އިސްރާއީލާއިއެކު ގުޅުންބަދަހިކުރުމުގެ ޝަރުތަކީ ފަލަސްޠީނުގެ މިނިވަން ދަޢުލަތެއް ޤާއިމްކުރުން: ސަޢުދީ
އިސްރާއީލާއިއެކު ސަޢުދީ ޢަރަބިއްޔާއިން ގުޅުން ބަދަހިކުރާނީ އިސްރާއީލުން އިސްތިޢުމާރުކޮށްފައިވާ ފަލަސްޠީނަށް މިނިވަން ދަޢުލަތެއް ލިބޭނެގޮތް ހަމަޖެއްސުމުންކަމަށް ސަޢުދީ ޢަރަބިއްޔާއިން ބުނެފިއެވެ.
މިދިޔަ ސެޕްޓެމްބަރު މަހުގެ ތެރޭގައި ޔޫއޭއީންވަނީ އެމެރިކާ މެދުވެރިވެ އިސްރާއީލާއެކު ގުޅުން ބަދަހިކުރުމުގެ އެއްބަސްވުމެއްގައި ސޮއިކޮށްފައެވެ. އޭގެ ފަހުން ބަހްރައިނުންވެސްވަނީ އިސްރާއީލާއިއެކު ގުޅުން ބަދަހިކުރުމަށް އެއްބަސްވެފައެވެ. އެމެރިކާއިން އިސް ދައުރެއް އަދާކޮށް އެކުލަވާލާފައިވާ އެ އެއްބަސްވުމުގެ ދަށުން ފަލަސްޠީނުގެ ބިންތަކަކީ އިސްރާއީލުގެ ބިންތަކެއްގެ ގޮތުގައި ކަނޑައެޅުން މަޑުޖައްސާލުމަށްވަނީ އެއްބަސްވެފައެވެ. ކުރިއަށް އޮތް ތަނުގައި އެފަދަ ގުޅުން ބަދަހިކުރުމުގެ އެއްބަސްވުމެއްގައި ސަޢުދީ ޢަރަބިއްޔާއިން ބައިވެރިވާނެކަމަށް އޮތީ ބެލެވިފައެވެ.
ނަމަވެސް ސަޢުދީ ޢަރަބިއްޔާގެ ޚާރިޖީ ވަޒީރު، އަމީރު ފައިސަލް ބިން ފަރްޙާން އައްސައުދު ވިދާޅުވީ އިސްރާއީލާއިއެކު ސަޢުދީ ޢަރަބިއްޔާއިން ގުޅުން ބަދަހިކުރުމަށް ފުރިހަމަ ކުރަންޖެހޭ ޝަރުތަކީ ފަލަސްޠީނުގެ މިނިވަން ދަޢުލަތެއް ޤާއިމްކުރެވޭނެ ޞުލްޙައިގެ އެއްބަސްވުމެއް ޤާއިމްކުރުންކަމަށެވެ. އޭނާ އެހެން ވިދާޅުވީ އިޓަލީވިލާތުގެ ރޯމްގައި ކޮންމެ އަހަރަކުވެސް ބާއްވާ، ދުނިޔޭގެ ލީޑަރުން ބައިވެރިވެވަޑައިގަންނަވާ މެޑް2020 ފޯރަމްގައި އިންޓަނެޓު މެދުވެރިކޮށް ވާހަކަދައްކަވަމުންނެވެ.
ސަޢުދީ ޢަރަބިއްޔާގެ ޚާރިޖީ ވަޒީރު ވިދާޅުވީ އެފަދަ އެއްބަސްވުމަކާއި ހަމައަށް އަންނަންޖެހޭކަމަށާއި އެންމެ މުހިންމުކަމަކީ އެ ހިސާބަށް ވާޞިލްވުމަށްޓަކައި އިސްރާއީލާއި ފަލަސްޠީނުގެ އިސް ފަރާތްތައް އެއް މޭޒެއްގެ ދޮށަށް ގެނެސް އިންސާފުވެރި އެއްބަސްވުމަކާއި ހަމައަށް އައުމަށް މަޝްވަރާކުރުން ކަމަށެވެ.
ފައިސަލް ވިދާޅުވީ އިސްރާއީލާއިއެކު ގުޅުންބަދަހިކުރުމަކީ ސަޢުދީ ޢަރަބިއްޔާއިން އެކަމަކާއިމެދު ގިނަ ދުވަސްތަކެއް ވަންދެން ވިސްނަމުން ގޮސްފައިވާކަމެއްކަމަށާޢި އެ ޚިޔާލު އެންމެ ފުރަތަމަ މަޝްވަރާކުރީ 1982ވަނަ އަހަރުގައި އޭރުގެ ވަލީ އަހުދުގެ ގޮތުގައި ހުންނެވި ފަހުދު ރަސްގެފާނުކަމަށެވެ. ސަޢުދީ ޢަރަބިއްޔާއިން އަދިވެސް އެ ވިސްނުން ގެންގުޅޭކަމަށާއި އިސްރާއީލާއެކު ސަރަޙައްދީ އެހެން ޤައުމުތަކާއިއެކު އޮންނަފަދަ ގުޅުމެއް ބޭއްވުމަށް ބޭނުންވާކަމަށެވެ. ނަމަވެސް އެ ވިސްނުން ހަޤީޤަތަކަށް ހެދުމަށް އޮތް ހަމައެކަނި ގޮތަކީ ފަލަސްޠީނަށް މިނިވަން ދަޢުލަތެއް ޤާއިމްކުރެވުންކަމަށް އޭނާ ވިދާޅުވިއެވެ.
2002ވަނަ އަހަރުގެ ތެރޭގައި ސަޢުދީ ޢަރަބިއްޔާއިންވަނީ ގޮލާން އުސްބިންތަކާއި އިރުމަތީ ޤުދުސްއާއި ހުޅަނގު އައްސޭރި ހިމެނޭގޮތަށް އިސްރާޢީލުން އިސްތިޢުމާރުކޮށްފައިވާ ފަލަސްޠީނުގެ ބިންތަކުން އިސްރާއީލުން ފޭބުމުން ސަޢުދީ ޢަރަބިއްޔާއާއި އެހެން ޢަރަބި ޤައުމުތަކުން އިސްރާއީލާއިއެކު ގުޅުން ބަދަހިކުރުމަށް ހުށަހަޅާފައެވެ. އޭގެ ފަހުންވެސް އެ ހުށަހެޅުންވަނީ އަރަބި ލީގުގެ ފަރާތުން އެންޑޯޒުކޮށްފައެވެ. ނަމަވެސް އެ ހުށަހެޅުމަށް ޢަމަލުކުރަން ނުފަށާ އޮތީ އިސްރާއީލުން ފަލަސްޠީނުގެ ބިންތައް އަތުލުމުގައި އިތުރަށް ޙަރަކާތްތެރިވަމުން ދިޔުމުގެ ސަބަބުންނެވެ.
މެޑް2020ގެ ބައްދަލުވުމުގައި ވާހަކަދައްކަވަމުން ޤަތަރުގެ ޚާރިޖީ ވަޒީރު މުޙައްމަދު ބިން އަބްދުއްރަޙްމާން އައްޘާނީވަނީ ޔޫއޭއީއާއި ބަހުރައިނުން އިސްރާއީލާއިއެކު ޤާއިމްކޮށްފައިވާ ގުޅުންބަދަހިކުރުމުގެ އެއްބަސްވުމަކީ ފަލަސްޠީނުގެ ރައްޔިތުންނަށް އެހީތެރިވުމަށް ވެފައިވާ އެއްބަސްވުމެއްކަމަށް ޤަތަރުން ޤަބޫލުނުކުރާކަމަށެވެ. ޤަތަރާއި އިސްރާއީލާއިމެދު ގުޅުންބަދަހިކުރުމުގެ އެއްބަސްވުމެއް އެކުލަވާލާނަމަ އޭގެ މައި ޝަރުތަކަށްވާނީ ފަލަސްޠީނުގެ ރައްޔިތުން މިނިވަން ދަޢުލަތެއް ޤާއިމްކުރުންކަމަށްވެސް އޭނާ ވިދާޅުވިއެވެ.