ކޯވިޑް-19ގެ ޙާލަތު ގޯސްވެ ޕޮޒިޓިވްވާ މީހުންގެ ޢަދަދުތައް މައްޗަށް ގޮސްފައިވާތީ ރައްކާތެރިކަމުގެ ފިޔަވަޅުތައް ވަރުގަދަކޮށް މާލެ ސަރަހައްދުގެ ކާފިއު ވަގުތު އިތުރުކޮށްފިއެވެ.
ކޯވިޑް-19 އިން ރައްކާތެރިވުމަށް އަޅާފައިވާ ޚާއްޞަ ފިޔަވަޅުތަކަށް ބަދަލު ގެނެސް ޑިރެކްޓަރ ޖެނެރަލް އޮފް ޕަބްލިކް ހެލްތު ސޮއިކުރައްވައި ނެރުއްވާފައިވާ ބަޔާނުގައިވާގޮތުން ކުރިއަށް އޮތް 2 ހަފްތާގައި ރޭގަނޑު 11އިން ފެށިގެން ފަތިހު 4:30އަށް މާލެ ސަރަޙައްދުގައި ވަނީ ކާފިއު އިޢުލާންކޮށްފައެވެ. އަދި ރޭގަނޑު 08:30އިން ފެށިގެން ފަތިހު 04:30އަށް މާލެ ސަރަހައްދުގައި އެއްގަމު އުޅަނދު ދުއްވުމަކީވެސް މަނާ ކަމެކެވެ. މިކަންތައްތަކަށް އަމަލުކުރުމަށް ހަމަޖެހިފައިވަނީ 3 ފެބްރުއަރީއިން ފެށިގެންނެވެ.
ރައްކާތެރިކަމުގެ ފިޔަވަޅުތަކަށް ގެނައި ބަދަލާއެކު މީހުން ދިރިއުޅޭ ހުރިހާ ރަށެއްގައި ޢާއްމު ތަންތަނުގައި އުޅޭއިރު މާސްކް އެޅުމަކީވެސް މަޖުބޫރު ކަމެއްގެ ގޮތުގައި މިހާރުވަނީ ކަނޑައަޅާފައެވެ. ވަކިގޮތެއް އަންގަންދެން، ރަށްރަށުގައި ގެއިން ބޭރުގައި އުޅޭއިރު، އަނގަޔާއި ނޭފަތާއި ދަތްދޮޅި ނިވައިވާ ގޮތަށް މާސްކު އެޅުމަށް، އަންގަވާފައިވަނީ 7 ފެބުރުވަރީ އިން ފެށިގެންނެވެ.
ގެއިން ބޭރުގައި އުޅޭއިރު މާސްކް އެޅުމުން އިސްތިސްނާވަނީ:
1 .އުމުރުން 2 އަހަރުން ދަށުގެ ކުޑަކުދިން.
2 .ކަސްރަތު ކުރަން އުޅޭ މީހުން ކަސްރަތުކުރާ ވަގުތު.
3 .އެހެން މީހެއްގެ އެހީއާނުލައި މާސްކު އަޅައި، މާސްކު ނުނެގޭ މީހުން.
4 .ހޮޓާ،ކެފޭ، ރެސްޓޯރަންޓް، ފަދަ ކާބޯތަކެތީގެ ޚިދުމަތްދޭ ތަންތަނުން ޚިދުމަތް ހޯދާ ފަރާތްތައް، ޚިދުމަތް ހޯދާ ވަގުތު
އަދި އާންމުކޮށް ޚާއްޞަ ހުއްދައިގެ ދަށުން ޟަރޫރީ ބޭނުންތަކަށް މާލެ ސަރަޙައްދުން ރަށްރަށަށް ދާ ފަރާތްތަކުން ދަތުރުކުރުމުގެ 72 ގަޑިއިރުގެ ތެރޭގައި ހަދާފައިވާ ނެގެޓިވް ޕީ.ސީ.އާރު ޓެސްޓެއްވެސް އޮންނަން ޖެހެއެވެ.
މީގެ އިތުރުން ޕްރީ ސްކޫލްތަކާއި ނާރސަރީތަކާއި ޑޭކެއަރ ޚިދުމަތް ބަންދުކުރަން ނިންމާފައިވާއިރު ޔުނިވަރސިޓީއާއި ކޮލެޖްފަދަ ތަންތަނުގެ ކިޔަވައިދިނުން، ކުރިއަށް އޮތް 2 ހަފްތާގައި އޮންލައިކޮށް ކުރިއަށް ގެންދިއުމަށް ވެސް ވަނީ އަންގަވާފައެވެ.
މި ފިޔަވަޅުތަކުގެ އިތުރުން ކުރިއަށް އޮތް 2 ހަފްތާގައި ޕާކުތަކާއި މައިދާންތަކަށް ޒިޔާރަތްކުރުން ހުއްޓާލުމަށްވެސް ވަނީ އަންގަވާފައެވެ. އަދި އެކަނި ކުރާ ކަސްރަތުފިޔަވައި، އެހެން ހުރިހާ ކުޅިވަރު ޙަރަކާތަކާއި ކަސްރަތުގެ ޙަރަކާތްތައް ކުރިއަށް އޮތް 2 ހަފްތާއަށް ހުއްޓާލުމަށްވެސް ވަނީ އަންގަވާފައެވެ. މިގޮތަށް ނިންމާފައިވީނަމަވެސް ޢުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުންނާއެކު ކަސްރަތުކުރުމުގައި އެމީހަކާ އެކުގައި ދިރިއުޅޭ އެހެން މީހަކަށް ބައިވެރިވެވިދާނެކަމަށް އެޗްއީއޯސީން ވިދާޅުވެއެވެ.
ކޯވިޑް-19އިން ރައްކާތެރިވުމަށް އަޅާ ފިޔަވަޅުތައް ވަރުގަދަކޮށްފައި މިވަނީ ރާއްޖޭގައި ކޯވިޑް-19 ޖެހޭ މީހުންގެ އަދަދު އިތުރުވަމުންދާތީ މި ބަލި ކޮންޓްރޯލް ކުރުމަށްޓަކައެވެ. ރާއްޖެއިން ކޯވިޑަށް ޕޮޒިޓިވްވާ މީހުންގެ އަދަދު މަދުވުމާއެކު ރައްކާތެރިކަމުގެ ގޮތުން އެޅި ބައެއް ފިޔަވަޅުތަކަށް ލުއި ދީފައިވަނީ އާންމުންނަށް އެކަންކަމުގެ ސަބަބުން ދިމާވަމުންދިޔަ ދަތިތަކަށް ލުޔެއް ދިނުމުގެ ގޮތުންނެވެ. ރާއްޖެއިން މިހާތަނަށް ކޯވިޑް-19ޖެހުނު މީހުންގެ ޢަދަދުވަނީ ސޯޅަ ހާހަށްވުރެ އިތުރުވެފައެވެ.