އެމެރިކާގެ ރިޔާސީ އިންތިޚާބުގައި ޖޯޖިއާގެ ވޯޓުތައް އަލުން ގުނުމަށް ނިންމައިފިއެވެ.
އިންތިޚާބުގައި ވާދަކުރައްވާ މިހާރުގެ ރައީސް ޑޮނަލްޑް ޓްރަންޕާއި ޑިމޮކްރަޓުންގެ ކެންޑިޑޭޓު އަދި ކުރީގެ ނައިބު ރައީސް ޖޯ ބައިޑަންއަށް ޖޯޖިއާއިން ލިބިވަޑައިގެންފައިވާ ވޯޓުގެ ޢަދަދުގައި ހުރީ ވަރަށް ކުޑަ ފަރަގެކެވެ.
ކެންޑިޑޭޓުންނަށް ލިބިފައިވާ ވޯޓުގެ ނިސްބަތުގައި 0.5 އިންސައްތައަށްވުރެ ކުޑަ ފަރަގެއް ހުރިނަމަ އެ ސްޓޭޓުގައި އަލުން ވޯޓު ގުނޭނެއެވެ. އިންތިޚާބުގައި ވާދަކުރައްވާ ދެ ބޭފުޅުންނަށްވެސް ލިބިވަޑައިގެންފައިވަނީ ވޯޓުގެ 49.4 އިންސައްތައެއެވެ. ނަމަވެސް ވޯޓުގެ ޢަދަދަށް ބަލާނަމަ 1،000 ވޯޓުގެ ތަފާތަކުން ކުރީގައި އުޅުއްވަނީ ބައިޑަނެވެ.
ޖޯޖިއާގެ ސެކެޓްރީ އޮފް ސްޓޭޓް ބްރެޑް ރަފެންސްބާގާ ވިދާޅުވީ ހުރި ފަރަގަކީ ވަރަށް ކުޑަ ފަރަގެއްކަމުން އެ ސްޓޭޓުގައި ލާފައިވާ ވޯޓު އަލުން ގުނާނެކަމަށެވެ. ރަފެންސްބާގާ ވިދާޅުވީ ވޯޓު އަލުން ގުނުމުގެ މަރުހަލާ ކުރިއަށް ގެންދާނީ ދެފުށް ފެންނަ ގޮތަށް މަންދޫބުންނަށް ހުޅުވާލައިގެންކަމަށެވެ.
ޖޯޖިއާގެ ވޯޓިން ސިސްޓަމް އިމްޕްލިމެންޓޭޝަން މެނޭޖަރ، ގެބްރިއަލް ސްޓާލިން ވިދާޅުވީ މިހާތަނަށް 4،169 ވޯޓު ނުގުނާ އެ ސްޓޭޓުގައި ހުރިކަމަށެވެ. އޭނާވެސްވަނީ ވޯޓު އަލުން ގުނުމުގެ މަރުހަލާ ކުރިއަށް ގެންދާނީ ވަރަށް ހުޅުވާލައިގެންކަމުގެ ޔަޤީންކަން ދެއްވާފައެވެ. ވޯޓުގެ ސައްޚަކަން ޔަޤީންކުރުމަށް ކުރަންޖެހޭ ހުރިހާ މަސައްކަތެއް ކުރާނެކަމަށް އޭނާ ވިދާޅުވިއެވެ. ވޯޓުގައި މަކަރު ހަދާފައިވާކަމަށް ކުރަމުންދާ ތުހުމަތުތަކާއި ގުޅޭގޮތުން ވާހަކަ ދައްކަވަމުން ސްޓާލިން ވިދާޅުވީ އިންތިޚާބު އޮޅުވާލާފައިވާކަމުގެ އެއްވެސް ނިޝާނެއް މިހާތަނަށް ފެނިފައިނުވާކަމަށެވެ.
އެމެރިކާގެ ރިޔާސީ އިންތިޚާބު ކާމިޔާބުކުރުމަށް 270 އިލެކްޓޯރަލް ވޯޓު ކާމިޔާބުކުރަންޖެހެއެވެ. ޖޯޖިއާއަކީ އެ ޢަދަދާއި ހަމައަށް ވާޞިލްވުމަށް ދެ ކެންޑިޑޭޓުންނަށްވެސް މުހިންމު ސްޓޭޓެކެވެ. 16 އިލެކްޓޯރަލް ވޯޓު ލިބިފައިވާ ޖޯޖިއާ ކާމިޔާބުކުރެވިއްޖެނަމަ މިހާރު 254 އިލެކްޓޯރަލް ވޯޓު ޔަޤީންކުރައްވާފައިވާ ބައިޑަނަށް 270 އިލެކްޓޯރަލް ވޯޓު ހަމަވާނެއެވެ. އަދިވެސް ވޯޓު ގުނުން ކުރިއަށްދާ އެހެން "ބެޓުލް ގުރައުންޑު" ސްޓޭޓުތައް ކަމުގައިވާ ޕެންސިލްވޭނިއާއާއި ނެވާޑާއާއި އެރިޒޯނާގައިވެސް ކުޑަ ތަފާތަކާއެކު މިވަގުތު ކުރީގައި އުޅުއްވަނީ ބައިޑަނެވެ. ރައީސް ޓްރަންޕަށް މިހާތަނަށް 213 އިލެކްޓޯރަލް ވޯޓު ޔަޤީންވެފައިވާއިރު ނޯތު ކެރޮލައިނާގައި ކުރީގައި އުޅުއްވަނީ އެމަނިކުފާނެވެ.