ރަޝިޔާގެ ވެރިރަށް މޮސްކޯގައި އާންމުންނަށް ކޯވިޑް-19 ވެކްސިން ދޭން ފަށައިފިއެވެ.
ރަޝިޔާގެ ވެކްސިން ޕުރޮގުރާމުގެ ދަށުން އެ ޤައުމުގެ އުފެއްދުމެއްކަމަށްވާ ސްޕަޓްނިކް-5 ވެކްސިން އެންމެ ފުރަތަމަ ދެމުންދަނީ ބަލީގެ ނުރައްކަލަށް އެންމެ ބޮޑަށް ހުށަހެޅިފައިވާ މީހުންނަށެވެ. މިދިޔަ އޮގަސްޓު މަހުގައި ދަފްތަރުކޮށްފައިވާ އެ ވެކްސިންގެ ކާމިޔާބީގެ ނިސްބަތަކީ 95 އިންސައްތަކަމަށާއި އެ ވެކްސިންގެ ނޭދެވޭ މާ ބޮޑު އަސަރެއް ފާހަގަވެފައިނުވާކަމަށް އެ ވެކްސިން ތައްޔާރުކުރި ފަރާތުންވަނީ ބުނެފައެވެ. ނަމަވެސް އެ ވެކްސިންދަނީ ފުޅާ ދާއިރާއެއްގައި އަދިވެސް ތަހުލީލުކުރަމުންނެވެ.
މި ހަފުތާގެ ކުރީކޮޅު ވެކްސިން ޕްރޮގުރާމު ފަށަން ހަމަޖެހިފައިވާކަން އިޢުލާނުކުރެއްވި މޮސްކޯގެ މޭޔަރު، ސަރގެއި ސޮބްޔާނިން ވިދާޅުވީ 13 މިލިއަން މީހުންގެ އާބާދީއެއް އޮންނަ މޮސްކޯގެ ރައްޔިތުންގެ ތެރެއިން މަދަރުސާތަކުގައި މަސައްކަތްކުރާ މީހުންނަށާއި ޞިއްޙީ ދާއިރާގައި މަސައްކަތްކުރާ މީހުންނަށާއި އިޖުތިމާޢީ މަސައްކަތްތަކުގައި ޙަރަކާތްތެރިވާ ފަރާތްތަކަށް ވެކްސިން ދިނުމަށް ދަޢުވަތު ދީފައިވާކަމަށެވެ. ވެކްސިން ލިބޭ މިންވަރު އިތުރުވާ ވަރަކަށް ވެކްސިންދޭ ދާއިރާތައް އިތުރުވާނެކަމަށް އޭނާ ވިދާޅުވިއެވެ.
ކަނޑައެޅިފައިވާ ދާއިރާތަކުން ވެކްސިން ޖެހުމަށް ބޭނުންވާ އުމުރުން 18 އަހަރާއި 60 އަހަރާއިދެމެދުގެ މީހުން އިންޓަނެޓު މެދުވެރިކޮށް އެދެވޭނެއެވެ. މޮސްކޯގެ 70 ސަރަޙައްދެއްގައިދަނީ ވެކްސިން ދިނުމުގެ މަސައްކަތް ކުރިއަށް ގެންދަމުންނެވެ. ފާއިތުވި އެއް މަސް ދުވަހުގެ ތެރޭގައި އިންޖެކްޝަނެއް ޖަހާފައިވާ މީހުންނާއި މިދިޔަ ދެ ހަފުތާގެ ތެރޭގައި ނޭވާލުމުގެ ނިޒާމަށް އެއްވެސް މައްސަލައެއް ދިމާވެފައިވާ މީހުންނަށް ވެކްސިނެއް ނުދޭނެއެވެ. އޭގެ އިތުރުން ގިނަ ދުވަހަށް ބޭސްކުރަންޖެހޭ ބައެއް ބަލިތައް ހުންނަ މީހުންނާއި މާބަނޑު މީހުންނާއި ގާތުންދޭ މައިންނަށް ވެކްސިނެއް ނުދޭނެއެވެ. ދެ ޑޯޒް ހިމެނޭ އެ ވެކްސިންގެ ފުރަތަމަ ޑޯޒް ދިނުމަށްފަހު ދެވަނަ ޑޯޒް ދޭނީ 21 ދުވަސް ފަހުންނެވެ.
ކުރިއަށް އޮތް ހަފުތާ ބަންދުތެރޭގައި ވެކްސިން ޖެހުމަށް ރަޝިޔާގެ އެތައް ހާސް މީހުންނެއްވަނީ ނަން ނޯޓުކޮށްފައެވެ. ނަމަވެސް ރަޝިޔާއަށް އުފެއްދޭނެ ވެކްސިންގެ ޢަދަދު މިހާތަނަށް ސާފުވެފައެއް ނުވެއެވެ. މި އަހަރު ނިމުމުގެ ކުރިން ވެކްސިންގެ ދެ މިލިއަން ޑޯޒް ތައްޔާރުވާނެކަމަށް ޤަބޫލުކުރެވެއެވެ.
ދުނިޔޭގައި ހަތަރުވަނައަށް އެންމެ ގިނަ ޢަދަދެއްގެ މީހުންނަށް ކޯވިޑް-19 ޖެހިފައިވާ ޤައުމުގެ ގޮތުގައި އޮތީ ރަޝިޔާއެވެ. ރަޝިޔާގައި މިހާތަށް 2.4 މިލިއަން މީހުންނަށް ކޯވިޑް-19 ޖެހި 42،684 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައި 27،403 މީހުންނަށް ބަލިޖެހި 569 މީހުން މަރުވެފައިވާއިރު އެ ޤައުމުގެ ޞިއްޙީ ނިޒާމަށްވަނީ ވަރަށް ބޮޑަށް ބާރުބޮޑުވެފައެވެ. މިދިޔަ ނޮވެމްބަރު މަހުގެ ތެރޭގައި އެ ޤައުމުގައި އަޅާފައިވާ ރައްކާތެރިކަމުގެ ފިޔަވަޅުތައްވަނީ އިތުރަށް ހަރުކަށިކޮށްފައެވެ.