ބަހްރައިނުގެ ވަލީޢަހުދު، ސަލްމާން އަލްޚާލީފާގެ ދަޢުވަތަކަށް ވަރަށް އަވަހަށް ބަހްރައިނަށް ޒިޔާރަޔްކުރައްވާނެކަމަށް އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ވިދާޅުވެއްޖެއެވެ.
މިދިޔަ ސެޕްޓެމްބަރު މަހުގެ ތެރޭގައި ޔޫއޭއީންވަނީ އެމެރިކާ މެދުވެރިވެ އިސްރާއީލާއެކު ގުޅުން ބަދަހިކުރުމުގެ އެއްބަސްވުމެއްގައި ސޮއިކޮށްފައެވެ. އޭގެ ފަހުން ބަހްރައިނުންވެސްވަނީ އިސްރާއީލާއިއެކު ގުޅުން ބަދަހުކުރުމަށް އެއްބަސްވެފައެވެ. އެމެރިކާއިން އިސް ދައުރެއް އަދާކޮށް އެކުލަވާލާފައިވާ އެ އެއްބަސްވުންތަކުގެ ބޭނުމަކީ މެދުއިރުމަތީގެ ޤައުމުތަކާއިއެކު އީރާނާއި ދެކޮޅަށް މަސައްކަތްކުރުންކަމަށް ބެލެވެއެވެ. އެ ދެ ޤައުމުން އިސްރާއީލާއިއެކު ގުޅުން ބަދަހިކުރުމުން ފަލަސްޠީނުގެ ރައްޔިތުންވަނީ އޭގެ ސަބަބުން މިނިވަން ދަޢުލަތެއް ޤާއިމްކުރުމަށް އެ ޤައުމުން ކުރަމުންދާ މަސައްކަތަށް ހުރަސްއެޅޭކަމަށް ބުނެ އެކަމާއި ނުރުހުން ފައުޅުކޮށްފައެވެ.
ބަްރައިނުގެ ވަލީއަހުދަށް ކުރެއްވި ފޯނުކޯލަކަށްފަހު ނެރުއްވި ބަޔާނެއްގައި ނަތަންޔާހޫ ވިދާޅުވީ ބަހުރައިނަށް ރަސްމީ ދަތުރުފުޅެއް ކުރެއްވުމަށް އެ ޤައުމުގެ ވަލީއަހުދު ދަޢުވަތުދެއްވާފައިވާކަމަށެވެ. އަދި އުފަލާއިއެކު އެ ދަޢުލަތު ޤަބޫލުކުރައްވާކަމަށް އޭނާ ވިދާޅުވިއެވެ.
ނޮވެމްބަރު މަހުގެ 18ވަނަ ދުވަހުގައި ބަހުރައިނުގެ ވަފުދެއްވަނީ ފުރަތަމަ ފަހަރަށް އިސްރާއީލަށް ދަތުރުކޮށްފައެވެ.