މިފެށޭ
އަހަރު ސްކޫލްތަކުގެ ގްރޭޑް އެކަކަށް ވަންނަން ބޭނުންވާ ކުދިންނާއި އެއްސްކޫލުން
އަނެއް ސްކޫލަށް ބަދަލުވާކުދިންނަށް ޖާގަ ލިބޭ ސްކޫލްތަކުގެ މައުލޫމާތު
ކުރިޔަށްއޮތް ހަފްތާއެއްހާ ދުވަހުގެ ތެރޭގައި ކުދިންނަށާ ބެލެނިވެރިންނަށް
ފޯރުކޮށްދެވޭވަރުވާނެކަމަށް އެޑިއުކޭޝަން މިނިސްޓަރ ވިދާޅުވެއްޖެއެވެ.
އެޑިއުކޭޝަން
މިނިސްޓަރ ޑރ އައިޝަތު ޝިޔާމް މީޑިޔާއަށް މައުލޫމާތުދެއްވަމުން ވިދާޅުވީ
ކުރިޔަށްއޮތް އަހަރު މާލޭ ސަރަހަދުގެ ސްކޫލްތަކުގައި ކިޔަވުމަށް ބޭނުންވާ ހުރިހާ
ކުދިންނަށްވެސް ޖާގާލިބިގެންދާނެކަމަށާ ނަމަވެސް އެންމެ ބޭނުންވާ ސްކޫލަކުން
ޖާގަނުލިބުން އެކަށީގެންވާކަމަށެވެ.
މިނިސްޓަރ ވިދާޅުވީ އަންނަ އަހަރު މުޅި
ރާއްޖޭގައި ގްރޭޑް އެކަކަށް ސަރުކާރު ސްކޫލްތަކަށް ވަންނަން ބޭނުންވާ ދެހާސް ދުއިސައްތަ
ކުދިން އެބަތިބިކަމަށެވެ. މީގެ ތެރެއިން އެކުދިން ވަންނަން ބޭނުންވާ ސްކޫލްތަކުގެ
މައުލޫމާތު އެއްކުރެވި އެކުދިންނަށް ސްކޫލްތަކުން ޖާގަލިބޭގޮތް ކުރިޔަށް އޮތް
ހަފްތާއެއްހާ ދުވަހުގެ ތެރޭގައި ކުދިންގެ ބެލެނިވެރިންނާއި ސްކޫލްތަކަށްވެސް
އެންގޭނެކަމަށް މިނިސްޓަރ އައިޝަތު ޝިހާމް ވިދާޅުވިއެވެ.
މީގެ އިތުރުން އަންނަ
އަހަރު ގްރޭޑް ހަތެއް ނިންމާ ސަރުކާރު ސްކޫލްތަކުގެ ގްރޭޑް އަށަކަށް ވަންނަން އެދޭ
އަށާރަ ސަތޭކަ ފަންސާސް ފަސްކުދިން ތިބި ކަމަށާއި، މިކުދިންގެ ތެރެއިންވެސް އެހެން
ސްކޫލްތަކަށް ބަދަލުވާން އެދޭ ކުދިންގެ މައުލޫމާތު އެއްކުރެވި، އެކުދިން ގުޅޭނެ
ސްކޫލްތައް މި ހަފްތާ ނިމުމުގެ ކުރިން އެކުދިން މިހާރު ތިބި ސްކޫލްތަކާ އަދި
ބަދަލުވާ ސްކޫލްތަކަށް މި ހަފްތާ ނިމުމުގެ ކުރިން އެމައުލޫމާތު ޙިއްޞާކުރެވޭކަމަށް
އެޑިއުކޭޝަނުން މައުލޫމާތުދެއެވެ. މިނިސްޓަރ އައިޝަތު ޝިހާމް ވިދާޅުވީ ގްރޭޑް
އަށަކަށް ސްކޫލްތަކަށް ބަދަލުވުމަށް ކުދިންނަށް
ސްކޫލްތަކުން ޖާގަދޭއިރު ޖާގަދޭނީ އެސްކޫލެއްގައި މަޑުކުރަން ބޭނުންވާ
ކުދިންނަށް ޖާގަދިނުމަށްފަހުކަމަށެވެ.
މިނިސްޓަރ
ވިދާޅުވީ މިމައުލޫމާތުތައް މިހާރު އަވަހަށް ޙިއްޞާކުރުމުގެ ބޭނުމަކީ މިއަހަރު
ސްކޫލްތައް ބަންދުވެ ޗުއްޓީ ލިބެންވާއިރަށް ކުދިން ދެން ގުޅޭ ސްކޫލްތަކަށް ދިއުމަށް
ޔުނިފޯމާއި އެހެނިހެން ތަކެތި ހޯދާ ތައްޔާރުކުރުމަށް ދުރާލާ ފުރުޞަތުދީ ދަރިވަރުންނާއި
ބެލެނިވެރިންނަށް މިކަމުގައި ލުއިފަސޭހަކޮށްދިނުންކަމަށެވެ.