އަދާލަތުގެ ޕާޓީގެ ރައީސްކަމަށް ކުރިމަތިލެއްވި ހޯމް މިނިސްޓަރ އިމްރާން އަބްދުﷲ ކެމްޕެއިން މެނޭޖަރެއް އައްޔަންކޮށް މިރޭ ކެމްޕެއިން ފަށަން ނިންމަވައިފިއެވެ.
ޝެއިހް އިމްރާންގެ ކެމްޕެއިން މެނޭޖަރަކަށް ކަނޑައަޅުވާފައިވަނީ ޝެއިހް މުހައްމަދު ޝިފާންއެވެ. ކެމްޕެއިން މެނޭޖަރު ކަނޑައެޅުއްވިކަން އިއުލާންކުރައްވާ ޝެއިހް އިމްރާން ކުރެއްވި ޓްވީޓެއްގައި ވިދާޅުވީ ޕާޓީގެ ރައީސްކަމަށް ވާދަކުރާ އިންތިޚާބުގެ ކެމްޕެއިން މިރޭ ލޯންޗުކުރައްވާނެކަމަށެވެ. އަދާލަތު ޕާޓީގެ ރައީސާއި ނައިބު ރައީސް ހޮވުމަށް ބާއްވާ އިންތިޚާބުގައި ޝެއިހްް އިމްރާންގެ ރަނިން މޭޓަކީ ގ. އަލިޝާ، އަޙްމަދު ޝަރީފެވެ.
Adhaalath Party ge Raees hovumah baavvaa inthikhaabga alhugandu ge campaign manager akah sheikh Mohamed Shifan (@abu_auyun) hamajassaa campaign kuriah gendhaane goyi mashwara koffin. Maadhamaa reyge campaign launch event onnaane iA. pic.twitter.com/2E1jHLsfnr
— Imran Abdulla (@ShimranAb) January 23, 2021
އަދާލަތު ޕާޓީގެ 3 ވަނަ ދައުރަށް ޕާޓީގެ ރައީސާއި ނައިބު ރައީސް ހޮވުމަށް ބާއްވާ އިންތިޚާބުގައި ޝެއިހް އިމްރާނާއި އެކު ރައީސްކަމަށް ވާދަކުރައްވަނީ އިސްލާމިކް މިނިސްޓަރ ޑރ. އަޙްމަދު ޒާހިރެވެ. އިސްލާމިކް މިނިސްޓަރ ޑރ. އަޙްމަދު ޒާހިރުގެ ރަނިން މޭޓެއްގެގޮތުގައި ނައިބު ރައީސްކަމަށް ކުރިމަތިލާފައިވަނީ ދަފްތަރު ނަންބަރު 3851، އަޙްމަދު ނަޝީދެވެ.
ޢަދާލަތު ޕާޓީގެ އިންތިޚާބު އޮންނަނީ މިމަހުގެ 30 ވާ ހޮނިހިރު ދުވަހުއެވެ. މި އިންތިޚާބުގައި ވޯޓުލުމުގެ ޙައްޤު ލިބިގެންވަނީ މިމަހުގެ 27 ވާ ބުދަ ދުވަހުގެ މެންދުރު 2 ގެ ނިޔަލަށް ޢަދާލަތު ޕާޓީގެ މެންބަރެއްގެގޮތުގައި ރަޖިސްޓްރާ ބަލައިގަނެފައިވާ މެންބަރުންކަމަށް އެ ޕާޓީން ބުނެއެވެ. އަދި މި އިންތިޚާބުގައި ވޯޓުލުމުގެ ޙައްޤު ލިބިގެންވާ މީހުންގެ ދަފްތަރަށް ޝަކުވާ ހުށަހެޅުމަށްވެސް ޢަދާލަތު ޕާޓީން މިހާރު ވަނީ ހުޅުވާލާފައެވެ.
ވޯޓުލުމުގެ ޙައްޤު ލިބިގެންވާ މީހުންގެ ދަފްތަރާއި ގުޅޭ އެއްވެސް ޝަކުވާއެއް ވާނަމަ މިމަހުގެ 27 ގެ ކުރިން vote.adhaalath.org.mv އަށް ހުށައެޅުމަށް އެޕާޓީން އެދެއެވެ.
ޢަދާލަތު ޕާޓީއަކީ ރާއްޖޭގައި ސިޔާސީ ޕާޓީތައް ހެދުމުގެ ހުއްދަ ދިނުމުން 3 ވަނަ އަށް ރަޖިސްޓްރީކުރި ޕާޓީއެވެ. ޢަދާލަތު ޕާޓީ ރަޖިސްޓްރީކޮށްފައިވަނީ 18 އޯގަސްޓް 2005 ގައެވެ. އިލެކްޝަންސް ކޮމިޝަންގެ ޕާޓީތަކުގެ ދަފްތަރު ދައްކާގޮތުން 30 ސެޕްޓެމްބަރ 2019 ގެ ނިޔަލަށް ޢަދާލަތު ޕާޓީގައި މެންބަރުން ތިބި އަދަދަކީ 6436 އެވެ.