ރާއްޖޭގެ ފަތުރުވެރިކަމުގެ ސިނާއަތުގައި ޚިދުމަތްދޭ އެނދުގެ %71 ހުޅުވާލެވިއްޖެކަމަށާ، ވަރަށް އަވަހަށް އިތުރު އެނދުތައްވެސް ހުޅުވާލެވޭނެކަމަށް ޓޫރިޒަމް މިނިސްޓަރ ޑރ.ޢަބްދުﷲ މަޢުޞޫމް ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ޓޫރިޒަމް މިނިސްޓަރ ޢަބްދުﷲ މަޢުޞޫމް ވިދާޅުވީ، ކޯވިޑް-19ގެ މިޙާލަތުގައި އެންމެ އިސްކަމެއް ދެއްވީ ރާއްޖެއަށް ބޭރުގެ މާކެޓްތަކުން އޮންނަ އިތުބާރު ބޮޑުކުރުންކަމަށެވެ. ކޯވިޑް-19ގެ ޙާލަތުގައި އިޤްތިޞާދު އަވަހަށް ހުލުވައިލުން ނޫންގޮތެއް ނެތުމުން ރާއްޖެ ވެގެން ދިޔައީ އެންމެ ފުރަތަމަ ބޯޑަރު ހުޅުވާލި ޤައުމުތަކުގެ ތެރޭގައިކަން ފާހަގަކުރައްވައި މިނިސްޓަރ ވިދާޅުވީ އަންދާޒާ ކުރި މިންވަރަށްވުރެ އިތުރަށް ފަތުރުވެރިން ރާއްޖެ އަންނަމުންދާކަމަށެވެ.
މިނިސްޓަރ ވިދާޅުވީ މިހާރުގެ އެންމެ ބޮޑު އަމާޒަކީ ބަންދުކޮށް ނުހުޅުވައިހުރި ނުވަތަ ގެއްލުމުގައި ހިންގަމުން އަންނަ ފަތުރުވެރިކަމުގެ ޚިދުމަތްދޭ ތަންތަން ވީހާވެސް އަވަހަށް ހުޅުވުންކަމަށެވެ. މިގޮތުން މިހާރު މަސައްކަތްކުރަމުން ދަނީ މާލެ ސަރަހައްދުގެ ގެސްޓްހައުސް ވިޔަފާރި ފެށުމަށްކަން ފާހަގަކުރެއްވިއެވެ. މިނިސްޓަރ ވިދާޅުވީ ރާއްޖޭގެ ބޯޑަރުތައް ހުޅުވައިލިތާ 4 މަހެއްހައި ދުވަހުގެތެރޭގައި ފަތުރުވެރިކަމުގެ ޚިދުމަތްދޭ ފަނަރަ ހާސް އެނދުގެ ތެރެއިން %70 މިހާރު ޚިދުމަތްދިނުމަށް ހުޅުވާލާފައިވާކަމަށެވެ.
"މިހާރުވެސް ގެއްލުމުގައި ހިންގާ ފަތުރުވެރިކަމުގެ ފެސިލިޓީސްތަކުށް އެކަށީގެންވާ އޮކިއުޕެންސީއެއް ގެނެސް އިރާދަކުރެއްވިއްޔާ 2021ވަނަ އަހަރާ ކުރިމަތިލައި މަރުހަބާ ކިޔާނީ ހިނިތުންވެތިބެ. ހިނިތުންވެ ތިބެންޖެހޭ އިތުރު ސަބަބެއް މިއީ އެވޯޑް ލިބިގެން ދިއުމަކީވެސް." ޑރ.މަޢުޞޫމް ވިދާޅުވިއެވެ.
ފަތުރުވެރިކަމުގެ ދާއިރާއިން މުޅި ދުނިޔޭގެ އެންމެ ޝަރަފްވެރި އެވޯޑްކަމަށްވާ "ވޯލްޑް ލީޑިންގ ޑެސްޓިނޭޝަން" އެވޯޑް ފުރަތަމަ ފަހަރަށް ރާއްޖެއަށް ލިބުމުން އަންނަ އަހަރަކީ ކާމިޔާބު އަހަރަކަށް ވާނެކަމަށް އުއްމީދުކުރެވޭކަމަށް މިނިސްޓަރ މައުސޫމް ވިދާޅުވިއެވެ. އެގޮތުން އަންނަ އަހަރު އެއް މިލިއަން ޓޫރިސްޓުން ގެނެވޭނެކަމަށް ކުރާ އުއްމީދު މިނިސްޓަރ ތަކުރާރުކުރެއްވިއެވެ.
ކޯވިޑް-19ގެ ސަބަބުން ރާއްޖޭގައި ފަތުރުވެރިންނަށް ޚިދުމަތްދިނުމުގެ ތަންތަން ބަންދުކޮށްފައި އޮތުމަށްފަހު ރިސޯޓް އަދި ސަފާރީތައް އަލުން ހުޅުވުމުގެ ހުއްދަ ދީފައިވަނީ ޖުލައި މަހުގެ 15ވަނަ ދުވަހުއެވެ. އަދި ގެސްޓްހައުސްތައް ހުޅުވާލުމުގެ ހުއްދަ ދީފައިވަނީ އޮކްޓޯބަރ މަހުގެ 15ވަނަ ދުވަހުއެވެ.
ރާއްޖޭގެ ބޯޑަރު ހުޅުވާލިފަހުން މިހާތަނަށް 59 ހާހަށްވުރެ ގިނަ ފަތުރުވެރިން ވަނީ ރާއްޖެ ޒިޔާރަތްކޮށްފައެވެ.