ކޯވިޑް-19 ފެތުރޭ މިންވަރު ދަށްކުރުމަށް އެޅި ޚާއްސަ ފިޔަވަޅުތަކުގެ ދަށުން 20 ޤައުމަކުން ދަތުރުކުރާ މީހުންނަށް ސަޢުދީ ޢަރަބިއްޔާއަށް އެތެރެ ނުވެވޭގޮތަށް އެ ޤައުމުން ނިންމައިފިއެވެ.
ފެބްރުއައީ މަހުގެ 3ވަނަ ދުވަހުން ފެށިގެން ސަޢުދީ ޢަރަބިއްޔާއަށް ދަތުރުކުރުން މަނާކޮށްފައިވާ ޤައުމުތަކުގެ ތެރޭގައި ޔޫއޭއީއާއި މިޞްރާއި އެމެރިކާއާއި އިންޑިޔާ ހިމެނެއެވެ. އޭގެ އިތުރުން ލުބުނާން، ތުރުކީވިލާތް، އަޔަލެންޑު، އިޓަލީވިލާތް، ޖަރުމަންވިލާތް، ފަރަންސޭސިވިލާތް، ޕޯޗުގަލް، ސްވިޑަން، ސްވިޒަލޭންޑް، އާޖެންޓީނާ، ބްރެޒިލް، ޖަޕާން، އިންޑޮނޭޝިޔާ އަދި ދެކުނު އެފުރިކާ ހިމެނެއެވެ.
20 ޤައުމަކުން ސަޢުދީ ޢަރަބިއްޔާއަށް ދަތުރުކުރުން މަނާކޮށްފައިވާއިރު ފާއިތުވި 14 ދުވަހުގެ ތެރޭގައި އެ ޤައުމުތަކަށް ގޮސްފައިވާ ނުވަތަ އެ ޤައުމުތަކުގައި ޓްރާންސިޓުވެފައިވާ ފަރާތްތަކަށްވެސް އެ ޤައުމަށް އެތެރެވުން މަނާވާނެއެވެ. ސަޢުދީ ޢަރަބިއްޔާއިން ބުނީ އެ ޤައުމަށް ދަތުރުކުރުން 20 ޤައުމަކަށް މަނާކޮށްފައިވާ ނަމަވެސް ސަޢުދީ ޢަރަބިއްޔާގެ ރައްޔިތުންނާއި ޤައުމުތަކުގެ ޚާރިޖީ މުވައްޒަފުންނާއި ޞިއްޙީ ޚިދުމަތްތެރިންނާއި އެމީހުންގެ ޢާއިލާތައް އިސްތިސްނާވާނެކަމަށެވެ.
މިދިޔަ ޑިސެމްބަރު މަހުގެ ތެރޭގައި އިނގިރޭސިވިލާތުގައި ކޯވިޑް-19ގެ އައު ވައްތަރެއް ފެތުރެން ފެށުމާއިއެކު ސަޢުދީ ޢަރަބިއްޔާއިންވަނީ އެ ޤައުމަށް ދަތުރުނުކުރެވޭގޮތަށް ހަމަޖައްސާފައެވެ. ބައިނަލްއަޤްވާމީ ވައިގެ ދަތުރުތައް އަލުން ފަށައި އެ ޤައުމުގެ ބަނދަރުތައް ހުޅުވާލާފައިވަނީ މި އަހަރުގެ ޖަނަވަރީ މަހުގެ 3ވަނަ ދުވަހުގައެވެ.