ޔުކުރެއިނުގެ ރައީސް ވޮލޮޑިމީރު ޒެކެންސްކީއަށް ކޯވިޑް-19 ޖެހިއްޖެއެވެ.
ރައީސް ޒެލެންސްކީއަށް ކޯވިޑް-19 ޖެހިފައިވާކަމަށް އެމަނިކުފާނު އިޢުލާނުކުރެއްވީ ނޮވެމްބަރު މަހުގެ ނުވަވަނަ ދުވަހުގައެވެ. އޭނާ ވިދާޅުވީ ރައްކާތެރިކަމުގެ ގިނަ ފިޔަވަޅުތަކާއެކުވެސް ކޯވިޑް-19 ޖެހިފައިވާކަމަށާއި ހުމުގެ އަސަރު ހުރިކަމަށެވެ. ޔުކުރެއިނުގެ ރިޔާސީ އިދާރާއިން ނެރުނު ބަޔާނެއްގައި ބުނީ ރައީސް ޒެލެންސްކީގެ ޙާލުކޮޅު ރަނގަޅުކަމަށާއި އެކަހެރިވެވަޑައިގެން ހުންނަވާ މަޤާމުގެ މަސްޢޫލިއްޔަތު ޢަދާކުރެއްވުމުގައި ދެމިހުންނަވާނެކަމަށެވެ.
ރައީސް އިތުރުން އެ ޤައުމުގެ މާލީ ވަޒީރު ސާހީ މާޝެންކޯއަށާއި ދިފާޢީ ވަޒީރު އަންދުރީ ތަރަން އަދި ރައީސްގެ ވަރަށް އަރިސް އިތުރު ބޭފުޅަކަށްވެސްވަނީ ކޯވިޑް-19 ޖެހިފައެވެ. ރައީސަށް ކޯވިޑް-19 ޖެހިފައިވާކަމަށް އިޢުލާނުކުރެއްވުމުގެ އިރުކޮޅެއްފަހުން ރިޔާސީ އިދާރާގެ އިސްވެރިޔާ، އަންދުރީ ޔާމަކުވެސްވަނީ އޭނާއަށް ކޯވިޑް-19 ޖެހިފައިވާކަމަށް ވިދާޅުވެފައެވެ.
ނޮވެމްބަރު މަހުގެ ފަސްވަނަ ދުވަހުގައި ޔުކުރެއިނުގެ ބޮޑުވަޒީރު ޑެނީސް ޝްމީގަލްއާއި ވަޒީރުންގެ މަޖިލީހުންވަނީ ޤާނޫނު ހަދާ މަޖިލީހުގެ ބައްދަލުވުމެއްގައި ބައިވެރިވެވަޑައިގެންފައެވެ. ބޮޑުވަޒީރުގެ ކިބައިން ކޯވިޑް-19ގެ ޢަލާމަތެއް މިހާތަނަށް ފެނިފައި ނުވިނަމަވެސް ކޯވިޑް-19އަށް ތަހުލީލުކުރައްވާނެކަމަށް ބޮޑުވަޒީރުގެ ރަސްމީ އިދާރާއިން ބުންޏެވެ.
ޔުކުރެއިނުގައި މިހާތަނަށް 469،018 މީހުންނަށް ކޯވިޑް-19ޖެހި 8،565 މީހުންވަނީ މަރުވެފައެވެ. ފާއިތުވި 24 ގަޑިއިރުގެ ތެރޭގައި އެ ޤައުމުގައި 8،687 މީހުންނަށް ބަލިޖެހި 115 މީހުންވަނީ މަރުވެފައެވެ. މިދިޔަ ސެޕްޓެމްބަރު މަހުގެ ފަހުކޮޅުގައި ޔުކުރެއިނުގެ ޙާލަތު ގޯސްވެ، އޮކްޓޯބަރު މަހުގައި އަދި މި މަހުގެ ފުރަތަމަ ހަފުތާގައި ބަލިޖެހޭ މީހުންގެ ޢަދަދު ދަށްވެފައި ނުވާތީ އެ ޤައުމުގައި އަޅާފައިވާ ފުރަބަންދުގެ ފިޔަވަޅުތައް މި އަހަރުގެ ނިޔަލަށް ދެމެހެއްޓުމަށް އެ ޤައުމުގެ ސަރުކާރުންވަނީ ނިންމާފައެވެ.
ޔުކުރެއިނުގް ޞިއްޙަތާއިބެހޭ ވަޒީރު މިދިޔަ ހަފުތާގައި ވިދާޅުވީ ޤައުމުގެ ޙާލަތު ބޮޑު ކާރިޘާއަކަށް ބަދަލުވެދާނެކަމަށާއި އެންމެ ގޯސް ޙާލަތަކަށް ތައްޔާރުވެ ތިބެންޖެހޭކަމަށެވެ.