އިލެކްޓޯރަލް ކޮލެޖުން ޖޯ ބައިޑަންއަށް ވޯޓު ދެއްވައިފިނަމަ ރިޔާސީ އިދާރާ، ވައިޓު ހައުސް ދޫކުރަށްވާ ވަޑައިގަންނަވާނެކަމަށް އެމެރިކާގެ ރިޔާސީ އިންތިޚާބުގައި ނާކާމިޔާބުވެ ވަޑައިގެންފައިވާ އެ ޤައުމުގެ މިހާރުގެ ރައީސް ޑޮނަލްޑް ޓްރަންޕު ވިދާޅުވެއްޖެއެވެ. ޓްރަންޕު އެހެން ވިދާޅުވީ އެމެރިކާގައި ފާހަގަކުރާ ޗުއްޓީއެއްގައި އެ ޤައުމުގެ އަސްކަރީ ފަރާތްތަކާއި މުޚާތަބުކުރައްވާ ވައިޓު ހައުސްގައި ދެއްކެވި ވާހަކައިގައެވެ.
މި މަހުގެ ކުރީ ކޮޅުގައި ބޭއްވި ރިޔާސީ އިންތިޚާބު ބޮޑު ތަފާތަކުން ކާމިޔާބުކުރައްވާފައިވަނީ ޑިމޮކްރަޓުންގެ ފަރާތުން ވާދަކުރެއްވި ޖޯ ބައިޑަންއެވެ. ރައީސްކަމުގެ މަޤާމު ހޯދުމަށް ބޭނުންވާ 270 އިލެކްޓޯރަލް ޔަޤީންކުރައްވާ ބައިޑަންވަނީ 302 އިލެކްޓޯރަލް ވޯޓު ކާމިޔާބު ކުރައްވާފައެވެ. އޭގެ ބަދަލުގައި ޓްރަންޕަށް ލިބިވަޑައިގެންފައިވަނީ 232 އިލެކްޓޯރަލް ވޯޓެވެ. މަޤުބޫލު ވޯޓުންވެސް 6 މިލިއަން ވޯޓުގެ ތަފާތަކާއިއެކު ކުރީގައި އުޅުއްވަނީ ބައިޑަންއެވެ.
ރައީސް ޓްރަންޕުވަނީ ރިޔާސީ އިންތިޚާބުގައި ބޮޑެތި އޮޅުވާލުންތަކެއް ހުރިކަމަށް ވިދާޅުވެ އިންތިޚާބުގެ ނަތީޖާ ބަލައިގަތުމަށް ދެކޮޅު ހައްދަވާފައެވެ. ނަމަވެސް އެކަމަށް ބާރުދޭ އެއްވެސް ހެއްކެއް ދައްކަވާފައެއް ނުވެއެވެ. ރައީސް ޓްރަންޕުގެ ކެންޕެއިނުގެ ފަރާތުންވަނީ އިންތިޚާބަށް މުހިންމު ގިނަ ސްޓޭޓުތަކެއްގައި ޤާނޫނީ މައްސަލަތައް ހުށަހަޅައި ވޯޓު ބާޠިލްކުރުމަށް މަސައްކަތްވެސް ކޮށްފައެވެ.
ޑިސެމްބަރު މަހުގެ 14ވަނަ ދުވަހު ބައްދަލުކުރުމަށް ހަމަޖެހިފައިވާ އިލެކްޓޯރަލް ކޮލެކުން ވޯޓުދޭ ގޮތަކުން ވައިޓު ހައުސް ދޫކުރަށްވާ ވަޑައިގަންނަވާނެކަމަށް ޓްރަންޕު ވިދާޅުވި ވިދާޅުވުމަކީ އިންތިޚާބުގައި ނާކާމިޔާބުވެފައިވާކަމަށް އިއުތިރާފުވުމާއި ގާތްކުރާފަދަ މޭރުކަމުން މިހާތަނަށް ވިދާޅުވި އެންމެ ވަރުގަދަ ބަސްފުޅެވެ.