2018 ވަނަ އަހަރުގެ އޮކްޓޯބަރުމަހު ތުރުކީވިލާތުގެ އިސްތަންބުލްގައި ހުންނަ ސަޢުދީ ޢަރަބިއްޔާގެ ކޮންސިއުލޭޓުގައި އަނިޔާވެރިކޮށް މަރާލި ސަޢުދީ ޢަރަބިއްޔާގެ ނޫސްވެރިއެއްކަމަށްވާ ޖަމާލް ޚާޝޫޤްޖީގެ މަރުގެ ރިޕޯޓު އެމެރިކާގެ ޤަނޫނުހަދާ މަޖިލީހަށް އާންމުކުރައްވާނެކަމަށް އެމެރިކާގެ އިންތިޚާބީ ރައީސް ޖޯ ބައިޑަންގެ ޑިރެކްޓަރ އޮފް ނޭޝަނަލް އިންޓެލިޖެންސްގެ މަޤާމަށް ޢައްޔަނުކުރައްވާ ފަރާތުން ވިދާޅުވެއްޖެއެވެ.
މިދިޔަ އަހަރުގެ ޑިސެމްބަރު މަހުގެ ތެރޭގައި އެމެރިކާގެ ޤާނޫނުހަދާ މަޖިލީހުންވަނީ 30 ދުވަހުގެ ތެރޭގައި ޖަމާލް ޚާޝޫޤްޖީގެ މަރުގެ ރިޕޯޓު އާންމުކުރުމަށް ޝަރުތުކޮށްފައިވާ ޑިފެންސް ބިލެއް ފާސްކޮށްފައެވެ.
ބައިޑަންގެ ވަޒީރުންގެ މަޖިލީހަށް ރުހުން ދިނުމަށް އެމެރިކާގެ ޤަނޫނުހަދާ މަޖިލީހުގެ މަތިގޭގައި ބޭއްވި ބައްދަލުވުމެއްގައި ވާހަކަދައްކަވަމުން އެ މަޖިލީހުގެ މެންބަރެއްކަމަށްވާ ރޮން ވައިޑެން، ވިދާޅުވީ މިހާރުގެ ސަރުކާރުން ގެންގުޅޭ އާދަޔާޚިލާފަށް ކަންކަން ސިއްރުކުރުމުގެ ސިޔާސަތު ވަގުތުން ވަގުތަށް ބަދަލުކުރުމުގެ ފުރުޞަތު ޑިރެކްޓަރ އޮފް ނޭޝަނަލް އިންޓެލިޖެންސްގެ މަޤާމަށް ހުށަހަޅުއްވާފައިވާ އެވްރިލް ހައިންސައަށް ލިބިފައިވާކަމަށެވެ. އެކަމަނާއަށް ޑިރެކްޓަރ އޮފް ނޭޝަނަލް އިންޓެލިޖެންސްގެ މަޤާމު ކަށަވަރުވެއްޖެނަމަ ޚާޝުޤްޖީގެ މަރާއިގުޅޭގޮތުން ތައްޔާރުކޮށްފައިވާ ރިޕޯޓު އާންމު ކުރައްވާނެތޯ އޭނާ ހައިންސްގެ އަރިހުން އެއްސެވިއެވެ. ހައިންސްގެ ޖަވާބުގައި ވިދާޅުވީ އެ ރިޕޯޓު އާންމު ކުރައްވާނެކަމަށާއި ޤާނޫނާއި އެއްގޮތަށް ޢަމަލުކުރައްވާނެކަމަށެވެ.
ވޮޝިންޓަން ޕޯސްޓުގެ ކޮލަމިސްޓެއްގެ ގޮތުގައި މަސައްކަތްކުރި ޚާޝޫޤްޖީއަކީ ސަޢުދީ އަރަބިއްޔާގެ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުކިޔަމުންދިޔަ ނޫސްވެރިއެކެވެ. އިސްތަންބުލްގައި ހުންނަ ސަޢުދީ ޢަރަބިއްޔާގެ ކޮންސިއުލޭޓުގައި އަނިޔާވެރިގޮތަކަށް އޭނާ މަރާލާފައިވަނީ ސަޢުދީ ޢަރަބިއްޔާގެ އޭޖެންޓުންތަކެކެވެ. ޚާޝޫޤްޖީ މަރާލި ދުވަހު ކޮންސިއުލޭޓު ހުންނަ އިމާރާތަށް އޭނާ ވަދެފައިވަނީ ކައިވެނިކުރުމަށް ބޭނުންވާ ޙުއްދަތަކެއް ހޯދުމަށެވެ. އިންސާނީ ހައްޤުތަކަށް މަސައްކަތްކުރާ ޖަމުޢިއްޔާތަކާއި އދގެ މާހިރުންވަނީ ޚާޝޫޤްޖީ މަރާލި ހާދިޘާ ހަރުކަށި އިބާރާތުން ކުށްވެރިކޮށްފައެވެ. އަދި އެމެރިކާގެ ޤާނޫނުހަދާ މަޖިލީހުގެ މެންބަރުންވަނީ ޚާޝޫޤްޖީގެ މަރުގެ ފަހަތުގައިވަނީ ކޮންބައެއްކަން ހޯދުމަށް ރައީސް ޑޮނަލްޑް ޓްރަންޕުގެ ސަރުކާރުގައި އެދިފައެވެ.
2018 ވަނަ އަހަރުގެ ނޮވެމްބަރުމަހުގެ ތެރޭގައި އެމެރިކާގެ ނޫސް އިދާރާތަކުން ވަނީ ޚާޝޫޤްޖީ މަރާލުމުގެ އަމުރު ދީފައިވަނީ ސަޢުދީ ޢަރަބިއްޔާގެ ވަލީ އަހުދު މުޙައްމަދު ބިން ސަލްމާންކަމަށް އެމެރިކާގެ ޖާސޫސީ އިދާރާ، ސީއައިއޭއިން ނިންމާފައިވާކަމަށް ރިޕޯޓުކޮށްފައެވެ. އެ ތުހުމަތުތަކަށް ވަލީ އަހުދު މުޙައްމަދު ބިން ސަލްމާން ދެކޮޅު ހައްދަވައެވެ. ވަލީ އަހުދު މުޙައްމަދު ބިން ސަލްމާންއާއި ދެކޮޅަށް އެފަދަ ތުހުމަތުތައް ކުރެވެމުން ދިޔަ ނަމަވެސް ރައީސް ޓްރަންޕުވަނީ ސަޢުދީ ޢަރަބިއްޔާއަށާއި މުޙައްމަދު ބިން ސަލްމާންއާއިއެކު ގުޅުން ބަދަހިކުރައްވާފައެވެ.
ޓްރަންޕުގެ ސަރުކާރުންވަނީ ޤަނޫނުން އެކަމަށް ލާޒިމްކުރާ ކަމުގައި ވިޔަސް ޚާޝޫޤްޖީގެ މަރާގުޅޭ ރިޕޯޓު ހާމަކުރުމަށް ދެކޮޅުހަދާފައެވެ. 2019 ވަނަ އަހަރުގެ ޑިފެންސް ބިލުގައި ވަނީ ޚާޝޫޤްޖީގެ މަރުގެ މައްސަލައިގައި ސަޢުދީ ޢަރަބިއްޔާގެ ކުރީގެ އަދި މިހާރުގެ އެއްވެސް ރަސްމީ ފަރާތެއްގެ އަތެއްވާނަމަ އެކަމާއިގުޅޭ ހެކި ހުށަހެޅުމަށް ނޭޝަނަލް އިންޓެލިޖެންސް އޮފީހުގެ މައްޗަށް ލާޒިމްކޮށްފައެވެ. ނަމަވެސް ސަރުކާރުގެ ފަރާތުން ޤާނޫނުހަދާ މަޖިލީހުގައި ބުނީ އެ މަޢުލޫމާތު އާންމުކޮށްފިނަމަ ނޭޝަނަލް އިންޓެލިޖެންސް އޮފީހަށް މަޢުލޫމާތު ދިން ފަރާތްތަކާއި އެ އިދާރާއިން މަޢުލޫމާތު ހޯދާފައިވާ ގޮތް ހާމަވާނެކަމަށެވެ.