އަފްޣާނިސްތާނުގެ ޤާނޫނު ހަދާ މަޖިލީހުގެ މެންބަރަކަށް އަމާޒުކޮށް ދިން ބޮމުގެ ޙަމަލާއެއްގައި ނުވަ މީހުން މަރުވެއްޖެއެވެ.
އަފްޣާނިސްތާނުގެ ދާޚިލީ ވަޒީރު މައްސޫދު އަންދަރާބީ ވިދާޅުވީ އެ ޙަމަލާ އަމާޒުކޮށްފައިވަނީ ޤަނޫނު ހަދާ މަޖިލީހުގެ މެންބަރެއްކަމަށްވާ ޚާން މުޙައްމަދު ވަރުދަކަށް ކަމަށެވެ. މި ހަމަލާއިން އޭނާ ސަލާމަތްވި ނަމަވެސް އެކިވަރުގެ ޒަހަމްތައް ލިބިފައިވާކަމަށް އަންދަރާބީ ވިދާޅުވިއެވެ. އަދި ޚާންގެ އިތުރުން އިތުރު ވިއްސަކަށް މީހުން ޒަހަމްވެފއިވާކަމަށްވެސް އޭނާ ވިދާޅުވިއެވެ.
އަންދަރާބީ ވިދާޅުވީ ޚާންއަށް ޙަމަލާ ދީފައިވަނީ އޭނާ ދަތުރުކުރަމުންދިޔަ މަގުގައި ޕާކުކޮށްފައި އޮތް ކާރެއްގައި ބޮމެއް ހަރުކޮށް ހޮއްވާލައިގެންކަމެއް ނުވަތަ ދުއްވަމުންދިޔަ އުޅަނދެއްގައި ބޮމެއް ހަރުކޮށްގެންކަން މިހާތަނަށް ސާފުވެފައި ނުވާކަމަށެވެ. ޙަމަލާގެ ޒިންމާ މިހާތަނަށް އެއްވެސް ފަރާތަކުން އުފުލާފައެއް ނުވެއެވެ.
އަފްޣާނިސްތާނުގެ ޤާނޫނުހަދާ މަޖިލީހުގެ މެންބަރަކަށް އަމާޒުކޮށް ޙަމަލާއެއް ދީފައި މިވަނީ އެ ޤައުމުގައި ޞުލްޙަ ޤާއިމްކުރުމާއި ގުޅޭ މަޝްވަރާތައް ކުރަމުންދާ ދަނޑިވަޅެއްގައެވެ. 02 އަހަރުވެފައިވާ ދާހިލީ ހަނގުރާމަ ހުއްޓުވުމަށް އަފްޣާނިސްތާނުގެ ސަރުކާރާއި ހަނގުރާމަވެރި ޖަމާޢަތެއްކަމަށްވާ ޠާލިބާނުންނާއި ދެމެދު މަޝްވަރާތައް ފެށި ފަހުން ޙަމަލާތައްވަނީ ކުރިޔަށް ވުރެ އިތުރުވެފައެވެ.
އަފްޣާނިސްތާނުގެ ދާޚިލީ ވުޒާރާއިން ނެރުނު ބަޔާނެއްގައި ބުނީ ފާއިތުވި ތިން މަސް ދުވަހުގެ ތެރޭގައި ދިން 542 ޙާމަލާއެއްގައި އާންމުންގެ 487 މީހުން މަރުވެ 1،049 މީހުން ޒަޚަމްވެފައިވާކަމަށެވެ.
ޤަނޫނުހަދާ މަޖިލީހުގެ މެންބަރަށް އަމާޒުކޮށް ދިން ޙަމަލާގެ އިތުރުން އެ ޤައުމުގެ ލޯގަރު، ނަންގަހާރު، ހެލްމަންޑު އަދު ބަދަޚްޝަން ޕްރޮވިންސުގައިވެސް މިއަދުވަނީ ގިނަ ޙަމަލާތަކެއް ދީފައެވެ. އެ ޙާމަލާތަކުގައިވެސް އާންމުންނާއި ސަލާމަތީ ފައުޖުތަކުގެ ބައެއް މެންބަރުން ޒަޚަމްވެފައިވާއިރު އެއްބަޔަކުވަނީ މަރުވެފައެވެ. އޭގެ އިތުރުން، ޣަޒްނީ ޕްރޮވިންސުގައި ރެކްޝާއެއްގައި ބޮމެއް ހަރުކޮށްގެން ދިން ޙަމަލާއެއްގައި 11 ކުޑަކުދިން ހިމެނޭގޮތަށް އާންމުންގެ 15 މީހުންވަނީ މަރުވެފައެވެ.