ފިލިޕީންސަށް ބާރުގަދަ ތޫފާނެއް އަރާ ހަ މީހުން މަރުވެ ގިނަ ޢަދަދެއްގެ މީހުން ޒަޚަމްވެއްޖެއެވެ.
ވެމްކޯގެ ނަމުން ނަންދީފައިވާ ބާރުގަދަ ތޫފާން ފިލިޕީންސަށް އެރީ ނޮވެމްބަރު މަހުގެ 11ވަނަ ދުވަހުގައެވެ. އެ ތޫފާނުގައި މިހާތަނަށް ހަ މީހުން މަރުވެފައި ވާއިރު 10 މީހުންވަނީ ވީނުވީއެއް ނޭނގި ގެއްލިފައެވެ. ފިލިޕީންސުގެ ފުލުހުން ބުނީ މަރުވި މީހުންގެ ތެރޭގައި އުމުރުން 68 އަހަރުގެ މީހަކާއި 79 އަހަރުގެ ދެ މީހުން ހިމެނޭކަމަށެވެ.
ތޫފާނުގެ ސަބަބުން މިހާތަނަށް 180،000އަށްވުރެ ގިނަ މީހުންވަނީ ރައްކާތެރި ސަރަޙައްދުތަކަށް ބަދަލުކޮށްފައެވެ. ކެޓަގަރީ 2ގެ ބާރުމިން ހުރި އެ ތޫފާނުގެ އަސަރު އެންމެ ބޮޑަށް ކޮށްފައިވަނީ މީގެ ދިހަ ދުވަސްކުރިން ފިލިޕީންސަށް އެރި ސުޕާ ޓައިފޫން ގޯނީގެ ސަބަބުން އެންމެ ބޮޑަށް ގެއްލުން ލިބުނު ސަރަޙައްދުތަކަށެވެ.
ފިލިޕީންސް އެތުމޮސްފެރިކް ޖިއޯފިޒިކަލް އެންޑް އެސްޓްރޯނޮމިކަލް ސާވިސަސް އެޑްމިނިސްޓްރޭޝަން (ޕަގަސާ)އިން ބުނީ ތޫފާނުގެ ސަބަބުން މޫދުގެ ލޮނުގަނޑު ދެ ތިން މީޓަރަށް އުފުލިފައިވާކަމަށާއި ރަށު ތެރޭގައި ފެންބޮޑުވެފައިވާކަމަށެވެ. ބޯ ވާރޭގެ ސަބަބުން ޗަކަފޭބުމުގެ ހާދިސާތައް މެދުވެރިވެދާނެކަމުގެ އިންޒާރުވެސް އެ އިދާރާއިންވަނީ ދީފައެވެ.
އިންޓަނޭޝަނަލް ފެޑަރޭޝަން އޮފް ރެޑް ކްރޮސް އެންޑް ރެޑް ކުރެސެންޓު ސޮސައިޓީން ބުނީ ތޫފާނުގެ ސަބަބުން ލުޒޯނަށް ލިބުނު ގެއްލުންތައް ވަރަށް ބޮޑުކަމަށެވެ. އެ ސަރަޙައްދުގައި ދިރިއުޅޭ 1.6 މިލިއަން މީހުންނަށް ސުޕާ ޓައިފޫން ގޯނިގެ ސަބަބުންވެސް ބޮޑެތި ގެއްލުންތަކެއް ވަނީ ލިބިފައެވެ. ތޫފާން ވެމްކޯއަކީ ފާއިތުވި ތިން ހަފުތާގެ ތެރޭގައި ޕިލިޕީންސަށް އައި އެފަދަ ފަސްވަނަ ތޫފާނެވެ.
ތޫފާނުގައި ގެދޮރު ގެއްލިފައިވާ 240،000އަށްވުރެ ގިނަ މީހުންގެ ޙާލަތާއި މެދު ކަންބޮޑުވުން ފައުޅުކޮށް، ރެޑު ކްރޮސް އިން ބުނީ ކޯވިޑް-19ގެ ސަބަބުން ފިލިޕީންސްގެ ޙާލަތު ގޯސްވެފައިވާތީ ސަރުކާރުގެ ފަރާތުންނަށް އާންމުންނަށް ބޭނުންވާ އެހީތެރިކަން ފޯރުކޮށް ދެވިދާނެކަމާއިމެދު ސުވާލު އުފެދޭކަމަށެވެ.
ފިލިޕީންސްގެ ދާޚިލީ ވުޒާރާއިން ބުނީ ހާލުގައި ޖެހިފައިވާ މީހުން ހޯދައި ސަލާމަތްކުރުމުގެ މަސައްކަތް ކުރިއަށްދާކަމަށެވެ. 25،000އަށްވުރެ ގިނަ ފުލުހުން އެ މަސައްކަތުގައި ބައިވެރިވަމުންދާކަމަށްވެއެވެ. ގިނަ ޢަދަދެއްގެ ގޭގޭގައި ފެންބޮޑުވުމުން އެ ގޭގެގެ ރައްޔިތުން ފުރާޅުމަތީގައި ތާށިވެފައި އެބަ ތިބިކަމަށް ކަމާބެހޭ ފަރާތްތަކުން ބުނެއެވެ. ނަމަވެސް މޫސުން ގޯސްވުމުގެ ސަބަބުން ހެލިކޮޕްޓަރު ބޭނުންކޮށްގެން މީހުން ސަލާމަތްކުރުމަށްވެސް ވަނީ ހުރަސްތަކާއި ކުރިމަތިވެފައެވެ.
އެންމެ ފަހުގެ މަޢުލޫމާތުތަކުން ދައްކާގޮތުގައި 411 ސަރަޙައްދެއްގައި ފެންބޮޑުވެފައިވާއިރު 519 ސަރަޙައްދަކުންވަނީ ކަރަންޓު ކެނޑިފައެވެ. އަދި 104 ސަރަޙައްދުން މުވާސަލާތީ ގުޅުންވަނީ ކެނޑިފައެވެ.
މޫސުމީ ބަދަލުގެ ސަބަބުން ތޫފާންތަކުގެ ބަރުގަދަވެ އެ ތޫފާންތަކުގެ ސަބަބުން ލިބޭ ގެއްލުންތައް ބޮޑުވާކަމަށް ސައިންސުވެރިންދަނީ ފާހަގަކުރަމުންނެވެ. މިދިޔަ މެއި މަހުގެ ތެރޭގައި ޝާއިޢުކޮށްފައިވާ ދިރާސާއެއްގައި ބުނީ މޫސުމީ ކާރިސާގެ ސަބަބުން ދުނިޔެ ހޫނުވުމުގެ ނަތީޖާއެއްގެ ގޮތުން ގުދުރަތީ ކާރިސާތަކުން ލިބޭ ގެއްލުން އިތުރުވަމުންދާކަމަށެވެ.
ތޫފާން ވެމްކޯ މިހާރު ދަތުރު ކުރަމުންދަނީ ފިލިޕީންސާއި ދުރަށެވެ. އެ ތޫފާން ދެން އަރާނެކަމަށް ބެލެވެނީ ވިއެޓުނާމަށެވެ. މި ހަފުތާ ބަންދުތެރޭގައި ވިއެޓުނާމަށް ތޫފާން ވެމްކޯ ފޯރާނެކަމަށް މޫސުމާބެހޭ އިދާރާތަކުން ބުނެއެވެ.