މިދިޔަ ހުކުރު ދުވަހު އިންޑޮނޭޝިޔާގެ ސުލާވެސީއަށް އައި ބިންހެލުމުގައި މަރުވި މީހުންގެ ޢަދަދު 81އަށް އަރައިފިއެވެ. އިންޑޮނޭޝިޔާގެ ކާރިޘާތަކާއިބެހޭ އިދާރާއިން ބުނީ މިދިޔަ ހަފުތާގައި އައި ބާރުގަދަ ބިންހެލުމުގެ ސަބަބުން މިހާތަނަށް 81 މީހުން މަރުވެފައިވާކަމަށާއި، 19،000އަށްވުރެ ގިނަ މީހުންނަށް ގެދޮރު ދޫކޮށް ދިއުމަށް މަޖުބޫރުވެފައިވާކަމަށެވެ.
ރެކްޓަރ މިންގަނޑުން 6.2ގެ ބާރުމިނުގައި އައި ބިންހެލުން އުފެދިފައިވަނީ ބިމުގެ 10 ކިލޯމީޓަރު އަޑިންނެވެ. ފަތިހުގެ ވަގުތެއްގައި އައި ބިންހެލުމުގެ ސަބަބުން ގިނަ ޢަދަދެއްގެ އިމާރާތްތައް ވެއްޓި، މީހުންވަނީ އިމާރާތުގެ ދަށުވެފައެވެ. މީހުން ސަލާމަތްކުރުމުގެ މަސައްކަތް އަދިވެސް ދަނީ ކުރިއަށެވެ. އިންޑޮނޭޝިޔާގެ މޫސުމާއިބެހޭ އިދާރާއިންވަނީ ހުކުރު ދުވަހުގެ ބިންހެލުމަށްފަހު ބާރުގަދަ ލޮޅުންތައް އަދިވެސް އައުން އެކަށީގެންވާކަމުގެ އިންޒާރުދީފައެވެ. އެ ލޮޅުންތަކުގެ ސަބަބުން ސުނާމީއެއް އުފެދިދާނެކަމުގެ ބިރު އޮތުމާއެކު އައްސޭރިފަށުގައިވާ ސަރަޙައްދުތަކުގައި މީހުން ނުތިބުމަށް އެ އިދާރާއިންވަނީ އިލްތިމާސްކޮށްފައެވެ.
ކާރިޘާތަކާއިބެހޭ އިދާރާގެ ތަރުޖަމާނު ރަދިތުޔާ ޖާތީ ވިދާޅުވީ ބިންހެލުމުގެ ސަބަބުން 250އަށްވުރެ ގިނަ މީހުން ޒަޚަމްވެފައިވާކަމަށެވެ. އަދި ގޭގެއާއި ވިޔަފާރިކުރާ މަރުކަޒަކަށާއި ހަސްފަތާލަކަށާއި ބައެއް ހޮޓާތަކަށް ބިންހެލުމުގެ ސަބަބުން ބޮޑެތި ގެއްލުންތައް ލިބިފައިވާކަމަށް އޭނާ ވިދާޅުވިއެވެ.
އެތައް ހާސް ބަޔަކު ގެދޮރު ދޫކޮށް އެހެން ސަރަޙައްދުތަކަށް ދިޔުމަށް މަޖުބޫރުވެފައިވާ މި ދަނޑިވަޅުގައި، އެހެން ސަރަޙައްދުތަކަށް ގެންދާ މީހުންގެ މެދުގައި ކޯވިޑް-19 ފެތުރުނަ ނުދިނުމަށްވެސް އިންޑޮނޭޝިޔާގެ އިދާރާތަކުންދަނީ މަސައްކަތްކުރަމުންނެވެ. އެގޮތުން ކޯވިޑް-19 ޖެހިފައިވޭތޯ ނުވަތަ ނޫންތޯ ބެލުމަށް އެހެން ސަރަޙައްދުތަކަށް ބަދަލުކުރާ މީހުންގެ ރެޕިޑް އެންޓިޖެން ތަހުލީލުތައްދަނީ ކުރަމުންނެވެ.
ޖިއޯގްރަފީގެ ގޮތުން އިންޑޮނޭޝިޔާ އޮންނަ ސަރަޙައްދުގެ ސަބަބުން އެ ޤައުމަށް ބާރުގަދަ ބިންހެލުންތައް އައުމަކީ ވަރަށް އާންމު ކަމެކެވެ. 2018ވަނަ އަހަރުގައި އައި ރެކްޓަރ މިންގަނޑުން 7.5ގެ ބާރުގަދަ ބިންހެލުމެއްގެ ސަބަބުން ވަރުގަދަ ސުނާމީއެއްވަނީ އުފެދިފައެވެ. އެ ހާދިޘާގައި 4،300އަށް ވުރެ ގިނަ މީހުންވަނީ މަރުވެފައި ނުވަތަ ވީނުވީއެއް ނޭނގި ގެއްލިފައެވެ. އޭގެ އިތުރުން 2004ވަނަ އަހަރުގެ ޑިސެމްބަރު މަހުގެ 26ވަނަ ދުވަހުގައި އައި ރެކްޓަރ މިންގަނޑުން 9.1ގެ ބާރުގަދަ ބިންހެލުމެއްގެ ސަބަބުން އުފެދުނު ސުނާމީގައި އެ ސަރަޙައްދުން 220،000 މީހުންވަނީ މަރުވެފައެވެ. އޭގެ ތެރެއިން 170،000 މީހުން މަރުވެފައިވަނީ އިންޑޮނޭޝިޔާއިންނެވެ.
މި ހަފުތާގައި އައިސްފައިވާ ބަރުގަދަ ބިންހެލުމުގެ އިތުރުން، މި މަހުގެ ނުވަވަނަ ދުވަހުގައި އިންޑޮނޭޝިޔާގެ މަތިންދާ ބޯޓެއް ވެއްޓުމުގެ ހިތާމަވެރި ހާދިޘާއެއްވެސް އެ ޤައުމުގައިވަނީ ހިންގާފައެވެ. އެ ހާދިޘާގައި އެ ބޯޓުން ދަތުރުކުރި 62 މީހުންވަނީ މަރުވެފައެވެ. އޭގެ އިތުރުން އެ ޤައުމުގެ ޖާވާގައި ޗަކަފޭބުމުގެ ހާދިޘާތަކެއް ހިންގާ ބައެއް މީހުންގެ ފުރާނަވަނީ ގެއްލިފައެވެ. އެ ޤައުމުގައި އޮންނަ ދެ އަލިފާން ފަރުބަދަކަމުގައިވާ މެރާޕީއާއި ސެމެރުވެސް ފާއިތުވި ކުޑަ ދުވަސްކޮޅުގެ ތެރޭގައިވަނީ ގޮވައިފައެވެ. އޭގެ އިތުރުން ބޯ ވާރޭގެ ސަބަބުން އިންޑޮނޭޝިޔާގެ ބޯނިއޯ އައިލޭންޑުގައިވަނީ ފެންބޮޑުވުމުގެ ހާދިޘާތައް ހިންގާފައެވެ. އެ ހާދިޘާތަކުގައިވެސް 15އަށްވުރެ ގިނަ މީހުންވަނީ މަރުވެފައެވެ.