ފަރަންސޭސިވިލާތުގެ ރައީސް އެމަނުއަލް މެޚްރޮންއަށް ކޯވިޑް-19އިން ފަސޭހަވެއްޖެއެވެ.
ފަރަންސޭސިވިލާތުގެ ރިޔާސީ އިދާރާއިން ބުނީ ޑިސެމްބަރު މަހުގެ 17ވަނަ ދުވަހުގައި ކޯވިޑް-19 ޖެހުނު ރައީސް މެޚްރޮންގެ ކިބައިން ބަލީގެ އެއްވެސް އަލާމާތެއް މިހާރު ނުފެންނަކަމަށާއި، ފަރަންސޭސިވިލާތުގައި ޢަމަލުކުރާ އުސޫލުތަކާއި އެއްގޮތަށް ކަރަންޓީނުގެ 7 ދުވަސް ފުރިހަމަ ކުރެއްވުމަށްފަހު، އިތުރަށް އެކަހެރިވެވަޑައިގެން ނުހުންނަވާނެކަމަށެވެ.
މިދިޔަ ހަފުތާގައި ރައީސް މެޚްރޮންވަނީ އެކަހެރިވެވަޑައިގެން ހުންނަވާ ވީޑިޔޯ މެސެޖެއް ދެއްވާފައެވެ. އެ ވީޑިޔޯގައި މެޚްރޮން ވިދާޅުވީ ހިކި ކެއްސުމަކާއި ބޮލުގައި ރިއްސުމާއި ވަރުބަލިކަން ތަޖުރިބާކުރައްވަމުންދާކަމަށާއި އެމަނިކުފާނަށް ކޯވިޑް-19 ޖެހުނީ ފަރުވާކުޑަކަމުންނާއި ނަސީބު ދެރަކަމުންކަމަށެވެ.
ފަރަންސޭސިވިލާތުގައި މިހާތަނަށް 2.5 މިލިއަން މީހުންނަށް ކޯވިޑް-19 ޖެހި 62،268 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައިވެސް އެ ޤައުމުގައި 21،634 މީހުންނަށް ބަލިޖެހި 290 މީހުންވަނީ މަރުވެފައެވެ. ދުނިޔޭގެ ގިނަ ޤައުމުތަކުން ފާހަގަކުރާ ދީނީ ޗުއްޓީއަކާއި ދިމާކޮށް ފަރަންސޭސިވިލާތުންވަނީ ބައްޔާއި ދެކޮޅަށް އެ ޤައުމުގައި އަޅާފައިވާ ރައްކާތެރިކަމުގެ ބައެއް ދިޔަވަޅުތަކަމަށް ލުއި ދީފައެވެ. ނަމަވެސް ބައެއް ޑޮކްޓަރުންވަނީ ޤައުމުގެ ޙާލަތު ގޯސްވިޔަ ނުދިނުމަށް ފުރަބަންދުގެ އުސޫލުތައް އެ ޤައުމުގައި އަލުން ޤާއިމްކުރަންޖެހޭކަމުގެ އިންޒާރު ދީފައެވެ.
ކުރިއަށްއޮތް ޗުއްޓީގެ ތެރޭގައި ގިނަ މީހުންނާއި ބައްދަލު ނުކުރުމަށާއި ބައްޔާއިމެދު ހުށިޔާރުވެ ތިބުމަށް ރައީސް މެޚްރޮންވަނީ ރައްޔިތުންނަށް ގޮވާލައްވައިފައެވެ.