ލޯކަލް ކައުންސިލް އިންތިހާބުގައި ވާދަކުރުމަށް އިތުރު ފުރުސަތެއް ހުޅުވާލުމުގެ އަމުރަކަށް އެދި ހުށައެޅި ދުސްތޫރީ މައްސަލައިގެ އަޑުއެހުންތައް މާދަމާ ހައިކޯޓުގައި ފަށަން ތާވަލުކޮށްފިއެވެ.
މި މައްސަލަ ކޯޓަށް ހުށައެޅީ މުހައްމަދު ތަސްލީމު ކިޔާ މީހެކެވެ. އޭނާ ހުށައެޅި މައްސަލާގައި އެދިފައިވަނީ ކައުންސިލްތަކުގެ އިންތިޚާބަށް ކުރިމަތިލުމުގެ އިތުރު ފުރުސަތެއް ހުޅުވާލުމަށް އިލެކްޝަންސް ކޮމިޝަންގެ މައްޗަށް އަމުރުކޮށްދިނުމަށެވެ. އަދި ކައުންސިލް އިންތިޚާބުގެ ހާއްސަ ޤާނޫނުގެ ތިންވަނަ މާއްދާގެ ހ ބާތިލުކޮށްދިނުމަށްވެސް ވަނީ އެދެފައެވެ.
މި މައްސަލާގައި ބާތިލުކުރުމަށް އެދިފައިވާ ޤާނޫނުގެ ނަމްބަރުގައި ބުނެފައިވަނީ ލޯކަލް ކައުންސިލްތަކުގެ
އިންތިޚާބު 2020 ފަސްކުރެވުނު ނަމަވެސް، އެ އިންތިޚާބުގައި ވާދަކުރާނީ، އެ އިންތިޚާބުގައި ވާދަކުރާނެ ކެންޑިޑޭޓުން ކަމަށް، 6 މާރިޗު 2020 ގައި އިލެކްޝަންސް ކޮމިޝަނުން ކަނޑައަޅައި، ޢާންމުކޮށްފައިވާ ކެންޑިޑޭޓުންކަމަށެވެ.
ހާއްސަ ޤާނޫނުގެ ދަށުން އަލުން ކުރިމަތިލުމުގެ ފުރުސަތު ނެތްނަމަވެސް ނަން އަނބުރާ ގެންދިޔުމުގެ ފުރުސަތު މި ޤާނޫނުން ލިބިދެއެވެ.
އިލެކްޝަންސް ކޮމިޝަނުން ހިސާބުތަކަށް ބަލާއިރު އިންތިޚާބުގައި ވާދަކުރަން ކުރިމަތިލީ ކެނޑިޑޭޓުންގެ ތެރެއިން މިހާތަނަށް 95 ކެނޑިޑޭޓަކުވަނީ ނަން ނަގާފައެވެ. 6 މާރިޗުގައި ބޭއްވުމަށް ތައްޔާރުވަމުންދިޔަ އިންތިޚާބުގައި ވާދަކުރުމަށް 2435 ކެނޑިޑޭޓަކުވަނީ ކުރިމަތިލާފައެވެ. މިހާރު އިންތިޚާބުގައި ވާދަކުރަން އޮތީ 2338 ކެނޑިޑޭޓުންގެ ނަމެވެ.
މިހާތަނަށް ނަން އަނބުރާ ނެގި ކެނޑިޑޭޓުންނަށް ބަލާއިރު އެންމެ ގިނައިން ނަން އަނބުރާ ގެންގޮސްފައިވަނީ ވެރިކަން ކުރާ މައި ޕާޓީ އެމްޑީޕީގެ ކެނޑިޑޭޓުންނެވެ. އެ ޕާޓީގެ 34 ކެނޑިޑޭޓުންވަނީ ނަން އަނބުރާ ނަގާފައެވެ. ދެން ނަން ނެގި ކެނޑިޑޭޓުންގެ ތެރޭގައި ހިމެނެނީ އިދިކޮޅު ޕީޕީއެމްގެ 16 ކެނޑިޑޭޓަކާއި ޖޭޕީގެ 8 ކެނޑިޑޭޓަކާއި އަމިއްލަ ގޮތުން ވާދަކުރާ 36 ކެނޑިޑޭޓުންނެވެ.
އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކަށް ކުރިމަތިލި ކެނޑިޑެޓުންގެ ތެރެއިން މިހާތަނަށް 58 ކެނޑިޑޭޓަކުވަނީ ނަން އަނބުރާ ގެންގޮސްފައެވެ. އޭގެތެރޭގައި ހިމެނޭނީ އެމްޑީޕީގެ 36 ކެނޑިޑޭޓަކާއި އަމިއްލަ ގޮތުން ވާދަކުރާ 19 ކެނޑިޑޭޓަކާއި ޕީޕީއެމްގެ ޓިކެޓްގައި ވާދަކުރި 3 ކެނޑިޑޭޓުންނެވެ. އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ އިންތިޚާބުގައި ވާދަކުރުމަށް 1817 ކެނޑިޑޭޓަކުވަނީ ނަން ހުށައަޅާފައެވެ. މިހާރު އޮތީ 1751 ނަމެވެ.
އަންނަ އޭޕްރިލް މަހުގެ 3 ވަނަ ދުވަހު ކައުންސިލްތަކުގެ އިންތިޚާބު ބޭއްވުމަށް އިލެކްޝަންސް ކޮމިޝަނުން އަންނަނީ މަސައްކަތް ކުރަމުންނެވެ. އަދި އެކަމަށް ޤާނޫނަށް ބޭނުންވާ އިސާލާހު ގެނައުމުގައި މަސައްކަތް ރައްޔިތުން މަޖިލީހުން މިއަދު ވަނީ ފަށާފައެވެ.