އަންނަ މަހުގެ ތެރޭގައި އެމެރިކާގެ ކުރީގެ ރައީސް ޑޮނަލްޑް ޓްރަމްޕު އަޒުލް ކުރުމާއިގުޅޭ ޝަރީޢަތް ފަށާނެކަމަށް އެމެރިކާގެ ޤާނޫނުހަދާ މަޖިލީހުގެ މަތިގޭގެ ލީޑަރު ވިދާޅުވެއްޖެއެވެ. ޓްރަމްޕު އަޒުލްކުރުމަށް ނިންމާފައިވަނީ ޖަނަވަރީ މަހުގެ 6ވަނަ ދުވަހުގައި އެމެރިކާގެ ޤާނޫނުހަދާ މަޖިލީސް ހިންގާ ކެޕިޓޮލް އިމާރާތުގައި އެމަނިކުފާނަށް ތާއީދުކުރާ ފަރާތްތަކަކުން ހިންގި ހަމަނުޖެހުންތަކަށް އެމަނިކުފާނު ހިތްވަރު ދެއްވުމުގެ ކުށުގައެވެ.
މިދިޔަ ނޮވެމްބަރު މަހުގެ 3ވަނަ ދުވަހުގައި ބޭއްވި އެމެރިކާގެ ރިޔާސީ އިންތިޚާބު ކާމިޔާބުކުރެއްވީ ޖޯ ބައިޑަންކަމަށް ޤާނޫނުހަދާ މަޖިލީހުން ކަށަވަރުކުރުމަށް ތައްޔާރުވަމުންދިޔަ ދަނޑިވަޅުގައި ކެޕިޓޮލް އިމާރާތް ދޮށަށް އެއްވެ އިންތިޚާބުގެ ނަތީޖާއާއިމެދު ނުރުހުން ފާޅުކުރުމަށް ޓްރަމްޕުވަނީ އޭނާގެ ސަޕޯޓަރުންނަށް ގޮވާލައްވާފައެވެ. އެއާއިއެކު އެމަނިކުފާނަށް ތާއީދުކުރާ ގިނަ ޢަދަދެއްގެ މީހުންވަނީ ކެޕިޓޮލް އިމާރާތަށް ވަދެގަނެ އެތަނުގައި ހަމަނުޖެހުން އުފައްދައި ގެއްލުންދީފައެވެ. އެ ހާދިޘާގައި ފަސް މީހުންވަނީ މަރުވެފައެވެ. ކެޕިޓޮލްގެ ހާދިޘާ ހިންގަމުން ދިޔަ ވަގުތުގައިވެސް އެތަނުގައި ޙަރަކާތްތެރިވަމުން ދިޔަ އެމަނިކުފާނުގެ ސަޕޯޓަރުންދެކެ ލޯބިވެވަޑައިގަންނަވާކަމަށް ޓްރަމްޕުވަނީ ވިދާޅުވެފައެވެ.
ކެޕިޓޮލްގެ ހާދިޘާއާއި ގުޅިގެން އެމެރިކާގެ ޤާނޫނުހަދާ މަޖިލީހުގެ ތިރިގެއިން ވަނީ ރައީސްކަމުން ޓްރަމްޕު އަޒުލްކުރުމަށް ފާސްކޮށްފައެވެ. އެ މަސައްކަތާއިގެން ކުރިއަށް ދިޔުމަށް ވޯޓު ދެއްވާފައިވަނީ 232 މެންބަރުންނެވެ. އަދި އެމަނިކުފާނު އަޒުލްކުރުމާއި ދެކޮޅަށް ވޯޓު ދެއްވާފައިވަނީ 197 މެންބަރުންނެވެ.
އެމެރިކާގެ ޤާނޫނުހަދާ މަޖިލީހުގެ ތިރިގޭގެ ރައީސާ، ނެންސީ ޕެލޯސީވަނީ ރައީސް ޓްރަމްޕު އަޒުލްކުރުމާއި ގުޅޭ ތިރިގޭގެ ލިޔުން ޖަނަވަރީ މަހުގެ 25ވަނަ ދުވަހުގައި ޤާނޫނުހަދާ މަޖިލީހުގެ މަތިގެއަށް ފޮނުއްވާނެކަމަށް އެ މަޖިލީހަށް އަންގަވައިފައެވެ. އެކަމާއިގުޅޭގޮތުން ޤާނޫނުހަދާ މަޖިލީހުގެ މަތިގޭގެ ލީޑަރު ޗަކް ޝުމާ ވިދާޅުވީ ޓްރަންޕު އަޒުލްކުރުމާއިގުޅޭ ޝަރީޢަތް މަތިގޭގައި ބާއްވާނެކަމަށާއި، ރައީސް ކުށްވެރިވެފައިވޭތޯ ނުވަތަ ނޫންތޯ ނިންމުމަށް އެ މަޖިލީހުގައި ވޯޓުލާނެކަމަށެވެ. އަދި އެ ޝަރީޢަތަކީ ފުރިހަމަ އަދި އިންސާފުވެރި ޝަރީޢަތަކަށްވާނެކަމަށް އޭނާ ވިދާޅުވިއެވެ.
ޝުމާ ވިދާޅުވީ ޖަނަވަރީ މަހުގެ 25ވަނަ ދުވަހުގައި ޤަނޫނުހަދާ މަޖިލީހުގެ ތިރިގޭގެ ނުވަ މެންބަރުން ޓްރަމްޕާއި ދެކޮޅަށް ކުރާ ދައުވާތައް ހުށަހަޅައި ޓްރަމްޕު އަޒުލްކުރުމުގެ ލިޔެކިޔުންތައް ސެނެޓަށ ހުށަހަޅުއްވާނެކަމަށެވެ. އެއަށްފަހު އެ މެންބަރުންނާއި ރައީސް ޓްރަމްޕުގެ ޤާނޫނީ ވަކީލުންނަށް ޝަރީޢަތަށް ތައްޔާރުވެ، ޤާނޫނީ ލިޔެކިޔުންތަކާއި ހެކި ހުށަހެޅުމަށް ދެ ހަފުތާގެ މުއްދަތު ލިބޭނެކަމަށް ޝުމާ ވިދާޅުވިއެވެ. ޝަރީޢަތް ފެށޭނީ ފެބްރުއަރީ މަހުގެ 8ވަނަ ދުވަހުގައެވެ.
ތިރިގޭގެ ރައީސާ ވިދާޅުވީ ޓްރަމްޕު އަޒުލްކުރުމުގެ ޝަރީޢަތުގެ ސަބަބުން އެމެރިކާގެ އައު ރައީސް ޖޯ ބައިޑަން ޤައުމުގައި އެއްބައިވަންތަކަން ޤާއިމްކުރުމަށް ގޮވާލައްވަމުންދާ ދިޔުމަށް އަސަރެއް ނުކުރާނެކަމަށެވެ.