ސާބިއާ ގައުމީ ފުޓްބޯޅަ ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތްކޮށްފައިވާ ރިސްޓޯ ވިޑަކޮވިޗް މާޒިޔާގެ ކޯޗުކަމާ ހަވާލުވެއްޖެއެވެ.
އުމުރުން 51 އަހަރުގެ ރިސްޓޯ އޭޝިއާގައި ކޯޗުކޮށްދޭ މިއީ ދެ ވަނަ ޓީމެވެ. އޭނާ އެންމެ ފަހުން ތިން އަހަރުވަންދެން މަސައްކަތްކުރީ ފިލިޕީންސްގެ ޗެމްޕިއަން ސެރެސްގައެވެ. އެ ތިން އަހަރު ވެސް އޭނާ ވަނީ ސެރެސް އަށް ފިލިޕީންސް ލީގުގެ ޗެމްޕިއަންކަން ހޯދައިދީފައެވެ.
ހެޑް ކޯޗެއްގެ ގޮތުގައި ރިސްޓޯ ކެރިއަރު ފެށީ 2009 ވަނަ އަހަރު އަންދަލުސް ސަރަހައްދުގެ ޓީމު އެސީޔާ އިންނެވެ. އޭގެ ފަހުން 2016 ވަނަ އަހަރާ ހަމައަށް އޭނާ ވަނީ ސްޕެއިނުގެ ކާޑިޒް އާއި ރެއާލް ބެޓިސްގެ ބީ ޓީމުގެ އިތުރުން ހޮންޑިއުރަސްގެ މޮޓަގުއާ އަށް ކޯޗުކޮށްދީފައެވެ.
ޔުއެފާ ޕްރޯ ލައިސަންސް ހާސިލްކޮށްފައިވާ ރިސްޓޯ ކޯޗިން ކެރިއަރު ފެށީ 2006 އިން 2007 އަށް ސާބިއާގެ ގައުމީ ޓީމުގެ އެސިސްޓަންޓެއްގެ ގޮތުގައެވެ. އެއީ ސްޕެއިނުގެ މަޝްހޫރު ކޯޗު ހާވިއޭ ކްލެމެންޓޭގެ އެސިސްޓަންޓެއްގެ ގޮތުގައެވެ. ސްޕެއިން ގައުމީ ޓީމަށް ވެސް ކޯޗުކޮށްދިން ކްލެމެންޓޭ ސާބިއާ ޓީމު ދޫކޮށް ރެއާލް މުރުސިއާއާ 2008 ވަނަ އަހަރު ހަވާލުވުމުން އޭނާއާ އެކު އެ ޓީމަށް ވެސް ރިސްޓޯ ދިޔައެވެ.
ސެރެސް އަށް 2016 ވަނަ އަހަރު ބަދަލުވުމަށް ފަހު ޖެހިޖެހިގެން ތިން އަހަރު ފިލިޕީންސްގެ ޗެމްޕިއަންކަން އެ ޓީމަށް ހޯދައިދިނުމުގެ އިތުރުން އޭނާ ވަނީ އެ ޓީމަށް އޭއެފްސީ ކަޕްގައި ވެސް ރަނގަޅު ނަތީޖާތަކެއް ނެރެދީފައެވެ. އެ ގޮތުން 2017 ވަނަ އަހަރުގެ އޭއެފްސީ ކަޕްގައި މެލޭޝިއާގެ ވަރުގަދަ ޖޮހޯރް ބަލިކޮށް އާސިއާން ޒޯންގެ ޗެމްޕިއަންކަން ހޯދިއެވެ. އެ ފަހަރު އިންޓަ ޒޯން ސެމީ ފައިނަލުން ސެރެސް ބަލިވީ ތަޖިކިސްތާންގެ އިސްތިގްލާލް އަތުންނެވެ.
މާޒިޔާ އިން ރިސްޓޯ ގެނައި އެންމެ ބޮޑު އެއް ބޭނުމަކީ އޭއެފްސީ ކަޕްގައި ރަނގަޅު ނަތީޖާތަކެއް ނެރުމެވެ. މި އަހަރުގެ އޭއެފްސީ ކަޕްގައި މާޒިޔާ ވާދަކުރަން ޖެހެނީ އިންޑިއާގެ އޭޓީކޭ މޯހަން ބާގަން އާއި ބަންގްލަދޭޝްގެ ބަޝުންދުރާ ކިންގްސްގެ އިތުރުން ކޮލިފައިން ބުރުން އަންނަ ޓީމެކެވެ. ކޮލިފައިން ބުރުގައި ރާއްޖޭގެ އީގަލްސް އާއި އިންޑިއާގެ ބެންގަލޫރުގެ އިތުރުން ބަންގްލަދޭޝްގެ ޑާކާ އަބަހާނީ އާއި ނޭޕާލްގެ އާމީ ކްލަބް އަދި ބޫޓާންގެ ތިމްޕޫ ސިޓީ ވާދަކުރެއެވެ.
މާޒިޔާގެ ކޯޗުގެ މަގާމު ހުސްވީ ލީގުގައި އެންމެ ފަހުން ވެލެންސިއާއާ ލަނޑެއް ނުޖެހި އެއްވަރުވި މެޗަށް ފަހު އޭރު މާޒިޔާގެ ކޯޗަކަށް ހުރި މުހައްމަދު ނިޒާމް މަގާމުން އިސްތިއުފާ ދިނުމުންނެވެ. ބިދޭސީ ކޯޗަކަށް މީގެ ކުރިން މާޒިޔާ އަށް އިރުޝާދުދިން ހަމައެކަނި ކޯޗަކީ މެެސެޑޯނިއާގެ ކޯޗު މަރުޖާން ސެކުލޮސްކީއެވެ. އޭނާ ވަނީ ދެ ފަހަރެއްގެ މަތިން މާޒިޔާގައި މަސައްކަތްކޮށްފައެވެ. އެއީ 2017 ވަނަ އަހަރާއި މިދިޔަ ސީޒަނުގައެވެ.
މާޒިޔާއާއެކު މި ސީޒަނުގެ ނިޔަލަށް ކޮންޓްރެކްޓް ހެދި ރިސްޓޯ އަކީ ފުރަތަމަ ޑިވިޝަނުގައި އެ ޓީމުން ވާދަކުރަން ފެށި ފަހުން އެ ޓީމަށް އިރުޝާދުދޭނެ ފަސް ވަނަ ކޯޗެވެ.