ފައިޒަރއާއި ބަޔޯއެންޓެކު ކުންފުނިން ގުޅިގެން ތައްޔާރުކޮށްފައިވާ ކޯވިޑް-19 ވެކްސިން އެމެރިކާގައި ބޭނުންކުރުމުގެ ހުއްދަދިނުމަށް އެ ޤައުމުގެ ފުޑް އެންޑް ޑްރަގް އޮތޯރިޓީއަށް ލަފާ އަރުވާ ޚާއްޞަ ކޮމެޓީއަކުން ވޯޓު ދީފިއެވެ.
މިދިޔަ މަހުގެ ތެރޭގައި ފައިޒަރއާއި ބަޔޯއެންޓުކުން ބުނީ އެ ފަރާތުން ތައްޔާރުކޮށްފައިވާ ވެކްސިންގެ ކާމިޔާބީގެ ނިސްބަތަކީ 95 އިންސައްތަކަމަށެވެ. ވެކްސިނާއި ގުޅޭ ތަފްޞީލީ މަޢުލޫމާތު ހިމަނާ ނެރެފައިވާ ކަރުދާހެއްގައިވަނީ ވެކްސިންގެ ދެ ޑޯޒްގެ ތެރެއިން އެއް ޑޯޒް ދިނުމުންވެސް ކޯވިޑް-19އާއި ދެކޮޅަށް ކޮންމެވެސް ވަރަކަށް ހަށިގަނޑު ރައްކާތެރިކޮށްދޭކަމުގެ ނިޝާންތައް ފެނިފައިވާކަމަށް ބުނެފައެވެ.
ކުރިއަށް އޮތް ދުވަސްތަކުގައި އެމެރިކާގެ އެފްޑީއޭއިން ކުއްލި ޙާލަތުގައި ވެކްސިން ބޭނުންކުރުމުގެ ޙުއްދަ ދޭނެކަމަށް ބެލެވެއެވެ. ޙުއްދަ ދިނުމާއިއެކު ވެކްސިން ފޯރުކޮށްދިނުމާއި އާންމުންނަށް ވެކްސިން ދިނުމުގެ މަސައްކަތް ވަގުތުން ފަށާނެއެވެ.
ފައިޒަރއިން އެފްޑީއޭގައި އެދިފައިވަނީ އުމުރުން 16 އަހަރާއި 85 އަހަރާއި ދެމެދުގެ މީހުންނަށް އެ ކުންފުނިން ތައްޔާރުކޮށްފައިވާ ދެ ޑޯޒް ހިމެނޭ ވެކްސިން ދިނުމުގެ ޙުއްދައަކަށެވެ. ކޮމިޓީގައި އިންނަވާ 22 މެންބަރުންގެ ތެރެއިން 17 މެންބަރުންވަނީ އުމުރުން 16 އަހަރުން މަތީގެ މީހުންނަށް ވެކްސިން ދިނުމުން ލިބޭ ފައިދާތަކުގެ ބުރަދަން އޭގެ ސަބަބުން ކުރިމަތިވާ ހިރާސްތަކަށްވުރެ އިތުރުކަމަށް ވޯޓުދީފައެވެ. އޭގެ ރައްކާތެރިކަމާއިދެކޮޅަށް ހަތަރު މެންބަރުން ވޯޓު ދެއްވާފައިވާއިރު އެއް މެންބަރު ވޯޓުގައި ބައިވެރިވެވަޑައިގެންފައެއް ނުވެއެވެ.
ކޮމިޓީގެ ހަތަރު މެންބަރަކު ވެކްސިނަށް ޙުއްދަ ނުދިނުމަށް ވޯޓު ދީފައިވަނީ ކީއްވެކަމެއް ސާފެއް ނުވެއެވެ. ނަމަވެސް ބައެއް ބޭފުޅުންވަނީ 16 އަހަރާއި 17 އަހަރުގެ ކުދިންނަށް ވެކްސިން ދިނުމާއިމެދު ހިތްހަމަނުޖެހޭކަމަށް ވިދާޅުވެފައެވެ.
ފައިޒަރގެ ވެކްސިން މިހާރު ދޭން ފަށައިފައިވާ އިނގިރޭސިވިލާތުގައި ވެކްސިން ދިން ދެ މީހަކު އެ ވެކްސިނަށް އެލާޖިކުވި ހާދިޡާއާއިމެދުވެސް ކޮމެޓީގައިވަނީ މަޝްވަރާކޮށްފައެވެ. އަދި މާބަނޑު މީހުންނަށް ވެކްސިން ދިނުމާއިގުޅޭގޮތުން ގޮތެއް ނިންމުމާއިމެދުވެސްވަނީ މަޝްވަރާކޮށްފައެވެ. ވެކްސިންގެ ތަހުލީލުތަކުގައި މާބަނޑު މީހުން ބައިވެރިކޮށްފައެއް ނުވެއެވެ. ކޮމިޓީއިން ވެކްސިނަށް ހުއްދަދިނުމަށް ވޯޓު ދީފައިވާ ނަމަވެސް ވެކްސިނަށް ޙުއްދަ ދިނުމާއިމެދު ގޮތެއް ނިންމާނީ އެފްޑީއޭއިންނެވެ.
މިހާތަނަށް އެންމެ ގިނަ ޢަދަދެއްގެ މީހުންނަށް ކޯވިޑް-19ޖެހި އެންމެ ގިނަ މީހުން މަރުވެފައިވާ ޤައުމުގެ ގޮތުގައި އޮތީ އެމެރިކާއެވެ. އެ ޤައުމުގައި 16 މިލިއަން މީހުންނަށް ބަލިޖެހި ގާތްގަނޑަކަށް 300،000 މީހުން ބަލީގައި މަރުވެފައިވާއިރުމ ފާއިތު 24 ގަޑިއިރުގެ ތެރޭގައިވެސް 217،779 މީހުންނަށް ބަލިޖެހި 2،974 މީހުން އެ ޤައުމުގައިވަނީ މަރުވެފައެވެ. އެ ޤައުމުގައި ވެކްސިން ދޭން ފެށުން ވެގެންދާނީ ޤައުމުގެ ޙާލަތު ބަދަލުކުރުމަށް ލިބޭ ވަރަށް ބޮޑު އުންމީދަކަށެވެ.