ކޯވިޑް-19އާ ގުޅިގެން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވިފަހުން ރާއްޖެއަށް ޒިޔާރަތްކުރާ އެއް ލައްކަވަނަ ފަތުރުވެރިޔާއަށް ހޫނު މަރުޙަބާއެއް ކިޔައިފިއެވެ.
އެއް ލައްކަ ވަނަ ފަތުރުވެރިޔާ ރާއްޖެ އައިސްފައިވަނީ މިއަދު ހެނދުނުގެ ވަގުތެއްގައެވެ. ބޯޑަރު ހުޅުވާލިފަހުން ޒިޔާރަތްކުރި އެއް ލައްކަވަނަ ފަތުރުވެރިޔާއަށް ވެލާނާ އިންޓަނޭޝަނަލް އެއަރޕޯޓުން ވަނީ މަރުޙަބާ ހޫނު ކިޔާފައެވެ. އެއް ލައްކަ ވަނަ ފަތުރުވެރިޔާއަކީ ސްވިޒަލޭންޑްގެ ޖޭސްމިން ބުރުކީ ކިޔާ އަންހެނެކެވެ. އޭނާއަށް މަރުހަބާކިޔުމަށް ބޭއްވި ރަސްމިއްޔާތުގައި ޓޫރިޒަމް މިނިސްޓްރީ އެމްއެމްޕީއާރުސީ، އިމިޤްރޭޝަން އަދި އެމްއޭސީއެލްގެ އިސްވެރިން ވަނީ ބައިވެރިވެވަޑައިގަތެވެ.
ރާއްޖެއަށް 1 ލައްކަ ފަތުރުވެރިން އައުމާއި ގުޅިގެން ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވީ، އެއްލައްކައަށްވުރެ ގިނަ ފަތުރުވެރިން ޒިޔާރަތް ކުރުމަކީ މި ދަނޑިވަޅުގައި ފަތުރުވެރިން އިތުރުވާނެކަމަށް ހިތްވަރުދޭ ކަމެއްކަމަށެވެ. އަދި މި ހާސިލްކުރެވުނު ކާމިޔާބީގެ އަސްލަކީ މުޅި ދިވެހިރާއްޖެ އެކުއެކީގައި މަސައްކަތް ކޮށްގެން މުޅި ދުނިޔެއަށް ކުރިމަތި ވެފައިވާ ގޮންޖެހުމުން އަރައިގަތުމަށް ކުރެވިގެންދިޔަ މަސައްކަތުގެ ނަތީޖާކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވި ގޮތުގައި މިއީ މި ހުރިހާ އެންމެންގެ މަސައްކަތުން ލިބުނު ކާމިޔާބީއެކެވެ.
އެމް.އެމް.ޕީއާރްސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވީ މި ކާމިޔާބީ ލިބުނީ ހުރިހާ ފަރާތްތަކެއްގެ އެއްބާރުލުމާއި އެކުކަމަށެވެ. އަދި ފަތުރުވެރިންނަށް ދޭން ބޭނުންވާ ޔަގީންކަމަކީ ދިވެހިރާއްޖެއަކީ މި ދަނޑިވަޅުގައި ޒިޔާރަތްކުރަން އެންމެ ރައްކާތެރި ޤައުމު ތަކުގެ ތެރޭގައި ހިމެނޭ ޤައުމުކަން ތައްޔިބު ފާހަގަކުރެއްވިއެވެ.
މިކަމާއި ގުޅޭގޮތުން އިމިގްރޭޝަން ކޮންޓްރޯލަރ ވިދާޅުވީ، އިމިގްރޭޝަންއިން ފަތުރުވެރިންގެ ދަތުރު ފަސޭހަކަމާއި ހަލުވިކަމާއެކީ ކުރިއަށް ގެންދެވޭނެ ގޮތްތައް ހޯދުމަށްޓަކައި ޒަމާނީ ވަސީލަތްތައް އަދި އެންމެ ފަހުގެ ޓެކްނޮލޮޖީ ބޭނުންކުރާނެ ކަމުގެ ޔަޤީންކަން އަރުވާކަމަށެވެ. މިގޮތުން ދާދި ފަހުން ލޯންޗް ކުރި މޯލްޑިވްސް ބޯޑަރ މައިލްސް ޕްރޮގްރޯމް އަކީ މީގެދަށުން ކުރިއަށް ގެންދެވޭ ޕްރޮގްރާމެއް ކަމަށާއި މި ޕްރޮގްރާމް މެދުވެރިކޮށް ދިވެހިރާއްޖެ އަޢު އުސްމިން ތަކަކަށް ގެންދެވޭނެ ކަމުގެ ޔަޤީންކަންވެސް އިމިގްރޭޝަން ކޮންޓްރޯލަރ ވިދާޅުވިއެވެ.
ބޯޑަރު ހުޅުވާލިފަހުން ރާއްޖެއަށް އެއް ލައްކަ ފަތުރުވެރިން ޒިޔާރަތްކޮށްފައިވާއިރު، ޓޫރިޒަމް މިނިސްޓްރީން މިހާރު އަމާޒުހިފާފައިވަނީ މިމަހުގެ 25 ވަނަ ދުވަހުގެ ނިޔަލަށް މިއަހަރު ރާއްޖެއަށް ޒިޔާރަތްކުރާ ޖުމްލަ ފަތުރުވެރިންގެ އަދަދު 5 ލައްކައަށް އެރުވުމަށެވެ. ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ބޮޑުތަނުން އިތުރުވެފައި މިވަނީ ދުނިޔޭގެ ގިނަ ސަރަހައްދުތަކަކުން ރާއްޖެއަށް ޑައިރެކްޓް ފްލައިޓްތައް ފެށުމާއި ގުޅިގެންނެވެ. ރާއްޖޭގެ ބޯޑަރު ޖުލައިމަހު ހުޅުވާލުމާއިއެކު މިހާތަނަށް ބައިނަލްއަޤްވާމީ 19 އެއަރލައިނަކުން ވަނީ ދަތުރުތައް ފަށާފައެވެ. އަދި މިމަހުގެ ތެރޭގައި އިތުރު 7 އެއަރލައިނަކުން ދަތުރުތައް ފެށުމަށް ހަމަޖެހިފައިވާކަމަށް ޓޫރިޒަމް މިނިސްޓްރީން ވިދާޅުވެއެވެ.
ރާއްޖޭގެ ބޯޑަރު ހުޅުވާލިފަހުން ޓޫރިސްޓް ހުރިހާ ފެސިލިޓީތަކަކަށް މިހާރު ވަނީ ހުޅުވުމުގެ ހުއްދަ ދީފައެވެ. އަދި އެތަންތަން ހުޅުވާއިރު ޙާއްސަ ގައިޑްލައިންތަކެއް ކަނޑައަޅައި އަމަލުކުރަންޖެހެއެވެ. ބޯޑަރު ހުޅުވާލިފަހުން މިހާތަނަށް 135 ރިސޯޓް، 127 ސަފާރީ އަދި 146 ގެސްޓްހައުސް އަންނަނީ ހުޅުވައި ފަތުރުވެރިންނަށް ޙިދުމަތްދެމުންނެވެ.
ކުރިއަށްއޮތީ ރާއްޖޭގެ ފަތުރުވެރިކަމުގެ ހައި ސީޒަންކަމުން މިމަހުގެ ބާކީއޮތް ދުވަސްތަކުގައި ރާއްޖެއަށް ގިނަ އަދަދެއްގެ ފަތުރުވެރިން އަންނާނެކަމަށް ބެލެވެއެވެ. މިހާރުވެސް ރާއްޖޭގެ ގިނަ ރިސޯޓްތަކެއް ވަނީ ފުރިފައެވެ. އަދި ގެސްޓްހައުސްތަކާއި ސަފާރީތަކަށްވެސް ފަތުރުވެރިން އަންނަ މިންވަރު ދަނީ އިތުރުވަމުންނެވެ.