ސައިބާ ބުލީ އާއި ދެކޮޅަށް އެޕެއް ހަދައިގެން ބަންގުލަދޭޝްގެ ފުރާވަރުގެ ކުއްޖަކަށް ޗިލްޑްރެންސް ޕީސް ޕްރައިޒް ލިބިއްޖެއެވެ.
ދަ އިންޓަނޭޝަނަލް ޗިލްޑްރެންސް ޕީސް ޕްރައިޒަކީ ކުޑަކުދިންގެ ހައްޤުތައް ރައްކާތެރިކުރުމަށް ޒުވާން ކުދިން ކުރާ މަސައްކަތް ފާހަގަކޮށް އަހަރަކު އެއްފަހަރު ދޭ އެވޯޑެކެވެ. މީގެ ކުރިން އެ އެވޯޑު ލިބިފައިވާ ކުދިންގެ ތެރޭގައި ތިމާވެށި ހިމާޔަތްކުރުމަށް އަޑުއުފުލަމުންދާ ސްވީޑަންގެ ގްރެޓާ ތަންބާގުވެސް ހިމެނެއެވެ.
އުމުރުން 17 އަހަރުގެ ސާދާތު ރަހުމާނަށް އިންޓަނެޓު މެދުވެރިކޮށް ގަނާކުރުމާއި ގުޅޭ ގޮތުން ޒުވާނުން ހޭލުންތެރިކުރުމަށް އެޕެއް ހެދުމުގެ ޚިޔާލު އައީ ގަނާކުރުމުގެ ސަބަބުން އުމުރުން 15 އަހަރުގެ ކުއްޖަކު ދަން ޖެހުނު ވާހަކަ އިވުނު ހިސާބުންނެވެ. ސާދާތު ދިރިއުޅޭ ޑިސްޓްރިކްޓުގައި ދިރިއުޅޭ ފުރާވަރު އުމުރުގެ 1،800އަށްވުރެ ގިނަ ކުދިން މިހާރު ދަނީ ސާދާތު އުފެއްދި އެޕު ބޭނުންކުރަމުންނެވެ.
ޝަރަފުވެރި ނޯބެލް ޕްރައިޒް ލިބިފައިވާ މަލާލާ ޔޫސުފްޒާއިވެސްވަނީ ސާދާތަކީ އެކުއްޖެއްގެ ފަރާތުން އެހެން މީހުންނަށް ހިތްވަރު ލިބޭ ޒުވާނެއްގެ ގޮތުގައި ސިފަކޮށްފައެވެ. މަލާލާ ބުނީ ސާދާތަކީ ހެޔޮ ބަދަލު ގެނައުމަށް މަސައްކަތްކުރަމުންދާ ކުއްޖެއްކަމަށެވެ. އޭނާ ގޮވާލަމުންދަނީ މުޅި ދުނިޔޭގެ ހުރިހާ ސަރަޙައްދެއްގައި ދިރިއުޅޭ ޒުވާނުންވެސް އިންޓަނެޓު މެދުވެރިކޮށް ގަނާކުރުން ހުއްޓާލައި، މުޖުތަމައުގައި އުޅޭ ނަފްސާނީ އަނިޔާ ލިބެމުންދާ ހުރިހާ ކުދިންނަށް އެހީތެރިވުމަށްކަމަށް މަލާލާ ބުންޏެވެ.
ސާދާތުގެ އެޕު، "ސައިބާ ޓީން" މެދުވެރިކޮށް ގަނާކުރުމުގެ ޝިކާރައަކަށްވެފައިވާ ކުދިންނަށް އެކުދިންނަށް ލިބެމުންދާ އަނިޔާ ސިއްރުން ރިޕޯޓު ކުރެވޭނެއެވެ. އެ މެސެޖު ދާނީ ދަރުމަވެރިންގެ ޓީމަކަށެވެ. އެ ޓީމުން މައްސަލަ ފުލުހުންނަށް ނުވަތަ ސޯޝަލް ވޯކަރުންނަށް ހުށަހަޅައެވެ. އެ ޓީމުން ކުރާ މަސައްކަތުގެ ތެރޭގައި ރައްކާތެރިކަމާއެކު އިންޓަނެޓު ބޭނުންކުރުމާއި ގުޅޭގޮތުން ފުރާވަރުގެ ކުދިންނަށް އަމާޒުކޮށްގެން ހޭލުންތެރިކަމުގެ ޕްރޮގުރާމުތައް ހިންގުންވެސް ހިމެނެއެވެ.
ސާދާތުގެ އެޕު ނެރުނު ފަހުން މިހާތަނަށް އިންޓަނެޓު މެދުވެރިކޮށް އަނިޔާ ލިބެމުންދިޔަ 300އަށްވުރެ ގިނަ ކުދިންނަށްވަނީ އެ އެޕު މެދުވެރިކޮށް އެހީތެރިކަން ފޯރުކޮށްދީފައެވެ. އެ އެޕު މެދުވެރިކޮށް ލިބޭ މަޢުލޫމާތު ބޭނުންކޮށްގެން އެކި މައްސަލަތަކުގައި މިހާތަނަށް އަށް މީހުންވަނީ ހައްޔަރުކޮށްފައެވެ. އޭގެ ތެރޭގައި އިންޓަނެޓު މެދުވެރިކޮށް ކުޑަކުދިންނަށް ޖިންސީ ފުރައްސާރަކުރާ ބޮޑެތި މީހުންވެސް ހިމެނެއެވެ.
ސާދާތު ވިސްނަނީ ޗިލްޑްރެންސް ޕީސް ޕްރައިޒްގެ އިނާމެއްގެ ގޮތުގައި ލިބިފައިވާ 100،000 ޔޫރޯ ބޭނުންކޮށްގެން އޭނާގެ ޤައުމުގެ ހުރިހާ ސަރަޙައްދަކަށް "ސައިބާ ޓީން" އެޕު ފުޅާކޮށް އެންމެންނަށް ފޯރުކޮށްދިނުމަށެވެ. އޭނާ ބުނީ އޭނާގެ އެޕަކީ ދުނިޔޭގެ އެހެން ސަރަޙައްދުތަކުގައި އޭގެ މައްޗަށް ބިނާކޮށް އެހެން އެޕުތައް ހެދުމަށް ބޭނުންކުރާ މިސާލަކަށްވާނެކަމަށް އުންމީދުކުރާކަމަށެވެ.
ސާދާތަށް ލިބުނު އެވޯޑު ބަލައިގަތުމަށްފަހު ވާހަކަ ދައްކަމުން އޭނާ ބުނީ ބަންގުލަދޭޝްގައި އިންޓަނެޓު ބޭނުންކުރާ ޒުވާނުންގެ ދެ ބައި ކުޅަ އެއްބައި ވަނީ ސައިބާ ބުލީ ތަޖުރިބާކޮށްފައިކަމަށެވެ. އެފަދަ ޙާލަތްތަކުގައި ބިރުގަތުމުގެ ސަބަބުންނާއި ކަންކުރަންވީ ގޮތާއިމެދު މަޢުލޫމާތު ލިބިފައިނުވާތީ އެގޮތަށް ލިބޭ އަނިޔާ ކަމާބެހޭ ފަރާތްތަކަމަށް ރިޕޯޓުކުރާ ޢަދަދު ވަރަށް މަދުކަމަށް އޭނާ ބުންޏެވެ.
"އަހަރެން ޤަބޫލުކުރަނީ ހޭލުންތެރިކަން އިތުރުކުރުމާއި އެހެން މީހުންގެ ތަޖުރިބާއާއި ޙާލަތާއިމެދު ހަމްދަރުދީވުމާއި ކައުންސިލިން ދިނުމާއި ފިޔަވަޅު އެޅުމަކީ ސައިބާ ބުލީ އާއި ދެކޮޅަށް ކުރާ މަސައްކަތުގެ އެންމެ މުހިންމު ބައިތައްކަމަށް. ސައިބާ ބުލީ އާއި ދެކޮޅަށް ކުރާ މަސައްކަތް މިއީ ހަނގުރާމައެއް ކުރުންފަދަ ކަމެއް. އަހަންނަކީ މި ހަނގުރާމަކުރާ ލަޝްކަރުގައި ހިމެނޭ ފަހުލަވާނުންގެ ތެރެއިން އެކަކު. އެންމެންވެސް އަހަންނަށް ވާގިވެރިވާނަމަ، އަހަރެމެން އެންމެންގެ މަސައްކަތުން މި ހަނގުރާ ކާމިޔާބު ކުރެވޭނެ'، ސާދާތު ބުންޏެވެ.