މިޔަންމާގެ މަދަނީ ލީޑަރު އައު ސަން ސޫ ޗީ ޙައްޔަރުކޮށް ޤައުމުގެ ހިންގުމާއި އެ ޤައުމުގެ އަސްކަރިއްޔާއިން ޙަވާލުވެއްޖެއެވެ.
ފެބުރުއަރީ މަހުގެ 1 ވަނަ ދުވަހުގެ ހެނދުނު ވަގުތެއްގައި މިޔަންމާގެ އަސްކަރިއްޔާއިން ވަނީ އައު ސަން ސޫ ޗީއާއި އޭނާގެ ނޭޝަނަލް ލީގު ފޮރ ޑިމޮކްރަސީ (އެންއެލްޑީ)ގެ ސަރުކާރަށް ނިސްބަތްވާ އިސް ގިނަ އޮފިޝަލުންތަކެއް ޙައްޔަރުކޮށްފައެވެ. އެއަށްފަހު އަސްކަރިއްޔާއިން ވަނީ އެ ޤައުމުގައި އެއް އަހަރުގެ މުއްދަތަށް ކުއްލި ޙާލަތު އިޢުލާނުކޮށްފައެވެ.
އަސްކަރިއްޔާއިން ހިންގާ ޓީވީ ޗެނަލަކުން ދެއްކި ވީޑިއޯ މެސެޖެއްގައި ބުނީ ޤައުމުގެ ސިޔާސީ ލީޑަރުން ޙައްޔަރުކޮށްފައިވަނީ މިދިޔަ ނޮވެމްބަރު މަހުގައި ބާއްވާފައިވާ އެ ޤައުމުގެ އިންތިޚާބު އޮޅުވާލާފައިވާތީކަމަށެވެ. އަދި އަސްކަރިއްޔާގެ އިސްވެރިޔާ، މިން އައުން ހްލައިންގާއި ޤައުމުގެ ބާރުތައް ޙަވާލުކޮށްފައިވާކަމަށްވެސް ބުންޏެވެ.
އަސްކަރިއްޔާއިން އެގޮތަށް ޢަމަލުކޮށްފައިވަނީ ސަރުކާރާއި އަސްކަރިއްޔާއާއި ދެމެދު ނުތަނަވަސްކަން ބޮޑުވެ، ބަޣާވާތްކޮށްފާނެކަމުގެ ކަންބޮޑުވުންތައް އިތުރުވެފައިވަނިކޮށެވެ. މިދިޔަ އަހަރުގެ ފަހު ކޮޅުގައި ބޭއްވި މިޔަންމާގެ އިންތިޚާބުގައި ސޫ ޗީގެ ޕާޓީން ވަނީ 83 އިންސައްތަ ވޯޓުން ކާމިޔާބުކޮށްފައެވެ. އެއާއިއެކު އިންތިޚާބު އޮޅުވާލާފައިވާކަމުގެ ތުހުމަތުތަކުގެ އަޑު ދިޔައީ ގަދަވަމުންނެވެ. ނަމަވެސް އެ ޤައުމުގެ އިންތިޚާބާއިބެހޭ ކޮމިޝަނުން ވަނީ ވޯޓުގައި އެއްވެސް މައްސަލައެއް ނޫޅޭކަމަށް ބުނެފައެވެ.
ސަރުކާރާއި ދެކޮޅަށް ބަޣާވާތްކުރި ބައެއް ސަބަބުތަކުގެ ތެރޭގައި އިންތިޚާބާއިބެހޭ ކޮމިޝަނުން ވޯޓުލާ މީހުންގެ ލިސްޓާއިމެދު ހުށަހަޅާފައިވާ ޝަކުވާތައް ނުބެލުމާއި އިންތިޚާބުގެ މައްސަލަ ޙައްލުވަންދެން ޤާނޫނުހަދާ މަޖިލީހުގެ ބައްދަލުވުންތައް ފަސްކުރުމަށް ދެކޮޅުހެދުން ހިމެނޭކަމަށް އަސްކަރިއްޔާއިން ބުންޏެވެ.
މިޔަންމާގެ ވެރިކަންކުރާ ސިޓީ ނޭޕޯޓޯއަށާއި ޔެންގޮންގް މުވާސަލާތީ ޚިދުމަތްތައް ކެނޑިފައިވާއިރު، ދަޢުލަތުގެ ޓީވީ ޗެނަލްގެ ޓްރާންސްމިޝަންވެސް ވަނީ މެދުކަނޑާލައިފައެވެ.
މޮބައިލް ފޯނުގެ ސެލިއުލާ ޚިދުމަތްތަކަށާއި އިންޓަނެޓުގެ ޙިދުމަތަށްވެސް އެ ސަރަޙައްދުތަކުގައި ވަނީ ބުރޫ އަރައިފައެވެ. އަދި ޔެންގޮންގައި ދިރިއުޅޭ ގިނަ ޢަދަދެއްގެ މީހުން ވަނީ ފިހާރަތަކުން ކާބޯތަކެތި ގަތުމަށާއި އޭޓީއެމުން ފައިސާ ނެގުމަށް އަވަސްވެގެންފައެވެ.