ސަޢުދީ ޢަރަބިއްޔާގެ ވަލީއަހުދު މުޙައްމަދު ބިން ސަލްމާން ކޯވިޑް-19 ވެކްސިން ޖައްސަވައިފިއެވެ.
ކޯވިޑް-19އާއި ދެކޮޅަށް ފައިޒަރއާއި ބަޔޯއެންޓެކު ކުންފުނިން ތައްޔާރުކޮށްފައިވާ ވެކްސިން ސަޢުދީ ޢަރަބިއްޔާގައި ދޭން ފަށައިފައިވަނީ މިދިޔަ ހަފުތާގެ ތެރޭގައެވެ. ދެ ޑޯޒް ހިމެނޭ އެ ވެކްސިންގެ ފުރަތަމަ ޑޯޒް ވަލީއަހުދު ޖެއްސެވި މަންޒަރުގެ ފޮޓޯވަނީ އާންމުކޮށްފައެވެ.
ކޯވިޑް-19އަށް ވެކްސިންދޭ މަރުކަޒުތައްވަނީ ސަޢުދީ ޢަރަބިއްޔާގެ އެކި ސަރަޙައްދުތަކުގައި ޤާއިމްކޮށްފައެވެ. ސަޢުދީ ޢަރަބިއްޔާގެ ރައްޔިތުންނާއި އެ ޤައުމުގައި ދިރިއުޅޭ އެންމެން ވެކްސިން ޖެހުމަށް އެ ޤައުމުގެ ޞިއްޙަތާއިބެހޭ ވަޒީރު، ތައުފީޤް އަލްރާބިއާ ބާރު އެޅުއްވުމުން ގާތްގަނޑަކަށް 50،000 މީހުންވަނީ ވެކްސިން ޖެހުމަށް ދަފްތަރުވެފައެވެ. މިދިޔަ ހަފުތާގައި އަލްރާބިއާ ވިދާޅުވީ ފާއިތުވި ނުވަ މަސް ދުވަހުގެ ތެރޭގައި ބަލިޖެހޭ މީހުންގެ ޢަދަދު އިތުރުވަމުންދިޔަ މަންޒަރު އޭނާ ބެއްލެވިކަމަށާއި، ނަމަވެސް ދެން އުފަލާއެކު ބައްލަވަމުންދާނީ ވެކްސިން ޖަހާ މީހުންގެ ޢަދަދު އިތުރުވަމުންދާ މަންޒަރުކަމަށެވެ.
މިދިޔަ ނޮވެމްބަރު މަހުގެ ތެރޭގައި ސަޢުދީ ޢަރަބިއްޔާގެ ޞިއްޙަތާއިބެހޭ ވުޒާރާއިން ބުނީ 2021ވަނަ އަހަރު ނިމުމުގެ ކުރިން އެ ޤައުމުގެ އާބާދީގެ 70 އިންސައްތައަށް ބޭނުންވާ ވަރަށް ވެކްސިން ހޯދުމަށް އުންމީދުކުރާކަމަށެވެ.
ސަޢުދީ ޢަރަބިއްޔާގައި މިހާތަނަށް 361،903 މީހުންނަށް ކޯވިޑް-19 ޖެހި 6،168 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައި 178 މީހުންނަށް ބަލިޖެހި ނުވަ މީހުން މަރުވެފައެވެ. އިނގިރޭސިވިލާތުގައި ކޯވިޑް-19ގެ ބަލިޖެއްސުމުގެ ބާރު ގަދަ އައު ވައްތަރެއް ފެތުރޭތީ މިދިޔަ ހަފުތާގައި ސަޢުދީ ޢަރަބިއްޔާއިންވަނީ އެ ޤައުމުގެ ސަރަޙައްދީ ރޮނގުތައް ބަންދުކޮށްފައެވެ.
ވަލީ އަހުދު މުޙައްމަދު ބިން ސަލްމާންގެ އިތުރުން ދުނިޔޭގެ ބައެއް ލީޑަރުންވަނީ ކޯވިޑް-19 ވެކްސިން ޖައްސަވާފައެވެ. އެގޮތުން އެމެރިކާގެ ނައިބު ރައީސް މައިކް ޕެންސާއި އިންތިޚާބީ ރައީސް ޖޯ ބައިޑަންވެސްވަނީ ވެކްސިން ޖައްސަވާފައެވެ. އިސްރާއީލުގެ ބޮޑުވަޒީރު ބެންޖަމިން ނަތަންޔާހޫވެސްވަނީ ކެމެރާ ކުރިމަތީގައި ވެކްސިން ޖައްސަވާފައެވެ.