އަސްކަރިއްޔާއިން ކުރަމުންދާ ކަންކަން ހުއްޓައިލުމަށްކަމަށެވެ. ޑޮކްޓަރުން އަނބުރާ މަސައްކަތަށް ނުކުންނާނީ ކޮންއިރަކުން ކަމެއް ބުނަން ނޭނގޭކަމަށާއި، މަސައްކަތަށް ނުނިކުމެ ތިބޭ މުއްދަތު ބަރޯސާވަނީ އެވަގުތެއްގެ ޙާލަތުގެ މައްޗަށްކަމަށް އޭނާ ބުންޏެވެ.
މިޔަންމާގެ ދަރިވަރުންނާއި ޒުވާނުންގެ ޖަމުޢިއްޔާތަކުންވެސްވަނީ މި ޙަރަކާތުގައި ބައިވެރިވެފައެވެ.
ފެބުރުއަރީ މަހުގެ 1 ވަނަ ދުވަހުގެ ހެނދުނު ވަގުތެއްގައި މިޔަންމާގެ އަސްކަރިއްޔާއިން ވަނީ އާންގ ސަންގ ސޫ ޗީއާއި އޭނާގެ ނޭޝަނަލް ލީގު ފޮރ ޑިމޮކްރަސީ (އެންއެލްޑީ)ގެ ސަރުކާރަށް ނިސްބަތްވާ އިސް ގިނަ އޮފިޝަލުންތަކެއް ހައްޔަރުކޮށްފައެވެ. އެއަށްފަހު އަސްކަރިއްޔާއިން ވަނީ އެ ޤައުމުގައި އެއް އަހަރުގެ މުއްދަތަށް ކުއްލި ޙާލަތު އިޢުލާނުކޮށްފައެވެ. އަސްކަރިއްޔާއިން އެގޮތަށް ޢަމަލުކޮށްފައިވަނީ މިދިޔަ އަހަރުގެ ފަހު ކޮޅުގައި ބޭއްވި މިޔަންމާގެ އިންތިޚާބު އޮޅުވާލައިފައިވާކަމަށް ބުނެއެވެ.
އެމެރިކާއާއި ހުޅަނގުގެ ޤައުމުތަކުންވަނީ މިޔަންމާގައި ހިންގަމުންދާ ކަންތައްތައް ކުށްވެރިކޮށްފައެވެ. އަދި ހައްޔަރުގައި ހުރި ސޫ ޗީ ދޫކޮށްލުމަށް ބައިނަލްއަޤްވާމީ ދުނިޔެއިންދަނީ ގޮވައިލަމުންނެވެ. އެންއެލްޑީގެ އިސް ފަރާތަކުން ބުނީ ސޫ ޗީ ހުންނެވީ ގޭ ބަންދުގައިކަމަށާއި އެކަމަނާގެ ޙާލުކޮޅު ރަނގަޅުކަމަށް އެނގިފައިވާކަމަށެވެ. ބަޣާވާތާއި ދެކޮޅަށް އެ ޤައުމުގެ ގިނަ ޢަދަދެއްގެ ރައްޔިތުންދަނީ މުޒާހަރާކުރަމުންނެވެ.