ޤަތަރާއިއެކު ސަޢުދީ ޢަރަބިއްޔާއިން ޙިއްޞާކުރާ އެއްގަމާއި ކަނޑާއި ވައިގެ ސަރަޙައްދީ ރޮނގުތައް ހުޅުވާލާނެކަމަށް އިޢުލާނުކޮށްފިއެވެ.
ނިރުބަވެރި ޖަމާޢަތްތަކަށް އެހީތެރިވެ އީރާނަށް އެއްބާރުލުންދޭކަމަށް ބުނެ ގަލްފުގެ ބާރުތައްކަމަށްވާ ސަޢުދީ ޢަރަބިއްޔާއާއި ޔޫއޭއީއާއި ބަޙުރައިނުންވަނީ 2017ވަނަ އަހަރުގެ ޖޫން މަހު ޤަތަރާއެކު އޮންނަ ސިޔާސީ އަދި ވިޔަފާރީގެ ގުޅުންތައް ކަނޑާލާފައެވެ. އެއާއިއެކު އެ ޤައުމުތަކުން ޤަތަރާއިއެކު ޙިއްޞާކުރާ ސަރަޙައްދީ ރޮނގުތައްވަނީ ބަންދުކޮށްފައެވެ. އެ ޤައުމުތަކާއި ބައިވެރިވެގެން މިޞްރުންވެސް ޤަތަރާ ގުޅުން ކަނޑާލިއެވެ. އެހެންނަމަވެސް އެ ތުހުމަތުތައް ޤަތަރުން ދޮގުކުރެއެވެ. އެ މައްސަލަ ޙައްލުކުރުމަށްޓަކައި ކުވައިތުންދަނީ މެދުވެރިއެއްގެ ދަޢުރު ޢަދާކުރަމުންނެވެ.
ކުވައިތުގެ ޚާރިޖީ ވަޒީރު، އަޙްމަދު ނާސިރު އައްސަބާޙްވަނީ ކުވައިތުގެ އަމީރު، ޝައިޚު ނަވާފްގެ ހުށަހެޅުމަށް، ސަޢުދީ ޢަރަބިއްޔާގެ އެއްގަމާއި ކަނޑާއި ވައިގެ ސަރަޙައްދީ ރޮނގުތައް ޤަތަރަށް ހުޅުވައިލުމަށް ސަޢުދީ ޢަރަބިއްޔާއިން އެއްބަސްވެފައިވާކަމަށް އިޢުލާނުކުރައްވާފައެވެ.
އިއްޔެއިން ފެށިގެން ސަރަޙައްދީ ރޮނގުތައް އަލުން ހުޅުވާނޭކަމަށް އޭނާ ވިދާޅުވިއެވެ. ކުވައިތުގެ ޚާރިޖީ ވަޒީރު ނެރެއްވި ބަޔާނެއްގައި ވިދާޅުވީ ކުވައިތުގެ އަމީރުވަނީ ޤަތަރުގެ އަމީރާއި ސަޢުދީ ޢަރަބިއްޔާގެ ވަލީ އަހުދާއިއެކު މަޝްވަރާތައް ކުރައްވާފައިވާކަމަށް ހާމަކުރައްވާފައެވެ. އެ މަޝްވަރާތަކުގައި، ހުރިހާ ޤައުމަކުންވެސް އަލުން ގުޅުން ބަދަހިކުރުމަށް އެދޭކަން ހާމަކޮށް އެކަމާވަނީ މަޝްވަރާކޮށްފައެެވެ. އަދި ކުރިއަށް އޮތް ޖީސީސީ ސަމިޓަށް މައްސަލައިގައި ހިމެނޭ ޤައުމުތަކުން އެއްވެ، އެ ޤައުމުތަކުގެ މެދުގައި އޮތް ގުޅުން ރަނގަޅުކުރުމާއިގުޅޭ ބަޔާނެއްގައި ސޮއިކުރުމަށް ނިންމާފައިވާކަމަށްވަނީ ބުނެފައެވެ.