އަންނަ ޖަނަވަރީ މަހުގެ 20ވަނަ ދުވަހު މި އަހަރުގެ އެމެރިކާގެ ރިޔާސީ އިންތިޚާބު ކާމިޔާބުކުރައްވާފައިވާ ޖޯ ބައިޑަން ރައީސްކަމުގެ މަޤާމާއި ޙަވާލުވެވަޑައިގަތުމުން މިހާރުގެ ރައީސް ޑޮނަލްޑް ޓްރަންޕަށް ޓްވިޓާގައި ލިބިފައިވާ ޚާއްޞަ އިމްތިޔާޒުތައް ގެއްލޭނެކަމަށް ޓްވިޓާއިން ބުނެފިއެވެ.
ޓްވިޓާ ބޭނުންކުރާ ފަރާތްތަކުން އެ ޕުލެޓުފޯމު ބޭނުންކުރުމުގެ ޤަވާއިދުތަކާއި ޚިލާފުވާފަދަ ޕޯސްޓުތައް ޝާއިޢުކުރާނަމަ ޓްވިޓާއިން އެފަދަ ޓްވީޓުތައް އެއްކޮށް ފޮހެލައެވެ. ނަމަވެސް ދުނިޔޭގެ ލީޑަރުންނާއި އިންތިޚާބުތަކަށް ކުރިމަތިލާފައިވާ ކެންޑިޑޭޓުންނާއި ސަރުކާރުގެ ރަސްމީ ފަރާތްތަކުން ޝާޢިއުކުރާ އެފަދަ ޕޯސްޓުތައް އެއްކޮށް ފޮހެލުމުގެ ބަދަލުގައި ޓްވީޓާއިން އެ ޕޯސްޓުތަކުގައި ނޯޓިހެއްޖަހައި އެ ޕޯސްޓުތައް ފޮރުވާލައެވެ. އަދި އެ ޕޯސްޓުތައް ފެންނަ މީހުންގެ ޢަދަދު މަދުކުރުމަށް ފިޔަވަޅުތަކެއް އަޅައެވެ.
ޓްވިޓާއިން ބުނީ މީގެ ކުރިން އިސް މަޤާމުތައް ފުރުއްވާ ބޭފުޅުންނަށް އެ އިމްތިޔާޒު ނުލިބޭނެކަމަށެވެ.
ތަފާތު އެކިފަރަހުގެ މަތިން ޓްވީޓާއިން މީގެ ކުރިންވަނީ ރައީށް ޓްރަންޕުގެ ޓްވީޓުތަކުގައި ނޯޓިސް ޖަހާފައެވެ. އެގޮތުން ރައީސް ޓްރަންޕުގެ ޓްވީޓެއް އެންމެ ފުރަތަމަ ފޮރުވާފައިވަނީ މިދިޔަ މެއި މަހުގެ ތެރޭގައެވެ. އެ ފަހަރު ރައީސް ޓްރަންޕުވަނީ ހަމަނުޖެހިމާއި އަނިޔާއަށް ހިތްވަރުދީ ޓްވީޓެއް ކުރައްވާފައެވެ. އެއީ ޓްވިޓާގެ ޤަވާއިފާއި ޚިލާފުވާ ޓްވީޓެކެވެ.
މަޝްހޫރު މީސްމީޑިޔާ ޕްލެޓުފޯމެއްކަމަށްވާ ފޭސްބުކުންވެސް ވެރިކަމާއި ބައިޑަން ޙަވާލުވެވަޑައިގަންނަވާ ހިސާބުން ފެށިގެން ރައީސް ޓްރަންޕު ކުރައްވާ ޓްވީޓުތަކުގައި ސައްޙަނޫން މަޢުލޫމާތު ހުރިތޯ ޗެކުކުރާނެއެވެ. ފޭސްބުކުގެ އޮންލައިން ޕޮލިސީތައް ބުނާގޮތުގައި ސިޔާސީ ލީޑަރުންގެ ތެރެއިން 'ފެކްޓު ޗެކު'ކުރާ ޕޯސްޓުތަކުގެ ތެރޭގައި ނުހިމެނޭނީ މަޤާމަށް ވާދަކުރައްވާ ބޭފުޅުންނާއި، މިހާރު މަޤާމުގައި ހުންނެވި ބޭފުޅުންނާއި ވަޒީރުންނާއި ސިޔާސީ ޕާޓީތަކާއި އެ ޕާޓީތަކުގެ ލީޑަރުންގެ ޕޯސްޓުތަކެވެ. އޭގެ ތެރޭގައި ކުރީގައި މަޤާމުތައް ފުރުއްވާފައިވާ ބޭފުޅުންނާއި އެ މަޤާމުތަކަށް ކުރިމަތިލައްވާފައިވާ ބޭފުޅުން ނުހިމެނޭނެކަމަށް އެ ސިޔާސަތުގައިވަނީ ބަޔާންކޮށްފައެވެ.