އިސްރާއީލާއެކު މިހާރަށްވުރެ ރަނގަޅު ގުޅުމެއް ބާއްވަން ބޭނުންވާކަމަށް ތުރުކީވިލާތުގެ ރައީސް ރަޖަބް ޠައްޔިބު އުރުދުޣާން ވިދާޅުވެއްޖެއެވެ. އިސްތަންބުލުގައި ހުކުރު ނަމާދު ކުރެއްވުމަށްފަހު ނޫސްވެރިންނާއި ވާހަކަދައްކަވަމުން ރައީސް އުރުދުޣާން ވިދާޅުވީ ތުރުކީވިލާތުގެ ހިތްހަމަނުޖެހުން އޮތީ އިސްރާއީލުގެ އިސްވެރިންނާއި މެދުކަމަށާއި ، އެ މައްސަލަތައް ނެތްނަމަ ތުރުކީވިލާތާއި އިސްރާއީލާއި ދެމެދު އޮންނަ ގުޅުން ވަރަށް ތަފާތުވާނެކަމަށެވެ.
އުރުދުޣާން ވިދާޅުވީ އިސްރާއީލާއިއެކު އޮތް މައިގަނޑު މައްސަލައަކީ ފަލަސްޠީނުގެ މައްސަލަކަމަށެވެ. އަދި ފަލަސްޠީނާއި މެދު އިސްރާއީލުން ގެންގުޅޭ ސިޔާސަތުތަކާއި ހިންގާ ޖަރީމާތަކަކީ ތުރުކީވިލާތުން ބަލައިގަންނާނެ ކަމެއް ނޫންކަމަށްވެސް އުރުދުޣާން ވިދާޅުވިއެވެ.
1949ވަނަ އަހަރުގައި އިސްރާއީލަކީ ވަކި ދަޢުލަތެއްގެ ގޮތުގައި ބަލައިގަތް ޤައުމުތަކުގެ ތެރޭގައި ތުރުކީ ހިމެނެއެވެ. އަދި އޭރު އިސްރާއީލްގެ މި ނިންމުން ބަލައިގެން މުސްލިމް އެންމެ ބޮޑު ޤައުމަކީވެސް ތުރުކީއެވެ.
ތުރުކީގެ ރައީސްކަމަށް އުރުދުޣާން ވަޑައިގަތުމާއި ހަމައަށް އިސްރާއީލާ ތުރުކީއަކީ ވަރަށް ގާތް ގުޅުމެއް އޮތް ދެ ޤައުމެވެ. އެހެންނަމަވެސް އުރުދުޣާންގެ ވެރިކަމުގައި ތުރުކީ ވެގެންގޮސްފައިމިވަނީ އިސްރާއީލާއި އިސްތިޢުމާރުކުރުމާއި ދެކޮޅަށް އެންމެ ގަދައަށް އަޑު އުފުލާ މުސްލިމް އެއް ޤައުމަށެވެ.
ވިޔަފާރީގެ ވަރުގަދަ ގުޅުންތަކެއް އޮތް މި ދެ ޤައުމުގެ ދެމެދުގައި އޮންނަ ހާރިޖީ ގުޅުންތައްވެސް މިހާރުވަނީ ގޯސްވެފައެވެ. އެގޮތުން 2018ވަނަ އަހަރުގައި ޣައްޒާގެ ސަރަޙައްދީ ރޮނގުގައި އިސްރާއީލުގެ ސިފައިން ގިނަ ޢަދަދެއްގެ ފަލަސްޠީނުގެ ރައްޔިތުން މަރާލުމުން ތުރުކީންވަނީ އެ ޤައުމުގައި ތިބި އިސްރާއީލްގެ ސަފީރުން އަނބުރާ ޤައުމަށް ފޮނުވާލާފައެވެ.