އެމެރިކާއިން ރަސްމީކޮށް ޕެރިސް އެއްބަސްވުމުން ވަކިވެއްޖެއެވެ. އެމެރިކާ އޮތީ ދެވަނައަށް އެންމެ ގިނަ ޢަދަދަކަށް ޖައްވުގެ ތެރެއަށް ވިހަ މާއްދާތައް ދޫކުރާ ޤައުމުގެ ގޮތުގައެވެ. އެމެރިކާގެ ރައީސް ޑޮނަލްޑް ޓްރަންޕު މީގެ ކުރިންވަނީ މޫސުމީ ބަދަލާއި ދެކޮޅަށް މަސައްކަތްކުރުމަށް އެކުލަވާލާފައިވާ ޕެރިސް އެއްބަސްވުމުން އެމެރިކާ ވަކިކުރައްވާނެކަމަށް ވަޢުދުވެ ވަޑައިގެންފައެވެ.
ޕެރިސް އެއްބަސްވުމުން އެމެރިކާ ވަކިކުރައްވާނެކަމަށް ރައީސް ޓުރަންޕު އެންމެ ފުރަތަމަ އިޢުލާނުކުރައްވާފައިވަނީ 2017ވަނަ އަހަރުގެ ޖޫންމަހުގެ ތެރޭގައެވެ. އެ އެއްބަސްވުމުން ވަކިވުމުގެ ސަބަބެއްގެ ގޮތުގައި ރައީސް ޓްރަންޕު ވިދާޅުވީ އެ އެއްބަސްވުމުގެ ބައިވެރިއެއްގެ ގޮތުގައި އެމެރިކާއިން އޮވެއްޖެނަމަ އެ ޤައުމުގެ އިޤްތިޞާދަށް ގެއްލުންވާނެކަމަށެވެ. އެއްބަސްވުން ވަކިވުމަށް އދގައި އެމެރިކާއިން ރަސްމީކޮށް އެދިފައިވަނީ މިދިޔަ އަހަރުގެ ނޮވެމްބަރު މަހުގެ 4ވަނަ ދުވަހުގައެވެ. މިއީ 2015ވަނަ އަހަރު ޕެރިސް އެއްބަސްވުން އެކުލަވާލިފަހުން 197 ޤައުމު ހިމެނޭ އެއްބަސްވުމުން ޤައުމެއް ވަކިވި ފުރަތަމަ ފަހަރެވެ.
ޕެރިސް އެއްބަސްވުމުން ވަކިވުމަށް އެމެރިކާއިން ނިންމާފައިވާ ނިންމުން ތަންފީޒުކޮށް އެއްބަސްވުމުން ރަސްމީކޮށް އެ ޤައުމުން ވަކިވުމުން ޔޫއެން ފްރޭމްވޯކް ކޮންވެންޝަން އޮން ކްލައިމެޓް ޗޭންޖު، ޔޫއެންއެފްސީސީސީގެ އެކްޒެކެޓިވް ސެކެޓްރީ، ޕެޓްރިޝިއާ އެސްޕިނޯސާ ވިދާޅުވީ އެމެރިކާއިން އެއްބަސްވުމުން ވަކިވުމުން ޔޫއެންއެފްސީސީސީގެ ހިންގުމަށާއި ޕެރިސް އެއްބަސްވުމުގެ ލަނޑުދަނޑިތައް ހާޞިލްކުރުމަށް ދުނިޔެއިން ކުރަމުންދާ މަސައްކަތަށް ހުރަސްތަކެއް އެޅޭނެކަމަށެވެ. ޕެރިސް އެއްބަސްވުމުން އެމެރިކާއިން ވަކިވި ނަމަވެސް ޔޫއެންއެފްސީސީސީގެ މެންބަރު ޤައުމެއްގެ ގޮތުގައި އެ ޤައުމު އަދިވެސް ދެމި އޮންނާނެއެވެ. އެސްޕިނޯސާ ވިދާޅުވީ އެމެރިކާއިން ޕެރިސް އެއްބަސްވުމުގައި އަލުން ބައިވެރިވާން އެދިއްޖެ ހިނދެއްގައި އެކަމަށް ޔޫއެންއެފްސީސީސީއިން އެހީތެރިވެދިނުމަށް ތައްޔާރަށް އޮތްކަމަށެވެ.
އެމެރިކާގެ ރިޔާސީ އިންތިޚާބުގެ ނަތީޖާ އަންނަ ގޮތަކުން އެމެރިކާއިން އަލުން ޕެރިސް އެއްބަސްވުމުގައި ބައިވެރިވުން އެކަށީގެންވެއެވެ. މިހާރުގެ ރައީސް ޓްރަންޕު ރައީސްކަމުގެ އިތުރު ދައުރަކަށް ކުރިމަތިލައްވާފައިވާ ނަމަވެސް އެމަނިކުފާނާއި ދެކޮޅަށް ވާދަކުރައްވާ އިދިކޮޅު ކެންޑިޑޭޓު ޖޯ ބައިޑަންވަނީ އޭނާއަށް އިންތިޚާބު ކާމިޔާބުކުރެވިއްޖެނަމަ އެމެރިކާއިން އަލުން ޕެރިސް އެއްބަސްވުމުގައި ބައިވެރިކުރާނެކަމަށް ވިދާޅުވެފައެވެ.
ޔޫއެންއެފްސީސީސީ، އިނގިރޭސިވިލާތް، ފަރަންސޭސިވިލާތް، ޗިލީ އަދި އިޓަލީވިލާތުން އެކުގައި ނެރުނު ބަޔާނެއްގައި ބުނީ އެއްބަސްވުމުން އެމެރިކާއިން ވަކިވުމުން އެކަމާ ހިތާމަކުރާކަމަށެވެ. މޫސުމަށް އަންނަ ނޭދެވޭ ބަދަލުތަކާއި ދެކޮޅަށް އެމެރިކާއާއި އެހެން ޤައުމުތަކާއެކު ބައިވެރިވެ މަސައްކަތްކުރުމަށް އެ ފަރާތްތަކުން ތައްޔާރަށް އޮތްކަމަށް އެ ބަޔާނުގައިވަނީ ބުނެފައެވެ.
ޕެރިސް އެއްބަސްވުން ޤާއިމްކުރުމުގައި އިސްކޮށް ޙަރަކާތްތެރިވި އެއް ފަރާތްކަމުގައިވާ ފަރަންސޭސިވިލާތުގެ ޚާރިޖީ ތަޖުރިބާކާރު ލައުރެންސް ޓުބިއާނާ ވިދާޅުވީ ވައިޓު ހައުސާއި އެމެރިކާގެ ކޮންގުރެސްގެ ބާރު މޫސުމީ ބަދަލުތަކަކީ ހަޤީޤަތެއްކަމަށް ޤަބޫލުނުކުރާ ފަރާތްތަކުގެ ބާރުގެ ދަށުގައި އޮންނަ ނަމަ މޫސުމީ ބަދަލުތަކުން ރައްކާތެރިވެރިވެފައިވާ ދުނިޔެއެއް ޤާއިމްކުރުމަށް ދަތިވާނެކަމަށެވެ. މޫސުމާއިބެހޭ ބައިނަލްއަޤްވާމީ މަޝްވަރާތަކުގައި ޙަރަކާތްތެރިވާ އެފްރިކަން ގުރޫޕް އޮފް ނެގޯޝިއޭޓާސްގެ މުޤައްރިރު، ތަންޓައި ގަހޫމާމާ-ބެކާލޭ ވިދާޅުވީ އެމެރިކާއިން އެއްބަސްވުމުން ވަކިވުމުން މޫސުމީ ކަންކަމަށް ޚަރަދުކުރަން ލިބޭ ފައިސާގެ ޢަދަދުވެސް މަދުވެގެންދާނެކަމަށެވެ.
އެމެރިކާގެ ކުރީގެ ރައީސް އޮބާމާގެ ދައުރުގައި މޫސުމީ ބަދަލުތަކުގެ އަސަރުކުރުމުގެ ފުރުޞަތު ބޮޑު ނާޒުކު ޤައުމުތަކަށް އެހީތެރިވުމަށް 3 ބިލިއަން އެމެރިކާ ޑޮލަރު ދޭނެކަމަށް އެމެރިކާއިން ނިންމާފައިވާކަމަށް އޭނާ ފާހަގަ ކުރެއްވިއެވެ. އޭގެ ތެރެއިން މިހާތަނަށް ލިބިފައިވަނީ އެއް ބިލިއަން ޑޮލަރެވެ.