މައުލޫމާތު ހޯދާލިބިގަތުމުގެ ހައްޤުގެ ޤާނޫނުގެ ދަށުން ހުރިހާ ގޮތަކުން އެންމެ ފުރިހަމައަށް މައުލޫމާތު ފޯރުކޮށްދޭ ދައުލަތުގެ އިދާރާއަކަށާއި އިންފޮމޭޝަން އޮފިސަރަކަށް އެވޯޑެއް ދިނުމަށް ވިސްނާފައިވާކަމަށް އިންފޮމޭޝަން ކޮމިޝަނަރ ވިދާޅުވެއްޖެއެވެ.
މައުލޫމާތު ހޯދާ ލިބިގަތުމުގެ ބައިނަލްއަޤްވާމީ ދުވަހުގެ މުނާޞަބާ ފާހަގަ ކުރުމުގެ ގޮތުން އިންފޮމޭޝަން ކޮމިޝަނަރގެ އޮފީހުން ބޭއްވި ޚާއްޞަ ހަފްލާގައި ވާހަކަފުޅު ދައްކަވަމުން އިންފޮމޭޝަން ކޮމިޝަނަރ އަބުދުލްއަޒީޒު ޖަމާލު އަބޫބަކުރު ވިދާޅުވީ މިއެވޯޑް ނުވަތަ އިނާމު ހައްގުވާ ފަރާތެއް ހޮވާނީ ދައުލަތުގެ އިދާރާތަކުންނާއި އިންފޮމޭޝަން އޮފިސަރުން ކުރިޔަށްއޮތް އެއްއަހަރު ދުވަހުގެ ތެރޭގައި މައުލޫމާތު ފެތުރުމަށް ކުރާމަސައްކަތްތަކަށް ބެލުމަށްފަހު ކަމަށެވެ.
އަދި ރާއްޖެއަކީ މައުލޫމާތު ހޯދާލިބިގަތުމުގެ ޤާނޫނުގެ ދަށުން މިސަރަހައްދުން މިހައްޤު ލިބިދޭން ފެށި ދެވަނަ ޤައުމު ކަމަށްވީނަމަވެސް އަދިވެސް ރާއްޖޭގެ ޘަޤާފަތުގައި މިހައްޤަށް އެހާބޮޑު ހޭލުންތެރި ކަމެއް އުފެދިފައި ނެތްކަމަށްވެސް އެމަނިކުފާނު ވިދާޅުވިއެވެ. އެހެންކަމުން މިހާރު އިންފޮމޭޝަން ކޮމިޝަނަރގެ އޮފީހުން އެންމެ ފުޅާދާއިރާއިރާއެއްގައި ކުރަންޖެހިފައިވާ މަސައްކަތަކީ މިހައްޤަށް ހޭލުންތެރި ކުރުވުމުގެ މަސައްކަތްކަން އިންފޮމޭޝަން ކޮމިޝަނަރ އަބުދުލް އަޒީޒް ޖަމާލު އަބޫބަކުރު ފާހަގަކުރެއްވިއެވެ.
މީގެ އިތުރުން މައުލޫމާތު ފެތުރުމުގައި އިންފޮމޭޝަން ކޮމިޝަނަރުގެ އޮފީހުން އެންމެބޮޑަށް ބާރުއަޅަނީ ހާމަކުރަންޖެހޭ ހުރިހާ މައުލޫމާތެއް އެއޮފީހެއްގެ ވެބްސައިޓް މެދުވެރިކޮށް ހާމަކުރުމަށްކަމަށްވެސް އިންފޮމޭޝަން ކޮމިޝަނަރ ވިދާޅުވިއެވެ.
މިހަފްލާ ޝަރަފްވެރިކޮށްދެއްވާ ވަހަކަފުޅު ދައްކަވަމުން ރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑޮކްޓަރ މުހައްމަދު ލަޠީފް ވިދާޅުވީ މައުލޫމާތުގެ މައްޗަށް ހުރިހާކަމެއް ބިނާވެފައިވާ މިފަދަ ޒަމާނެއްގައި މައުލޫމާތު ހޯދާ ލިބިގަތުމުގެ ހައްޤަކީ ހުޅުވިފައިވާ ގޮތެއްގައި، ދެފުށްފެންނަ އަދި ޖަވާބުދާރީ ވެވޭގޮތެއްގައި ސަރުކާރު ހިންގުމަށް މަގުފަހިވެ، ކޮރަޕްޝަންގެ ހުއްޓުވުމަށް މަގުފަހިވާނެކަމަށް މުހިންމު އަސާސެއްކަމަށެވެ.
މިހަފްލާގައި ވާހަކަފުޅު ދައްކަވަމުން އެންޓިކޮރަޕްޝަން ކޮމިޝަންގެ މެންބަރު އައިމިނަތު މިންނާ ވިދާޅުވީ ކޮރަޕްޝަނަށް މަގުފަހިވާކަންކަން ހުއްޓުވާ ކަރޮޕްޝަން ހުއްޓުވުމަށް ކުރަންޖެހޭ އެންމެ މުހިންމު ކަމަކީ ދައުލަތް ހިނގަމުންދާ ގޮތުގެ މައުލޫމާތު ވީހާވެސް ހާމަކަންބޮޑު ގޮތުގައި ފޯރުކޮށް ދިނުންކަމަށެވެ.
މިހަފްލާގައި އިންފޮމޭޝަން ކޮމިޝަނުގެ ވެބްސއިޓް ތަޢާރަފްކުރުމާ، އިންފޮމޭޝަން ކޮމިޝަނަރުގެ އޮފީހަށް އެކިގޮތްގޮތުން އެންމެ އެހީތެރިކަން ފޯރުކޮށްދިން މުއައްޞަސާ ތަކާ ފަރާތްތަކުގެ އަގުވަޒަންކުރުމުގެ ގޮތުން ހަނދާނީ ލިއުން ހަވާލުކުރުންވެސްއޮތެވެ.
މީގެ އިތުރުން މައުލޫމާތު ހޯދާ ލިބިގަތުމުގެ ހައްޤުގެ ބައިނަލް އަޤްވާމީ ދުވަސް ފާހަގަ ކުރުމަށް ބޭއްވި ރޭޑިޔޯ ސުވާލު މުބާރާތުގެ ވަނަތައް ހާޞިލްކުރި ފަރާތްތަކަށް އިނާމާއި ހަނދާނީ ލިއުންދިނުމާއި، އަދި މައުލޫމާތު ހޯދާލިބިގަތުމުގެ ހައްޤާބެހޭ ގޮތުން ތައްޔާރުކޮށްފައިވާ ފޮތް "މައުލޫމާތުގެ މައުލޫމާތު" ފޮތް ނެރެދެއްވުމާއި މިހައްޤަށް ހޭލުންތެރި ކުރުމަށް ތައްޔާރުކޮށްފައިވާ ވީޑިޔޯ ކްލިޕް ތައާރަފްކުރުންވެސް މިހަފްލާގައި ކުރިޔަށްދިޔައެވެ.