އެމެރިކާގެ ރިޔާސީ އިންތިޚާބު ކާމިޔާބުކުރެއްވީ އިންތިޚާބީ ރައީސް ޖޯ ބައިޑަންކަމަށް އެމެރިކާގެ އިލެކްޓޯރަލް ކޮލެޖުން ޔަޤީންކޮށްދީފިއެވެ.
އެމެރިކާގެ ހުރިހާ ސްޓޭޓެއްގެ އިލެކްޓަރުން ބައްދަލުކޮށް، ނޮވެމްބަރު މަހުގެ 3ވަނަ ދުވަހުގައި ބޭއްވި ރިޔާސީ އިންތިޚާބުގައި އެ ސްޓޭޓެއްގެ ރައްޔިތުން ވޯޓު ދިން ގޮތާއި އެއްގޮތަށް ވޯޓުލާފައެވެ. އިލެކްޓޯރަލް ކޮލެޖުގައި 538 އިލެކްޓަރުން ތިއްބަވާއިރު އިންތިޚާބު ކާމިޔާބުކުރުމަށް ބޭނުންވަނީ 270 ވޯޓެވެ. މި އަހަރުގެ އިންތިޚާބުގައި ބައިޑަންވަނީ 306 ވޯޓު ކާމިޔާބުކުރައްވާފައެވެ. ރައީސް ޑޮނަލްޑް ޓްރަންޕަށް ކާމިޔާބުވީ 232 ވޯޓެވެ. އިންތިޚާބަށް އެންމެ މުހިންމު މިޝިގަން، ވިސްކޮންސިން، ޕެންސިލްވޭނިއާ، އެރިޒޯނާ އަދި ޖޯޖިއާއިންވެސް ވޯޓު ދީފައި ވަނީ ބައިޑަނަށެވެ.
އިލެކްޓޯރަލް ކޮލެޖުގެ ވޯޓުން އިންތިޚާބު ކާމިޔާބުކުރެއްވި ފަރާތް ޔަޤީންވުމުން ޖޯ ބައިޑަންވަނީ ޓީވީ މެދުވެރިކޮށް ޤައުމާއި މުޚާތަބުކުރައްވާ ވާހަކަ ދައްކަވާފައެވެ. އޭނާގެ ވާހަކަފުޅުގައި ނޮވެމްބަރު މަހުގެ 3ވަނަ ދުވަހު ބޭއްވި އިންތިޚާބުގެ ނަތީޖާ ޤަބޫލުކުރެއްވުމަށް ދެކޮޅު ހައްދަވަމުންދާ ރައީސް ޓްރަންޕަށްވަނީ ވަރުގަދަ ބަހުގެ ޙާމަލާއެއް އަމާޒުކުރައްވާފައެވެ.
ބައިޑަން ވިދާޅުވީ މި ޙާލަތުގައި އެމެރިކާގެ ޑިމޮކްރަސީގައި ކުރި ހޯދާފައިވާކަމަށާއި، މިއީ އައު ސަފުހާއެއް ހުޅުވަންވީ ވަގުތުކަމަށެވެ. އެމެރިކާގެ ތާރީޚުގައި މީގެ ކުރިންވެސް ޢަމަލުކޮށްފައިވާ ފަދައިން، މިއީ އައު ފެށުމަކުން ފަށާ އެއްމެން އެކަތިގަނޑަކަށްވެ، ޤައުމަށް ކުރިމަތިވެފައިވާ އުނދަގޫތަކުން އަރައިގަންނަންވީ ވަގުތުކަމުގައި އޭނާ ވިދާޅުވިއެވެ.
ބައިޑަންގެ ވާހަކަފުޅުގައިވަނީ އިންތިޚާބުގެ ނަތީޖާ އޮޅުވާލާފައިވާކަމަށް ވިދާޅުވެ ނަތީޖާ ބާޠިލްކުރުމަށް ރައީސް ޓްރަންޕު ކުރައްވަމުން ދިޔަ މަސައްކަތާއި ދެކޮޅަށް ޤައުމުގެ އިދާރާތަކުން ދެއްކި ދިމުކުރާތީ ނާމޫނާއަށް ތަޢުރީފު ކުރައްވާފައެވެ. އެމެރިކާގައި ޑިމޮކްރަސީގެ ހުޅުކޮޅު ރޯކޮށްފައިވަނީ މީގެ އެތައް ޒަމާނެއް ކުރިން ކަމަށާއި، ބޮޑު ބަލިމަޑުކަމަކުންވެސް، އަދި ބާރުގެ ބޭނުން ނަހަމަ ގޮތުގައި ބޭނުންކޮށްގެންވެސް އެ ހުޅުކޮޅު ނިވާ ނުލެވޭނެކަމަށް ބައިޑަން ވިދާޅުވިއެވެ.
2016ވަނަ އަހަރުގެ އިންތިޚާބު ރައީސް ޓްރަންޕު ކާމިޔާބުކުރެއްވީ 306 އިލެކްޓޯރަލް ވޯޓުންކަން ހަނދުމަކޮށްދެއްވަމުން ބައިޑަން ވިދާޅުވީ އޭރު ޓްރަންޕުވަނީ އެމަނިކުފާނަށް އިންތިޚާބުގައި ލިބުނު ކާމިޔާބީއަކީ ވަރަށް ބޮޑު ތަފާތަކާއިއެކު ލިބިފައިވާ ކާމިޔާބީއެއްގެ ގޮތުގައި ސިފަކުރައްވާފައިވާކަމަށެވެ.
މި އަންނަ މަހުގައި އެމެރިކާގެ ކޮންގުރެސްއުން ރަސްމީކޮށް އިލެކްޓޯރަލް ކޮލެޖުގެ ވޯޓުތައް ގުނާނެއެވެ. އިންތިޚާބުގެ ނަތީޖާއަށް ބަދަލު ގެނައުމަށް ގިނަ ޤާނޫނީ މައްސަލަތައް ހުށަހަޅުއްވާފައިވާ ޓްރަންޕަށް ނަތީޖާއަށް ބަދަލެއް ގެނައުމަށް ދެން ކުރެވޭނެ މަސައްކަތަކީ ޤާނޫނު ހަދާ މަޖިލީހުން އިލެކްޓޯރަލް ކޮލެޖުގެ ނަތީޖާ ޤަބޫލުނުކުރުމަށް ހިތްވަރު ދިނުމެވެ. ނަމަވެސް ޑިމޮކްރަޓުންގެ އަޣުލަބިއްޔަތު އޮންނަ ހައުސް އޮފް ރިޕްރެސެންޓޭޓިވްސުން އެފަދަ ކަމަކަށް ހުރަސް އަޅާނެކަމަށް ވަރަށް ބޮޑަށް ޔަޤީންކުރެވެއެވެ.
އެމެރިކާގެ ރައީސްކަމުގެ ހުވާ ޖޯ ބައިޑަން ކުރައްވާނީ ޖަނަވަރީ މަހުގެ 20ވަނަ ދުވަހުގައެވެ.