އިނގިރޭސިވިލާތުން ފައިޒަރ ކުންފުނިން ތައްޔާރުކޮށްފައިވާ ކޯވިޑް-19 ވެކްސިން ބޭނުންކުރުމުގެ ހުއްދަ ދީފިއެވެ. މިއީ ކޯވިޑް-19އާއި ދެކޮޅަށް ތައްޔާރުކޮށްފައިވާ ވެކްސިނެއް ބޭނުންކުރުމުގެ ހުއްދަ ދިން ފުރަތަމަ ޤައުމެވެ.
އިނގިރޭސިވިލާތުގެ ސަރުކާރުން ނެރުރު ބަޔާނެއްގައި ބުނީ އެ ޤައުމުގެ ބޭސްފަދަ ތަކެތި ބޭނުންކުރުމުގެ ހުއްދަ ދޫކުރާ މެޑިސިންސް އެންޑް ހެލްތުކެއާ ޕްރޮޑަކްޓްސް ރެގިއުލޭޓަރީ އޭޖެންސީ (އެމްއެޒުއާރުއޭ)އިން ފައިޒާގެ ވެކްސިން ބޭނުންކުރުމުގެ ފެހި ސިގްނަލް ދީފައިވާކަމަށާއި އެ އިދާރާގެ ނިންމުން ސަރުކާރުން ބަލައިގެންފައިވާކަމަށެވެ. އެއާއިއެކު އަންނަ ހަފުތާއިން ފެށިގެން ޢާންމުންނަށް ވެކްސިން ދިނުމުގެ މަސައްކަތް ފަށާނެކަމަށް އިނގިރޭސިވިލާތުގެ ސަރުކާރުންވަނީ އިޢުލާނުކޮށްފައެވެ.
އިނގިރޭސިވިލާތުގެ ރައީސް ބޮރިސް ޖޮންސަންވަނީ ވެކްސިނަށް ޙުއްދަ ދިނުމަށް ނިންމާފައިވާ ނިންމުމަކީ އުފާވެރި ޚަބަރެއްގެ ގޮތުގައި ސިފަކުރައްވާފައެވެ. އޭނާ ވިދާޅުވީ ވެކްސިންގެ ޒަރިއްޔާއިން ލިބިދޭ ރައްކާތެރިކަމުގެ ސަބަބުން ބަލިމަޑުކަމުގެ މި ޙާލަތުން އަރައިގަނެ އާންމު ޙާލަތަށް ރުޖޫޢަވެ ޤައުމުގެ ހީނަރުވެފައިވާ އިޤްތިޞާދު ކޮޅަށް ޖެހުމަށް އެހީތެރިވެދޭނެކަމަށެވެ.
ވެކްސިން އެންމެ ފުރަތަމަ ދޭނީ މުސްކުޅިން ބަލަހައްޓައި މަރުކަޒުތަކުގައި ތިބޭ މީހުންނަށާއި ޞިއްޙީ ޚިދުމަތްތެރިންނަށާއި އުމުރުން ދުވަސްވީ މީހުންގެ އިތުރުން ބަލީގެ ނުރައްކަލަށް އެންމެ ބޮޑަށް ހުށަހެޅިފައިވާ މީހުންނަށްކަމަށް އިނގިރޭސިވިލާތުންވަނީ ނިންމާފައެވެ.
ފައިޒާއިން ބުނީ އިނގިރޭސިވިލާތުގެ ސަރުކާރުން ވެކްސިން ބޭނުންކުރުމުގެ ހުއްދަދިނުމަކީ ކޯވިޑް-19އާއި ދެކޮޅަށް ކުރަމުންދާ ހަނގުރާމައިގައި ތާރީޚީ ކުރިއެރުމެއްކަމަށެވެ. އެކަމަކީ ބައްޔާއި ދެކޮޅަށް ސައިންސުން ކުރި ހޯދާނެކަމަށް އެ ކުންފުނިން ބުނީއްސުރެ ޙާޞިލްކުރުމަށް މަސައްކަތްކުރަމުންދާ ލަނޑުދަނޑިކަމަށް އެ ކުންފުނިން ބުންޏެވެ. ކުރިއަށް އޮތްތަނުގައި އިތުރު ފަރާތްތަކުން ވެކްސިން ބޭނުންކުރުމުގެ ހުއްދަ ދޭނެކަމަށް އުންމީދުކުރާކަމަށް އެ ކުންފުނިން ބުންޏެވެ. އަދި ރައްކާތެރިކަމާއިއެކު ދުނިޔޭގެ ހުރިހާ ސަރަޙައްދަކަށް ފެންވަރު ރަނގަޅު ވެކްސިނެއް ފޯރުކޮށްދިނުމަކީ އެ ކުންފުނީގެ އަމާޒުކަމުގައި ފައިޒާއިން ބުންޏެވެ.
އެމެރިކާގައި މަރުކަޒުކޮށްފައިވާ ފައިޒާ ކުންފުންޏާއި އެ ކުންފުންޏާއިއެކު މަސައްކަތްކުރަމުންދާ ޖަރުމަނުވިލާތުގެ ބަޔޯއެންޓެކް ކުންފުނީގެ އިތުރުން އެމެރިކާގެ މޮޑާނާ ކުންފުނިންވަނީ ކޯވިޑް-19އާއި ދެކޮޅަށް އެ ކުންފުނިތަކުން ތައްޔާރުކޮށްފައިވާ ވެކްސިންތަކުގެ ތަހުލީލުތަކުން 90 އިންސައްތައަށްވުރެ މަތީ ނިސްބަތަކަށް އެ ވެކްސިންތައް މަސައްކަތްކުރާކަމަށް ބުނެފައެވެ. އެއީ ކުރިން އަންދާޒާކުރި ވަރަށްވުރެ ކާމިޔާބު ނަތީޖާއެކެވެ.
ދުނިޔޭގެ އެކި ސަރަޙައްދުތަކުގައި 64 މިލިއަނަށްވުރެ ގިނަ މީހުންނަށް ކޯވިޑް-19 ޖެހި 1.4 މިލިއަން މީހުންވަނީ އެ ބަލީގައި މަރުވެފައެވެ. އިނގިރޭސިވިލާތުގައި މިހާތަނަށް 1.65 މިލިއަން މީހުންނަށް ކޯވިޑް-19ޖެހި 59،699 މީހުންވަނީ މަރުވެފައިވާއިރު ފާއިތުވި 24 ގަޑިއިރުގެ ތެރޭގައި އެ ޤައުމުގައި 16،170 މީހުންނަށް ބަލިޖެހި 648 މީހުންވަނީ މަރުވެފައެވެ.