އެމެރިކާގެ ރިޔާސީ އިންތިޚާބު ކާމިޔާބުކުރައްވާފައިވާ ޖޯ ބައިޑަންގެ ރަނިންގ މޭޓުގެ ގޮތުގައި އިންތިޚާބުގައި ވާދަކުރެއްވި ކެލިފޯނިއާގެ ސެނެޓަރު، ކަމާލާ ހެރިސްގެ ނަން އެމެރިކާގެ ތާރީޚުގައި ފެވިއްޖެއެވެ.
ކަމާލާ ހެރިސްއަކީ އެމެރިކާގެ ތާރީޚުގައިވެސް ނައިބު ރައީސެއްގެ މަޤާމަށް ހޮވިވަޑައިގެންނެވި ފުރަތަމަ އަންހެން ކަންބަލެވެ. އެ މަޤާމަށް އެކަމަނާ ހޮވިވަޑައިގަތުން އިތުރަށް ޚާއްޞަވާ ސަބަބަކީ އެކަމަނާއަކީ ތަމަޅަ އަދި ކަޅު ނަސްލަށް ނިސްބަތްވެވަޑައިގަންނަވާ ބޭފުޅަކަށްވުމެވެ. އެހެންކަމުން މިއީ ކަޅު ނަސްލަށް ނިސްބަތްވާ ބޭފުޅަކު އެމެރިކާގެ ނައިބު ރައީސްގެ މަޤާމަށް ވަޑައިގަންނަވާ ފުރަތަމަ ފަހަރަށް ވެގެންދާނެއެވެ. ޖެމެއިކާގެ ބައްޕައަކަށާއި އިންޑިޔާގެ މަންމައަކަށް އުފަން ހެރިސްއަކީ ދެކުނު އޭޝިޔާ ސަރަޙައްދަށް ނިސްބަތްވާ ބޭކަނބަލަކަށް ވުމުން މިއީ ދެކުނު އޭޝިޔާއަށް ނިސްބަތްވާ މީހަކު އެމެރިކާގެ އެފަދަ މަޤާމަކަށް އައި ފުރަތަމަ ފަހަރުވެސްމެއެވެ.
ނައިބު ރައީސްގެ ގޮތުގައި ހޮވިވަޑައިގަތުމުގެ ކުރިން ހެރިސް ހުންނެވީ އެމެރިކާގެ ޤާނޫނު ހަދާ މަޖިލިހުގެ މަތިގޭގެ މެންބަރުންގެ ތެރެއިން ކަޅު ނަސްލަށް ނިސްބަތްވަޑައިގަންނަވާ ހަމައެކަނި އަންހެން ބޭފުޅާގެ ގޮތުގައެވެ. ހެރިސަކީ ޑިމޮކްރަޓިކު ޕާޓީގެ އެންމެ މުހިންމު އެއް މެންބަރެވެ.
އުމުރުން 55 އަހަރުގެ ހެރިސަކީ ޑިމޮކްރަޓިކް ޕާޓީގެ ރިޔާސީ ޓިކެޓު ހޯއްދެވުމަށް ޕާޓީގެ ޕުރައިމަރީގައި ބައިޑަންއާ ދެކޮޅަށް ވާދަކުރެއްވި ބޭފުޅެކެވެ. ރިޔާސީ ޓިކެޓު ހޯއްދެވުމަށް ކުރެއްވި މަސައްކަތް ނާކާމިޔާބުވުމުން، އޭގެ ފަހުން ނައިބު ރައީސްގެ މަޤާމަށް ބައިޑަންގެ އަރިހުގައި ވާދަކުރައްވާނީ ހެރިސްކަމަށް ބައިޑަންވަނީ ނިންމަވާފައެވެ. އޭރު ބައިޑަން ވިދާޅުވީ ހެރިސްއަކީ ޤައުމުގެ ޙައްޤުގައި ކެރިގެން މަސައްކަތްކުރައްވާ ބޭފުޅެއްކަމަށާއި އެންމެ ރަނގަޅު މަދަނީ މަސައްކަތްތެރިންގެ ތެރޭގައި ހިމެނިވަޑައިގަންނަވާ ބޭފުޅެއްކަމަށެވެ. އެމެރިކާގެ ނައިބު ރައީސްގެ މަޤާމަށް ކަޅު ނަސްލަށް ނިސްބަތްވާ އަންހެން ބޭފުޅަކު އިންތިޚާބުވުމަކީ އެތައް މިލިއަން އަންހެނުންނަކަށް ހިތްވަރު ލިބިދޭނެކަމެއްކަމަށް ގިނަ ބަޔަކު ޤަބޫލުކުރެއެވެ.