ޖޯ ބައިޑަން އުފަންވެވަޑައިގަތީ އެމެރިކާގެ ޕެންސިލްވޭނިއާ ސްޓޭޓުގައި އޮންނަ ސްކްރެންޓޮންގައި 1942ވަނަ އަހަރުގެ ނޮވެމްބަރު މަހުގެ 20 ވަނަ ދުވަހުއެވެ. ޕެންސިލްވޭނިއާއަށް އުފަންވެޑައިގެންނެވި ނަމަވެސް އެމަނިކުފާނުގެ ޙަޔާތުގެ ބޮޑުބައި ހޭދަކުރައްވާފައިވަނީ ޑެލަވެއާ ސްޓޭޓުގައެވެ. ޑެލަވެއާގެ މޭފީލްޑަށް ބައިޑަންގެ ޢާއިލާ ބަދަލުވެފައިވަނީ އެމަނިކުފާނުގެ އުމުރުފުޅުން 13 އަހަރުގައެވެ.
1968 ވަނަ އަހަރުގެ ތެރޭގައި ނިއު ޔޯކުގެ ސައިރަސިއުސް ޔުނިވަސިޓީގައި ޤާނޫނީ ވަކީލުކަމުގެ ޑިގްރީ ހާޞިލްކުރެއްވުމުގެ ކުރިން ޔުނިވަސިޓީގެ ތަޢުލީމް އުނގެނިވަޑައިގަތީވެސް ޑެލަވެއާ ސްޓޭޓުގައެވެ. ނިއު ޔޯކުގައި ޤާނޫނީ ވަކީލުކަން ކިޔަވާ ވަޑައިގަތުމަށްފަހު ބައިޑަންވަނީ ޤާނޫނީ ވަކީލެއްގެ ގޮތުގައި ދުވަސްކޮޅަކު މަސައްކަތްކުރައްވާފައެވެ. އެއަށްފަހު އެމަނިކުފާނުވަނީ ސިޔާސީ ދާއިރާއަށް ނިކުމެވަޑައިގެންފައެވެ.
1972ވަނަ އަހަރުގެ ޑިސެމްބަރު މަހުގެ 18ވަނަ ދުވަހަކީ ބައިޑަންގެ ހަޔާތުން ދުވަހަކުވެސް ފިލައިގެން ދާނެ ދުވަހެއް ނޫނެވެ. ހިތާމައިގެ ބޮޑު ރާޅެއް ބިންދާލީ ހީވެސް ނުކޮށް ތިއްބައެވެ. އެމަނިކުފާނުގެ ފުރަތަމަ އަނބިކަނބަލުންނާއި އެ ދެމަފިރިންގެ އެއް އަހަރުގެ އަންހެން ދަރިފުޅުވަނީ ޑެލަވެއާގައި ހިންގި ނުރައްކާތެރި އެކްސިޑެންޓެއްގައި މި ދުނިޔެއާއި ވަކިވެފައެވެ. އެ ހާދިޘާގައި ބައިޑަންގެ ފިރިހެން ދެ ދަރިކަލުން، ބައު އަދި ހަންޓާވެސްވަނީ ޒަޚަމްވެފައެވެ.
އޭގެ އެއް މަސް ދުވަސް ފަހުން، އެ އަހަރުގެ ނޮވެމްބަރު މަހުގެ 7ވަނަ ދުވަހުގައި ބައިޑަންވަނީ އެމެރިކާގެ ޤާނޫނު ހަދާ މަޖިލީހުގެ މަތިގެއަށް ހޮވިވަޑައިގެންފައެވެ. އޭރު އުމުރުފުޅަކީ 30 އަހަރެވެ. އެމަނިކުފާނު ވެގެން ދިޔައީ އެމެރިކާގެ ތާރީޚުގައިވެސް ޤާނޫނު ހަދާ މަޖިލީހުގެ މެންބަރުކަމަށް ހޮވިވަޑައިގެންނެވި ފަސްވަނައަށް އެންމެ އުމުރުން ހަގު މެންބަރަށެވެ. 1972ވަނަ އަހަރުގައި ޤަނޫނު ހަދާ މަޖިލީހަށް ހޮވިވަޑައިގަތުމަށްފަހު މެދުކެނޑުމެއްނެތި 36 އަހަރުވަންދެން އެމަނިކުފާނުވަނީ ސެނެޓުގެ މެންބަރުކަން ކުރައްވައިފައެވެ.
1977ވަނަ އަހަރުގައި ބައިޑަންވަނީ ދެވަނަ ކައިވެންޏެއް ކުރައްވާފައެވެ. މިހާރުގެ އަނބިކަނބަލުން، ޖިލް ބައިޑަންއާއި ކައިވެނި ބައްލަވައިގަތުމަށްފަހު އެ ދެމަފިރިންނަށް 1981ވަނަ އަހަރުގައި އަންހެން ދަރިކަނބަލަކު ލިބިވަޑައިގަތެވެ.
1987ވަނަ އަހަރުގައި ބައިޑަންވަނީ އެމެރިކާގެ ރައީސްކަމަށް ކުރިމަތިލައްވާފައެވެ. ނަމަވެސް އެމަނިކުފާނު އޭރު ދެއްވެވި ތަގުރީރެއްގެ ބައެއް ނަކަލުކޮށްފައިވާކަމަށް އަޑު ފެތުރުމާއިއެކު އެމަނިކުފާނު އެފަހަރުވަނީ ޑިމޮކްރަޓިކް ޕާޓީގެ ޕްރައިމަރީއާއި ހިސާބުން އިންތިޚާބުން ވަކިވެވަޑައިގެންފައެވެ.
އޭގެ 20 އަހަރުފަހުން 2007ވަނަ އަހަރުގައި ބައިޑަން އަނެއްކާވެސްވަނީ އެމެރިކާގެ ރައީސްކަމާއި ކުރިމަތިލައްވާފައެވެ. ސެނެޓުގައި ގިނަ އަހަރުތަކެއް ހޭދަކުރައްވާފައިވީ ނަމަވެސް ބައިޑަންގެ ކެމްޕެއިނަށް މާ ބޮޑު ތަރުހީބެއް އެފަހަރު ލިބިފައެއް ނުވެއެވެ. މުހިންމު ސްޓޭޓެއްކަމަށްވާ އަޔޯވާއިން އެމަނިކުފާނަށް އޮތް ތަރުހީބު އެކެއް އިންސައްތައަށްވުރެ ދަށްވުމުން އެމަނިކުފާނުވަނީ އިންތިޚާބުން ވަކިވެވަޑައިގެންފައެވެ.
އޭގެ މަސްތަކެއްފަހުން ހިލަރީ ކްލިންޓަނާއި ޑިމޮކްރަޓުންގެ ޕްރައިމަރީގައި ވާދަކުރެއްވުމަށްފަހު ބަރަކް އޮބާމާވަނީ ރިޔާސީ ޓިކެޓު ހޯއްދަވާފައެވެ. އޮބާމާގެ ރަނިން މޭޓެއްގެ ގޮތުގައި ޚިޔާރުކުރެއްވީ ބައިޑަންއެވެ. ދެބޭފުޅުން ކުރެއްވި ބުރަ ކެންޕެއިނަށްފަހު އެމެރިކާގެ ރައީސްކަމާއި ނައިބު ރައީސްކަމަށް އޮބާމާއާއި ބައިޑަން ހޮވިވަޑައިގަތެވެ. އަދި 2012ވަނަ އަހަރުގައި އިތުރު ދައުރަކަށް ދެބޭފުޅުންވަނީ ހޮވިވަޑައިގެންފައެވެ. ދެ ދައުރުގައިވެސް ނައިބު ރައީސްގެ ހައިޞިއްޔަތުން ބައިޑަންވަނީ މުހިންމު މަސައްކަތްތަކެއް ކުރައްވާފައެވެ.
2015ވަނަ އަހަރުގައި ބައިޑަންގެ ފިރިހެން ދަރިކަލުން ބައުވަނީ އަވަހާރަވެފައެވެ. އުމުރުން 46 އަހަރުގައި ބައު އަވަހާރަވީ ސިކުނޑީގެ ކެންސަރަށް ފަރުވާ ހޯއްދަވަމުން ދަނިކޮށެވެ. އޭނާގެ މަރާއިއެކު ބައިޑަންއަށްވަނީ ބޮޑު ހިތާމައެއް ލިބިވަޑައިގެންފައެވެ.
2016ވަނަ އަހަރުގެ ރިޔާސީ އިންތިޚާބުގައި ބައިޑަން ވާދަކުރައްވާކަމުގެ އަޑުތަކެއް އިންތިޚާބާއި ދިމާކޮށްވަނީ ފެތުރިފައެވެ. ނަމަވެސް 2015ވަނަ އަހަރުގެ އޮކްޓޯބަރު މަހުގައި ބައިޑަންވަނީ އިންތިޚާބުގައި ވާދަނުކުރައްވާނެކަމަށް އިޢުލާނުކުރައްވާފައެވެ. އޭނާގެ ނިންމުމާއި ދަރިކަލުން އަވަހާރަވުމުން ލިބުނު ހިތާމައާއި ގުޅުމެއްވާކަމަށް ބައިޑަން އޭރުވަނީ ވިދާޅުވެފައެވެ.
2017ވަނަ އަހަރުގެ ޖަނަވަރީ މަހުގެ 12ވަނަ ދުވަހުގައި ރައީސް އޮބާމާވަނީ ޕްރެސިޑެންޝަލް މެޑަލް އޮފް ފްރީޑޮމްގެ ޝަރަޕު ބައިޑަންއަށް އަރުވައިފައެވެ. އެ ޝަރަފު އެރުމުވަށް ވައިޓު ހައުސްގައި ބޭއްވި ޚާއްޞަ ރަސްމިއްޔާތުގައި އޮބާމާ ވިދާޅުވީ ބައިޑަންއަކީ އެމެރިކާގެ ތާރީޚުގައި ޤައުމުގެ ނައިބު ރައީސްކަންކުރެއްވި އެންމެ ރަނގަޅު ނައިބު ރައީސްކަމަށެވެ.
އޮބާމާގެ ދައުރު ހަމަވުމަށްފަހު ޤައުމުގެ ވެރިކަމާއި ޑޮނަލްޑް ޓްރަންޕު ޙަވާލުވެވަޑައިގަތުމުން ބައިޑަން ދިޔައީ ރައީސްގެ ގޮތުގައި ޓްރަންޕު ކުރައްވަމުންދިޔަ މަސައްކަތްތަކަށް ފާޑުވިދާޅުވަމުންނެވެ. 2016ވަނަ އަހަރުގެ އިންތިޚާބުގައި ވާދަނުކުރުމަށް ނިންމެވި ނިންމެވުމަކީ އެންމެ ރަނގަޅު ނިންމުންތޯ އެމަނިކުފާނުގެ އަމިއްލަ ނަފްސަށް ބައެއް ފަހަރު ސުވާލު ކުރައްވާކަމަށްވެސް ބައިޑަންވަނީ ދެ ފަހަރަކު ވިދާޅުވެފައެވެ. 2017ވަނަ އަހަރުގެ މާރިޗު މަހުގައި އޯޕްރާ ވިންފްރޭއަށް ދެއްވި ބަސްދީގަތުމެއްގައި ބައިޑަންވަނީ 2016ވަނަ އަހަރުގެ އިންތިޚާބު އެމަނިކުފާނަށް ކާމިޔާބު ކުރެވުނީސްކަމަށް ވިދާޅުވެފައެވެ.
2020ވަނަ އަހަރުގެ ރިޔާސީ އިންތިޚާބުގައި ވާދަކުރައްވާނެކަމަށް ބައިޑަން އިޢުލާނުކުރައްވާފައިވަނީ 2019ވަނަ އަހަރުގެ އޭޕްރިލް މަހުގެ 25ވަނަ ދުވަހުގައެވެ. ޑިމޮކްރަޓިކް ޕާޓީގެ ޕްރައިމަރީ ކާމިޔާބުކުރައްވާ އެމަނިކުފާނުގެ ރަނިން މޭޓެއްގެ ގޮތުގައި ކަމާލާ ހެރިސް ހަމަޖައްސަވާފައިވާކަން ބައިޑަން އިޢުލާނުކުރެއްވީ 2020ވަނަ އަހަރުގެ އޮގަސްޓު މަހުގެ ތެރޭގައެވެ. ނަސްލީ ތަފާތުކުރުންތައް އެމެރިކާގައި ބޮޑުވެ މުޒާހަރާތައް ކުރަމުންދިޔަ ދަނޑިވަޅެއްގައި ތަމަޅަ އަދި ކަޅު ނަސްލަށް ނިސްބަތްވެވަޑައިގަންނަވާ ހެރިސް ބައިޑަންގެ ރަނިން މޭޓުގެ ގޮތުގައި ޚިޔާރުކުރެއްވުމަކީ ބުއްދިވެރި ނިންމެވުމެއްކަމަށް ގިނަ ފަރާތްތަކުން ދިޔައީ ބުނަމުންނެވެ. ޑިމޮކްރަޓުންގެ ރަސްމީ ރިޔާސީ ކެންޑިޑޭޓުގެ ގޮތުގައި ބައިޑަންގެ ނަން އިޢުލާނުކޮށްފައިވަނީ އޮގަސްޓު މަހުގެ ތެރޭގައެވެ.
މިދިޔަ ނޮވެމްބަރު މަހުގެ 3ވަނަ ދުވަހު ބޭއްވި އެމެރިކާގެ ރިޔާސީ އިންތިޚާބުގައި އޭރު ވެރިކަމުގައި ހުންނެވި ރައީސް ޑޮނަލްޑް
ޓްރަންޕާ ވާދަކުރައްވާ ބައިޑަންވަނީ ބޮޑު ތަފާތަކުން ކާމިޔާބު ހޯއްދަވާފައެވެ. ބައިޑަން ވަނީ އިންތިޚާބު ކާމިޔާބުކުރެއްވުމަށް ބޭނުންވާ 270 އިލެކްޓޯރަލް ވޯޓު ޔަޤީންކުރައްވާ ޖުލްމަ 306 އިލެކްޓޯރަލް ވޯޓު ހޯއްދަވާފައެވެ. ރައީސް ޓްރަންޕަށް ލިބިވަޑައިގެންފައިވަނީ 232 އިލެކްޓޯރަލް ވޯޓެވެ.
ޢާންމުންގެ މަގުބޫލު ވޯޓަށް ބަލާއިރު ބައިޑަންއަށްވަނީ 81 މިލިއަނަށްވުރެ ގިނަ ވޯޓު ލިބިވަޑައިގެންފައެވެ. އެއީ އެމެރިކާގެ ރިޔާސީ އިންތިޚާބެއްގައި ވާދަކުރެއްވި ކެންޑިޑޭޓަކަށް މިހާތަނަށް ލިބިވަޑައިގެންފައިވާ އެންމެ ގިނަ ވޯޓުއެވެ.
ނޮވެމްބަރު މަހުގެ އިންތިޚާބުގައި ބައިޑަންވަނީ އިންތިޚާބަށް އެންމެ މުހިންމު ސްޓޭޓުތަކުގެ އަޣުލަބިއްޔަތުވެސް ހޯއްދަވާފައެވެ. އެގޮތުން ޕެންސިލްވޭނިއާ، ވިސްކޮންސިން އަދި މިޝިގަން ސްޓޭޓުވެސް ކާމިޔާބުކުރައްވާފައިވަނީ ބައިޑަންއެވެ. އޭގެ އިތުރުން ފާއިތުވި 20 އަހަރު ދުވަހު ރިޕަބްލިކަން ޕާޓީން ކާމިޔާބު ކުރަމުންދިޔަ އެރިޒޯނާއާއި ޖޯޖިއާގެ އަޣުލަބިއްޔަތުވެސް ހޯއްދެވީ ބައިޑަންއެވެ.
އުމުރުފުޅުން 78 އަހަރުގެ ޖޯ ބައިޑަންއަކީ އެމެރިކާގެ ރައީސްކަމާ މިހާތަނަށް ޙަވާލުވެވަޑައިގަންނަވާ ޢުމުރުން އެންމެ ދޮށީ ބޭފުޅާއެވެ. ބައިޑަންވަނީ އެމަނިކުފާނުގެ ވެރިކަމުގައި އެމެރިކާއަށް ހެޔޮ ބަދަލުތައް ގެންނަވާނެކަމަށް ވަޢުދުވެވަޑައިގެންފައެވެ.