މިދިޔަ މަހުގެ ތެރޭގައި ވެއްޓުނު އިންޑޮނޭޝިޔާގެ މަތިންދާބޯޓުގެ އޮޓޯ ތްރޮޓުލް ނިޒާމު ހިމެނޭގޮތަށް އެ ބޯޓުގެ ފަސް ބައެއް ތަހުލީލުކުރުމަށް އެމެރިކާއަށާއި އިނގިރޭސިވިލާތަށް ފޮނުވައިފިއެވެ.
62 ފަސިންޖަރުން ގޮވައިގެން އިންޑޮނޭޝިޔާގެ ޕޮންޓިއަކަށް ދަތުރުކުރި ސްރީވިޖަޔާ އެއާގެ މަތިންދާބޯޓު ޖަކާޓާ އެއާޕޯޓުން ފުރީ ޖެނުއަރީ މަހުގެ 9ވަނަ ދުވަހުގެ ޖީއެމްޓީން 7:36 ގައެވެ. އެއަށްފަހު ބޯޓުގެ ޕައިލެޓުވަނީ 29،000 ފޫޓުގެ އުހަށް ބޯޓު އުފުލުމަށް އެއާ ޓްރެފިކް ކޮންޓްރޯލަށް ގުޅާ ހުއްދަ ހޯދާފައެވެ. އޭގެ ހަތަރު މިނެޓު ފަހުން ބޯޓު ރާޑަރުން ގެއްލި، ބޯޓާއެކު އޮތް މުވާސަލާތީ ގުޅުން ކެނޑުނެވެ. އޭގެ ފަހުން ބޯޓު ދަތުރުކުރަމުންދިޔަ އުސްމިނުން 10،000 ފޫޓް ތިރިއަށް މިނެޓެއްގެ ތެރޭގައި ވެއްޓުނުކަން ފްލައިޓްތައް ދަތުރުކުރާ ގޮތް ދައްކުވާދޭ ރާޑާއަށް ވަނީ ރިކޯޑްކުރެވިފައިވެއެވެ.
އެ ހާދިޘާގައި ބޯޓުން ދަތުރުކުރި އެންމެންވަނީ މަރުވެފައެވެ. 26 އަހަރު ވެފައިވާ ބޮއޭންގް 737-500 މަރުކައިގެ މަތިންދާބޯޓު ވެއްޓުނީ ބޯޓުގެ އޮޓޯ ތްރޮޓުލް ނިޒާމަށް ދިމާވި މައްސަލައަކުންކަމަށް ބެލެވޭކަމަށް ހާދިޘާ ތަހުޤީޤުކުރަމުންދާ އިންޑޮނޭޝިޔާގެ ނޭޝަނަލް ޓްރާންސްޕޯޓޭޝަން ސޭފްޓީ ކޮމިޓީއިންވަނީ ބުނެފައެވެ. ނޭޝަނަލް ޓްރާންސްޕޯޓޭޝަން ސޭފްޓީ ކޮމިޓީގެ އިސްވެރިޔާ، ސޮއާޖަންޓޯ ޖަހުޖޯނޯ ވިދާޅުވީ މަތިންދާބޯޓުގެ ބައެއް ބައިތައް ބޭރު ޤައުމުތަކަށް ފޮނުވާފައިވަނީ އެ ބޯތުގެ އޮޓޯ ތްރޮޓުލް ނިޒާމަށް މައްސަލަ ޖެހުނު ސަބަބު ދެނެގަތުމަށްކަމަށެވެ. އޮޓޯ ތްރޮޓުލްގެ އިތުރުން ދެން ފޮނުވާފައިވަނީ ކޮން ބައިތަކެއްކަމެއް އޭނާ ވިދާޅުވެފައެއް ނުވެއެވެ.
މަތިންތާބޯޓުގެ ފުލައިޓް ޑާޓާ ރެކޯޑަރު (އެފްޑީއާރު) މިހާރު ފެނިފައިވާއިރު ތަޙްޤީޤުކުރާ ފަރާތްތަކުންވަނީ އޭގައި ރައްކާކޮށްފައިހުރި މަޢުލޫމާތުތައް ދިރާސާކޮށްފައެވެ. ނަމަވެސް މަތިންދާބޯޓުގެ ކޮކްޕިޓުގެ އަޑުތައް ރެކޯޑުކުރާ ވޮއިސް ރެކޯޑަރ ނުވަތަ ސީވީއާރު މިހާތަނަށް ފެނިފައެއް ނުވެއެވެ. ޖާވާ ކަނޑުގެ ތެރެއިން ސީވީއާރު ހޯދުމުގެ މަސައްކަތް އަދިވެސް ކުރިއަށްދާއިރު، އޭގައި ހުރި މަޢުލޫމާތުން ބޯޓު ވެއްޓެން މެދުވެރިވީ ޕައިލެޓުންނަށް ހެދުނު ގޯހެއްގެ ސަބަބުންނަމަ އެކަން ޔަޤީންކޮށްދޭނެކަމަށް ސޮއާޖަންޓޯ ޖަހުޖޯނޯ ވިދާޅުވިއެވެ.
މިދިޔަ މަހުގެ ތެރޭގައި އިންޑޮނޭޝިޔާގެ ނޭޝަނަލް ޓްރާންސްޕޯޓޭޝަން ސޭފްޓީ ކޮމިޓީގެ މެންބަރެއްކަމަށްވާ ނޫރުސައިހޯ އުތޯމޯ ވިދާޅުވީ ބޮއިން މަރުކާގެ މި މަތިންދާބޯޓު ގެއްލުމުގެ ހާދިސާގެ ކުރިން ކުރި ދަތުރަކަށްފަހު މަތިންދާބޯޓުގެ އޮޓޯ ތުރޮޓުލް ނިޒާމަށް މައްސަލައެއް ދިމާވެފައިވާކަން އަންގާފައި އޮތްކަމަށެވެ. އެހެންނަމަވެސް އޭރު ދިމާވީ ކޮން މައްސަލައެއްކަން މިހާތަނަށް ސާފުވެފައިނުވާކަމަށް އެނާ ވިދާޅުވިއެވެ. ބޯޓު ވެއްޓުމަށް މެދުވެރިވި މައްސަލައަކީ އޮޓޯ ތްރޮޓުލް ނިޒާމަށް ދިމާވި މައްސަލައެއްކަމަށް ސީދާ އަދި ބުނަން ނޭނގުނު ނަމަވެސް މަތިންދާބޯޓުގެ މެއިންޓެނަންސް ޓީމުގެ ލޮގުގައި އެ ނޫން އިތުރު މައްސަލައެއް އަޅައިގެންފައި ނުވާކަމަށް އޭރު އޭނާވަނީ ވިދާޅުވިއެވެ.
ނޫރުސައިހޯ އުތޯމޯ އޭރު ވިދާޅުވި ގޮތުގައި މަތިންދާބޯޓެއްގައި ހުންނަ އޮޓޯ ތުރޮޓުލް ނިޒާމަށް މައްސަލައެއް ދިމާވި ނަމަވެސް އެ ބޯޓެއް ދުއްވުމުގެ ހުއްދަދެއެވެ. އެގޮތަށް އަމަލުކުރަނީ އެ ނިޒާމް ފެއިލްވިނަމަވެސް އެ ނިޒާމުން ކުރާ މަސައްކަތް ބޯޓުގެ ޕައިލެޓުންނަށްވެސް ކުރެވޭތީކަމަށް އޭނާ ވިދާޅުވިއެވެ.
މަތިންދާބޯޓު ވެއްޓުނު ހާދިޘާއާގުޅޭ އިބްތިދާއީ ރިޕޯޓު ވަރަށް އަވަހަށް އާންމުކުރާނެކަމަށް ނޭޝަނަލް ޓްރާންސްޕޯޓޭޝަން ސޭފްޓީ ކޮމިޓީއިން ބުންޏެވެ.