ފައިޒާ ޖަރުމަނުވިލާތުގެ ބަޔޯއެންޓެކު ކުންފުނިން ކޯވިޑް-19އާ ދެކޮޅަށް ތައްޔާރުކުރަމުންދާ ވެކްސިން ވަރަށް ކާމިޔާބުކަމަށް ސައިންސުވެރިން ބުނެފިއެވެ.
ފައިޒާއާއި ބަޔޯއެންޓެކުން ތައްޔާރުކުރަމުންދާ ވެކްސިންގެ ތަހުލީލުތަކުގައި 43،000އަށްވުރެ ގިނަ މީހުންވަނީ ބައިވެރިވެފައެވެ. އޭގެ ތެރެއިން ފުރަތަމަ ކޯވިޑް-19 ޖެހުނު 94 މީހުންގެ ނަތީޖާ ސައިންސްވެރިންވަނީ ދިރާސާކޮށްފައެވެ. އެގޮތުން ބަލިޖެހުނު 94 މީހުންގެ ތެރެއިން 90އިންސައްތަ މީހުންނަކީ ތަހުލީލުގައި ހަގީގީ ވެކްސިންގެ ބަދަލުގައި ޕްލެސީބޯ ދީފައިވާ މީހުންކަމަށް ތަހުލީލުތަކުގެ ފުރަތަމަ ނަތީޖާތަކުންވަނީ ދައްކާފައެވެ.
އެ ދެ ކުންފުނިން ބުނީ ވެކްސިންގެ ރައްކާތެރިކަމާއި މެދު ސުވާލު އުފެދޭ އެއްވެސް ނަތީޖާއެއް މިހާތަނަށް ފެނިފައިނުވާކަމަށެވެ. ކުއްލި ޙާލަތްތަކުގައި ބޭނުންކުރުމަށް އެ ވެކްސިނަށް އެމެރިކާއިން ޙުއްދަދޭނެކަމަށް ޤަބޫލުކުރާކަމަށް އެ ކުންފުނިން ބުންޏެވެ.
ކުއްލި ޙާލަތުގައި ވެކްސިން ބޭނުންކުރުމުގެ ޙުއްދައަށް އެދުމަށް ގާތްގަނޑަކަށް ދެމަސް ދުވަހުގެ ތެރޭގައި ލިބިފައިވާ ނަތީޖާތައް ބޭނުންވާނެއެވެ. އެއީ ތަހުލީލުގައި ބައިވެރިވެފައިވާ މީހުންގެ ދެބައި ކުޅަ އެއްބައި ނުވަތަ 22،000 މީހުންގެ ނަތީޖާއެވެ. ކުރިއަށް އޮތް އެއް މަސްދުވަހުގެ ތެރޭގައި އެ ޢަދަދަށް ނަތީޖާ ލިބޭނެކަމަށް ބެލެވޭކަމަށް ސައިންސްވެރިން ބުނެއެވެ. އެމެރިކާއިން އެފަދަ ޙުއްދައެއް ދީފިނަމަ އެންމެ ފުރަތަމަ ވެކްސިން ދޭނީ މަދު ޢަދަދެއްގެ މީހުންނަށެވެ. ވެކްސިންގެ ސަބަބުން ހަށިގަނޑުގައި ވައިރަހާއި ދެކޮޅަށް ދިފާޢީ ބާރު އުފެދެނީ ކިހާ ދުވަހަކުން ކަމެއް އަދި ހޯދިފައެއް ނުވެއެވެ.
ވެކްސިން ދިރާސާކުރުމުގައި ޙަރަކާތްތެރިވާ ސައިންސްވެރިންވަނީ އެ ވެކްސިންގެ ތަހުލީލުގެ ފުރަތަމަ ނަތީޖާތައް ހީކުރި މިންވަރަށްވުރެ މާބޮޑަށްވެސް ރަނގަޅުކަމަށް ބުނެފައެވެ. އިޓަލީގެ ސަޕިއެންޒާ ޔުނިވަސިޓީގެ ގައިންގަޔަށް އަރާ ބަލިތަކާއިބެހޭ ޕުރޮފެސަރަ ގުލޯރިއާ ތަލިއާނީ ވިދާޅުވީ ތަހުލީލުގެ ނަތީޖާއަކީ ވަރަށް ބޮޑު ކުރިއެރުމެއްކަމަށާއި އޭނާއަށް ކުރިން ޤަބޫލުކުރެވިފައި އޮތީ ވެކްސިން ކާމިޔާބުވާނީ 75 އިންސައްތައަށްކަމަށެވެ.
ކޮރޯނާ ވައިރަހާއި ދެކޮޅަށް އުފައްދާ ވެކްސިނެއްގެ ކާމިޔާބުވާ ނިސްބަތް ނުވަތަ އެފިކަސީ ރޭޓު ހުންނަންވާނީ 50 އިންސައްތައަށްވުރެ މަތީގައިކަމަށް އެމެރިކާގެ ފުޑް އެންޑް ޑުރަގު އެޑްމިނިސްޓްރޭޝަނުންވަނީ ނިންމާފައެވެ. ވެކްސިންގެ އެފިކަސީ ނިސްބަތް މިހާރުވެސް އެއަށްވުރެ މާ ބޮޑަށް މަތީގައި އުޅޭއިރު އެ ނަތީޖާ އިތުރަށް ޔަޤީންކުރުމަށް ތަހުލީލުގައި ބައިވެރިވާ މީހުންގެ ތެރެއިން 164 މީހުންނަށް ކޯވިޑް-19 ޖެހެންދެން ތަހުލީލުތައް ކުރިއަށް ގެންދާނެކަމަށް އެ ކުންފުނިތަކުން ބުންޏެވެ. އެމެރިކާގައި މިހާރު ފެތުރޭ ހަލުވިމިނުގައި ބަލި ފެތުރޭނަމަ ޑިސެމްބަރު މަހުގެ ކުރީކޮޅުގައި އެ ޢަދަދަށް މީހުންނަށް ބަލިޖެހޭނެކަމަށް ޤަބޫލުކުރެވެއެވެ.
ކޯވިޑް-19ގެ ސަބަބުން އެންމެ ޙާލަތު ގޯސްވެފައިވާ އެމެރިކާއިންވަނީ ފައިޒާއާއި ބަޔޯއެންޓެކުގެ ވެކްސިން ގަތުމަށް 1.95 ބިލިއަން އެމެރިކާ ޑޮލަރުގެ އެއްބަސްވުމެއްގައި ސޮއިކޮށްފައެވެ. އެ އެއްބަސްވުމުގެ ދަށުން މި އަހަރުން ފެށިގެން ވެކްސިންގެ 100 މިލިއަން ޑޯޒު އެމެރިކާއަށް ފޯރުކޮށްދޭންޖެހޭނެއެވެ. ވިލާތުގެ އިއްތިޙާދާއި އިނގިރޭސިވިލާތާއި ކެނެޑާއާއި ޖަޕާނާއިއެކުވެސް ފައިޒާއާއި ބަޔޯއެންޓެކުންވަނީ އެފަދަ އެއްބަސްވުންތަކެއް ޤާއިމްކޮށްފައެވެ.
ވަގުތު ސަލާމަތްކުރުމުގެ ގޮތުން ދެ ކުންފުނިންވަނީ ވެކްސިންގެ ކާމިޔާބުކަން ޔަޤީން ނުވަނީސް އެ ވެކްސިން ބާޒާރަށް ނެރުމަށް ވާންޖެހޭ ތައްޔާރީތައްވެސް ވެފައެވެ. އަދި ވެކްސިން އުފެއްދުމުގެ މަސައްކަތްވަނީ ފަށައިފައެވެ.
މި އަހަރު ނިމުމުގެ ކުރިން ވެކްސިންގެ 50 މިލިއަން ޑޯޒު ތައްޔާރުކުރެވޭނެކަމަށް އެ ދެ ކުންފުނިން ޤަބޫލުކުރެއެވެ. އަދި 2021ވަނަ އަހަރުގެ ތެރޭގައި ވެކްސިންގެ 1.3 ބިލިއަން ޑޯޒު ތައްޔާރުކުރާނެކަމުގެ ޔަޤީންކަން އެ ކުންފުނިތަކުން ދެއެވެ.