ޖަރުމަނުވިލާތުން 2022ވަނަ އަހަރަށް ކޯވިޑް-19 ވެކްސިން އޯޑަރުކުރަން ފަށައިފައިވާކަމަށް އެ ޤައުމުން ބުނެފިއެވެ.
ޖަރުމަނުވިލާތުގެ ޞިއްޙާތާއިބެހޭ ވަޒީރު ޖެން ސްޕާން ވިދާޅުވީ ކުރިއަށް އޮތްތަނުގައި ޤައުމުގެ ރައްޔިތުން ކޯވިޑް-19ން ރައްކާތެރިކުރުމަށް ވެކްސިންގެ އިތުރު ޑޯޒް ނުވަތަ ބޫސްޓަރު ޑޯޒް ދޭން ޖެހިދާނެކަމަށް ބަލާ، ޖަރުމަނުވިލާތުން އެކަމަށް ތައްޔާރުވަމުންދާކަމަށެވެ. އޭނާ އެހެން ވިދާޅުވެފައިވަނީ ވިލާތުގެ ޤައުމުތަކުގައި ވެކްސިން ދެމުންދާ ދުވެއްޔާއިމެދު ފާޑުކިޔުން އަމާޒުވެފައިވާ ދަނޑިވަޅެއްގައެވެ.
ވިލާތުގެ އެންމެ ބޮޑު އިޤްތިޞާދު އޮންނަ ޖަރުމަނުވިލާތުގެ އިޤްތިޞާދަށް ކޯވިޑް-19ގެ ސަބަބުންވަނީ ބޮޑު ހީނަރުކަމެއް އައިސްފައެވެ. ބަލި ފެތުރުން ހުއްޓުވުމަށް އެ ޤައުމު ދެވަނަ ފަހަރަށް ފުރަބަންދުކޮށްފައިވަނީ މިދިޔަ ނޮވެމްބަރު މަހުގެ ތެރޭގައެވެ. އޭގެ ސަބަބުން އެ ޤައުމުގެ އިޤްތިޞާދަށްވަނީ އިތުރު ގޮންޖެހުންތައް ކުރިމަތިވެފައެވެ. އިނގިރޭސިވިލާތާއި އިސްރާއީލާއި އެމެރިކާގައި ކޯވިޑް-19 ވެކްސިން ދެމުންދާ ދުވެލި ޖަރުމަނުވިލާތަށްވުރެ އަވަސްވުމުން ޖަރުމަނުވިލާތުގެ ބައެއް ރައްޔިތުންވަނީ ހިތްހަމަނުޖެހިފައެވެ.
ވަޒީރު ސްޕާން ވިދާޅުވީ ޖަރުމަނުވިލާތުން ވެކްސިން ހޯދުމުގައި އާއި ވެކްސިން ދިނުމުގައި ކޮށްފައިވާ މަސައްކަތްތައް ރަނގަޅުކަމަށެވެ. 83 މިލިއަން މީހުންގެ އާބާދީއެއް އޮންނަ ޖަރުމަނުވިލާތުގެ 2.3 މިލިއަން މީހުންނަށް މިހާރު ވެކްސިން ދީފައިވާކަމަށް އޭނާ ވިދާޅުވިއެވެ.
ޖަރުމަނުވިލާތުގައި މިހާތަނަށް 2.21 މިލިއަން މީހުންނަށް ކޯވިޑް-19 ޖެހި 57،512 މީހުންވަނީ އެބަލީގައި މަރުވެފައެވެ. ފާއިތުވި 24 ގަޑިއިރުގެ ތެރޭގައިވެސް އެ ޤައުމުގައި 9،841 މީހުންނަށް ބަލިޖެހި 460 މީހުންވަނީ މަރުވެފައެވެ. ފާއިތުވި ހަތް ދުވަހުގެ ތެރޭގައި އެ ޤައުމުގައި ބަލިޖެހިފައިވަނީ ކޮންމެ 100،000 މީހުންގެ ތެރެއިން 91 މީހުންނަށެވެ. ޖަރުމަނުވިލާތުގެ އިދާރާތަކުން ބުނީ އެ ޤައުމުގެ ހަސްފަތާލުތަކަށް ބާރުބޮޑު ނުވާނީ އެ ޢަދަދު 50އަށްވުރެ ތިރިކުރެވިގެންކަމަށެވެ.