އިނގިރޭސިވިލާތިގައި ކޯވިޑް-19 ފެތުރުން ހުއްޓުވުމަށް ޤާއިމްކޮށްފައިވާ ފުރަބަންދު މާރިޗު މަހާއި ހަމައަށް ދެމިގެންދާނެކަމުގެ އިޝާރާތެއް އެ ޤައުމުގެ ބޮޑުވަޒީރު ބޮރިސް ޖޮންސަން ކުރައްވައިފިއެވެ.
މިދިޔަ މަހުގެ ފަހުކޮޅު އިނގިރޭސިވިލާތުންވަނީ ކޯވިޑް-19 ޖައްސާ ވައިރަހުގެ އައު ވައްތަރެއް ފެނިފައެވެ. ވައިރަހުގެ އެ ވައްތަރަކީ ކުރިން ފެތުރެމުންދިޔަ ވައްތަރަށްވުރެ ވާރުތަވުމުގެ ބާރު ގަދަ ވައިރަހެކެވެ. އޭގެ ސަބަބުން އިނގިރޭސިވިލާތުގައި ކޯވިޑް-19 ޖެހޭ މީހުންގެ ޢަދަދުވަނީ ވަރަށް ބޮޑަށް އިތުރުވެފައެވެ. މިހާތަނަށް 3.7 މިލިއަން މީހުންނަށް އެ ޤައުމުގައި ކޯވިޑް-19 ޖެހިފައިވާއިރު 100،000އަށްވުރެ ގިނަ މީހުންވަނީ އެބަލީގައި މަރުވެފައެވެ.
ޖަނަވަރީ މަސް ފެށުނީއްސުރެ އިނގިރޭސިވިލާތް އޮތީ ފުރަބަންދުކޮށްފައެވެ. ރައްކާތެރިކަމުގެ ފިޔަވަޅެއްގެ ގޮތުން އެ ޤައުމުގެ މަދަރުސާތަކާއި ކެފޭތަކާއި ރެސްޓޯރަންޓުތައްވެސްވަނީ ބަންދުކޮށްފައެވެ. ކޮންމެހެން ނިކުންނަން ޖެހިއްޖެ ޙާލަތެއްގައި ނޫނީ އާންމުން ބޭރު ތެރެއަށް ނުކުމެ ނޫޅުމަށް ސަރުކާރުންވަނީ އިލްތިމާސްކޮށްފައެވެ. ކޯވިޑް-19އާއި ދެކޮޅަށް ވެކްސިން ދިނުމުގެ ޙަރަކާތެއް އިނގިރޭސިވިލާތުގައި މިހާރު ފެށިގެން ކުރިއަށް ދާއިރު ކުރިއަށްއޮތް ފެބްރުއަރީ މަހުގެ މެދަކާއި ހަމައަށް ދިޔުމުގެ ކުރިން ބަލީގެ ނުރައްކާ އެންމެ ބޮޑު މީހުންގެ ތެރޭގައި ހިމެނޭ 15 މިލިއަން މީހުންނަށް ވެކްސިން ދިނުމަށް އެ ޤައުމުންވަނީ އަމާޒު ހިފާފައެވެ.
ޤާނޫނުހަދާ މަޖިލީހުގައި ވާހަކަދައްކަވަމުން ބޮޑުވަޒީރު ޖޮންސަން ވިދާޅުވީ ފެބްރުއަރީ މަސް ނިމެންވާއިރަށް ގިނަ ޢަދަދެއްގެ މީހުންނަށް ވެކްސިން ދިނުމުން މާރިޗު މަހުގެ ތެރޭގައި އެ ޤައުމުގެ މަދަރުސާތައް ހުޅުވޭނެކަމަށް އުންމީދުކުރައްވާކަމަށެވެ. އެގޮތުން މާރިޗު މަހުގެ 8ވަނަ ދުވަހުގައި މަދަރުސާތައް އަލުން ހުޅުވައި، އިޤްތިޞާދީ އަދި އިޖުތިމާޢީ އެހެނިހެން ފިޔަވަޅުތައް އުވާލެވޭނެކަމަށް އުންމީދުކުރައްވާކަމަށް ޖޮންސަން ވިދާޅުވިއެވެ.
އިނގިރޭސިވިލާތުންވަނީ ވައިރަހުގެ ނުރައްކާ ބޮޑު 22 ޤައުމަކުން އެ ޤައުމަށް ދަތުރުނުކުރެވޭ ގޮތަށް ހަމަޖައްސައިފައެވެ. އޭގެ ތެރޭގައި ވައިރަހުގެ އައު ވައްތަރުތައް ފެނިފައިވާ ދެކުނު އެފުރިކާއާއި ދެކުނު އެމެރިކާގެ ޤައުމުތައްވެސް ހިމެނެއެވެ. އިނގިރޭސިވިލާތުގެ ސަރުކާރުން ބުނީ އެހެން ޤައުމުތަކުން އެ ޤައުމަށް ދަތުރުކުރާ ފަރާތްތަކުން ސަރުކާރުން ކަނޑައަޅާ ތަނެއްގައި ދިހަ ދުވަހުގެ ކަރަންޓީނެއް ފުރިހަމަކުރަންޖެހޭ ގޮތަށް ނިންމާފައިވާކަމަށެވެ.
އިނގިރޭސިވިލާތިގެ ދާޚިލީ ވަޒީރު ޕްރިތީ ޕަޓޭލް ވިދާޅުވީ އެ ޤައުމުން އެހެން ޤައުމުތަކަށް ދަތުރުކުރާ މީހުން ޤައުމުން ބޭރަށް ދަތުރުކުރާ ސަބަބުގެ ތަފްޞީލް ބަޔާންކޮށް ލިޔުމެއް ހުށަހަޅަންޖެހޭނެކަމަށެވެ. ޗުއްޓީއަށް ދަތުރުކުރުމަކީ މި ދަނޑިވަޅުގައި ބަލައިގަނެވޭނެ ސަބަބެއް ނޫންކަމަށް އޭނާ ވިދާޅުވިއެވެ. މުހިންމު ބޭނުމެއް ނެތި ދަތުރުކުރާ ފަރާތްތައް އަބުރާ ފޮނުވާލުމަށް ބަނދަރުތަކާއި އެއާޕޯޓުތަކުގައި މަސައްކަތްކުރާ ފުލުހުންގެ ޢަދަދު އިތުރުކުރާނެކަށް އޭނާ ވިދާޅުވިއެވެ.
ކޯވިޑް-19ގެ ސަބަބުން މާލީ ޙާލަތު ހީނަރުވެފައިވާ އެއާލައިނުތަކާއި ޓްރެވަލް ދާއިރާގައި ހިމެނޭ އެހެން ކުންފުނިތަކުންވަނީ މި ޙާލަތުގައި އެ ފަރާތްތަކަށް ސަރުކާރުގެ ފަރާތުން ފޯރުކޮށްދޭ އެހީތެރިކަން އިތުރުކުރުމަށް ގޮވައިލައިފައެވެ. އަދި ރައްކާތެރިކަމުގެ ފިޔަވަޅުތައް އެޅުމުގައި ގެންގުޅޭ އުސޫލުތަކާއި ރޭވުންތައް ސާފުކޮށް ބަޔާންކޮށްދިނުމަށް އެ ފަރާތްތަކުންވަނީ ސަރުކާރުގެ ކިބައިން އެދިފައެވެ.
ޙަބީބުނ
އެހެންނުހަދާ އިންޑިޔާ ވެކްސިން ގެންގޮސްޖަހާ ކަލޭމެން ހިތުން ކަލޭމެންތީ ވަރައްގަދަބައެއް ﷲ ގެއިރާދަޔާނުލާ މިތާއުޅޭ ފިދަންކަލޯވެސް އެގޮވަނީ ރަޖާލައިގެން ގޭގަތިބޭނި ކަމެއްނެތޭ ދުނިޔެވެސް ރާއްޖެވެސް ނުހުއްޓުވޭނޭ ކޮބާތޯ މިއަދު ކިހިނެއްތޯ ތިޔަވަނީ