ނޮވެމްބަރު މަހުގެ 3ވަނަ ދުވަހު ބޭއްވި އެމެރިކާގެ ރިޔާސީ އިންތިޚާބުގައި ޖޯޖިއާ ސްޓޭޓުގައި ލާފައިވާ ވޯޓު އަލުން ގުނުމަށް ނިންމާފައިވާކަމަށް ޖޯޖިއާގެ ސެކެޓްރީ އޮފް ސްޓޭޓު ވިދާޅުވެއްޖެއެވެ. އެ ސްޓޭޓުގައި ލާފައިވާ ވޯޓުތައް ގުނާނީ މެޝިނު ބޭނުންކުރުމުގެ ބަދަލުގައި އަތުންނެވެ.
ވަރަށް ކުޑަ ތަފާތަކާއިއެކު ޖޯޖިއާގައި ކުރި ހޯއްދަވާފައިވަނީ ޑިމޮކްރަޓުންގެ ފަރާތުން ވާދަކުރެއްވި ޖޯ ބައިޑަންކަމަށް ގިނަ ނޫސް އިދާރާތަކަކުންވަނީ އިޢުލާނުކޮށްފައެވެ.
ޖޯޖިއާގެ ސެކެޓްރީ އޮފް ސްޓޭޓު އަދި ރިޕަބްލިކަނެއްކަމަށްވާ ބްރެޑް ރަފެންސް ޕާގާ ވިދާޅުވީ ދެވަނަ ދައުރަކަށް ކުރިމަތިލެއްވި އެމެރިކާގެ ރައީސް ޑޮނަލްޑް ޓްރަންޕާއި ޖޯ ބައިޑަނަށް ލިބިފައިވާ ވޯޓުގެ ޢަދަދުގައި ހުރި ފަރަގު ކުޑަކަމުން އެ ސްޓޭޓުގެ ކޮންމެ ކައުންޓީއެއްގައި މެޝިން ބޭނުންނުކޮށް ވޯޓު ގުނަންޖެހޭނެކަމަށެވެ. އޭގެ ބޭނުމަކީ ނަތީޖާއާއި މެދު އިތުބާރު އިތުރުކުރުންކަމަށް އޭނާ ވިދާޅުވިއެވެ. ވޯޓު އަލުން ގުނުމުގެ އިތުރުން އިންތިޚާބާއި ގުޅޭ އޯޑިޓަކާއި އިތުރަށް ބަލަންޖެހޭ ކަންކަން އެކުއެކީގައި ބަލާނެކަމަށް އޭނާ ވިދާޅުވިއެވެ.
ވޯޓު އަލުން ގުނުމަށް ނިންމާފައިވާކަމަށް ރަފެންސްޕާގާ އިޢުލާނުކުރައްވާފައިވަނީ އިންތިޚާބު ނާކާމިޔާބުވެފައިވާ ރައީސް ޓްރަންޕު އެކަމަށް ވަރަށް ބޮޑަށް ބާރުއަޅުއްވަމުންދާ ދަނޑިވަޅެއްގައެވެ. އިންތިޚާބުގެ ކަންކަން ރަނގަޅަށް ކުރިއަށް ގެންގޮސްފައިނުވާކަމަގެ ތުހުމަތުތަކާއި މަޤާމުން އިސްތިޢުފާ ދެއްވުމަށްވެސް ޖޯޖިއާގެ ރިޕަބްލިކަނުންނަށް ނިސްބަތްވާ ގިނަ ޢަދަދެއްގެ ބަޔަކުވަނީ ރަފެންސްޕާގާއަށް ގޮވާލައިފައެވެ. ނަމަވެސް ވޯޓު އަލުން ގުނުމަށް ނިންމާފައިވަނީ ފިއްތުންތަކުގެ ސަބަބުން ނޫންކަމަށް ރަފެންސްޕާގާވަނީ ވިދާޅުވެފައެވެ.
ރަފެންސްޕާގާ ވިދާޅުވީ ނޮވެމްބަރު މަހުގެ 20ވަނަ ދުވަހުގެ ކުރިން ވޯޓު އަލުން ގުނާ ނިމޭނެކަމަށް ޤަބޫލުކުރައްވާކަމަށެވެ. އެއީ އިންތިޚާބު ކާމިޔާބުކުރެއްވީ ކޮން ފަރާތެއްކަން ރަސްމީކޮށް އިޢުލާނުކުރަންޖެހޭ ތާރީޚެވެ. ރައީސް ޓްރަންޕާއި އޭނާގެ ކެންޕެއިނުން މަސައްކަތްކުރައްވަމުން ގެންދަވަނީ ބައެއް ސްޓޭޓުތަކުގައި އިންތިޚާބު ކާމިޔާބުކުރެއްވި ފަރާތް ރަސްމީކޮށް އިޢުލާނުކުރާ ތާރީޚު ނޮވެމްބަރު މަހުގެ 20ވަނަ ދުވަހަށްވުރެ ފަސްކުރުމަށް މަސައްކަތްކުރަމުންނެވެ.