އެމެރިކާގެ އިންތިޚާބު: ވޯޓު ގުނާ ނުނިމެނީ ކޮން ސްޓޭޓުތަކެއްގައި؟

ނޮވެމްބަރު މަހުގެ 3ވަނަ ދުވަހު އޮތް އެމެރިކާގެ ރިޔާސީ އިންތިޚާބު ކާމިޔާބު ކުރައްވާފައިވަނީ ކޮން ބޭފުޅެއް ކަން މިހާތަނަށް ޔަޤީންވެފައެއް ނުވެއެވެ. ބައެއް ސްޓޭޓުތަކުގައި އަދިވެސްދަނީ ވޯޓު ގުނަމުންނެވެ. އޭގެ ތެރޭގައި އެންމެ ވާދަވެރި "ބެޓުލްގުރައުންޑު" ގެ ގޮތުގައި ބަލާ ސްޓޭޓުތަކެއްވެސް ހިމެނެއެވެ. އެ ސްޓޭޓުތަކުގެ ރަސްމީ ނަތީޖާއެއް ލިބުމަށް ދުވަސްތަކެއް ނަގާނެކަމަށްވަނީ ބެލެވިފައެވެ.

ނަތިޖާތައް ދައްކާގޮތުން ޑިމޮކްރެޓުންގެ ފަރާތުން އިންތިޚާބުގައި ވާދަކުރައްވާ ޖޯ ބައިޑަން މިވަގުތުވަނީ އޮތީ އައު ދަޢުރަކަށް ވާދަކުރައްވާ މިހާރުގެ ރައީސް ޑޮނަލްޑް ޓްރަންޕަށް ވުރެ މާ ބޮޑަށްވެސް ކުރީގައެވެ. އިންތިޚާބު ކާމިޔާބުކުރުމަށް ބޭނުންވާ 270 އިލެކްޓޯރަލް ވޯޓުގެ ތެރެއިން 264 ވޯޓު ބައިޑަން މިހާތަނަށް ކާމިޔާބުކުރައްވާފައިވާއިރު ޓްރަންޕަށް ލިބިވަޑައިގެންފައިވަނީ 214 ވޯޓެވެ. މިވަގުތުވެސް ފަސް ސިޓީއެއްގައި ވޯޓު ގުނުމުގެ މަސައްކަތް އަންނަނީ ކުރަމުންނެވެ.

އަލަސްކާ

އަލަސްކާ: ބޮޑު ތަފާތަކާއެކު އަލަސްކާގައި ކުރި ހޯއްދަވަމުންދަނީ ރައީސް ޓްރަންޕެވެ. ތިން އިލެކްޓޯރަލް ވޯޓު ލިބޭ އަލަސްކާގެ ވޯޓު ތެރެއިން މިހާތަނަށް ގުނާ ނިމިފައިވަނީ ވޯޓުގެ 50 އިންސައްތައެވެ. އިތުރަށް ގުނުމަށް ބާކީ ހުރީ 191،000 ވޯޓެވެ. މިވަގުތު ވޯޓުގެ 62.1 އިންސައްތައާއިއެކު ކުރީގައި އުޅުއްވަނީ ޓްރަންޕެވެ. ބައިޑަނަށް މިހާތަނަށް ލިބިފައިވަނީ ގުނާ ނިމިފައިވާ ވޯޓުގެ 33.5 އިންސައްތައެވެ. އެ ސްޓޭޓު ކާމިޔާބުކުރައްވާނީ ރައީސް ޓްރަންޕުކަމަށް ވަރަށް ބޮޑަށް ބެލެވެއެވެ.

ނެވާޑާ

ނެވާޑާގައި މިހާތަނަށް ގުނާ ނިމިފައިވަނީ 75 އިންސައްތަ ވޯޓެވެ. ހަ އިލެކްޓޯރަލް ވޯޓު ލިބޭ އެ ސްޓޭޓުގައި ކުރީގައި އުޅުއްވަނީ ބައިޑަނެވެ. ނެވާޑާގެ ވޯޓުގެ 49.3 އިންސައްތަ ބައިޑަނަށް މިވަގުތު ލިބިވަޑައިގެންފައިވާއިރު ޓްރަންޕަށް ލިބިވަޑައިގެންފައިވަނީ ވޯޓުގެ 48.7 އިންސައްތައެވެ. އިތުރަށް ގުނަންޖެހޭ 398،000 ވޯޓު އަދި އެބަހުއްޓެވެ. އޭގެ ތެރެއިން ގިނަ ވޯޓަކީ ޕޯސްޓު މެދުވެރިކޮށް ފޮނުވާފައިވާ ވޯޓެވެ. އެ ސްޓޭޓުގެ ހަ އިލެކްޓޯރަލް ވޯޓު ބައިޑަނަށް ކާމިޔާބުކުރެވިއްޖެނަމަ މިހާރު 264 އިލެކްޓޯރަލް ވޯޓު ކާމިޔާބު ކުރައްވާފައިވާ ބައިޑަނަށް އިންތިޚާބު ކާމިޔާބުކުރުމަށް ބޭނުންވާ 270 ވޯޓު ހަމަވާނެއެވެ.

ނޯތު ކެރޮލައިނާ

ނޯތު ކެރޮލައިނާގައި މިވަގުތު ކުރީގައި އުޅުއްވަނީ ރައީސް ޓްރަންޕެވެ. 15 އިލެކްޓޯރަލް ވޯޓު ލިބޭ އެ ސްޓޭޓުގެ ވޯޓުގެ 94 އިންސައްތަ މިހާރުވަނީ ގުނާ ނިމިފައެވެ. އިތުރަށް ގުނަންޖެހޭ 348،000އެއްހާ ވޯޓު އަދިވެސް އެބަހުއްޓެވެ. ދެ ކެންޑިޑޭޓުންނަށް ލިބިފައިވާ ވޯޓުގެ މެދުގައި ހުރީ ވަރަށް ކުޑަ ފަރަގެކެވެ. 2 އިންސައްތައަށްވުރެ ކުޑަ ފަރަގެއް ހުރިއިރު 50.1 އިންސައްތަ ވޯޓު ލިބިފައިވަނީ ޓްރަންޕަށެވެ. ބައިޑަނަށް ލިބިފައިވަނީ 48.7 އިންސައްތަ ވޯޓެވެ.

އިންތިޚާބުހެ ތަރީޚުގެ ކުރިން ޕޯސްޓު ކޮށްފައިވާ ވޯޓުތައް ނޮވެމްބަރު މަހުގެ 12ވަނަ ދުވަހުގެ ކުރިން ލިބިއްޖެނަމަ އެ ވޯޓެއް ގުނުމަށް ނޯތު ކެރޮލައިނާއިން ޙުއްދަކުރެއެވެ. އެހެންކަމުން އެ ސްޓޭޓުގެ ރަސްމީ ނަތީޖާ ލިބުމަށް އަދި އިތުރު ވަގުތު ނަގާނެއެވެ. އަންނަ ހަފުތާގެ ކުރިން އަސްލު ނަތީޖާ ލިބޭނެކަމަކަށް ނުބެލެވެއެވެ.

ޕެންސިލްވޭނިއާ

ޕެންސިލްވޭނިއާގެ ވޯޓުގެ 95 އިންސައްތަ މިހަރުވަނީ ގުނާ ނިންމާފައެވެ. ވޯޓުގެ 50.7 އިންސައްތައާއިއެކު އެ ސްޓޭޓުގައި މިވަގުތު ކުރީގައި އުޅުއްވަނީ ރައީސް ޓްރަންޕެވެ. ބައިޑަނަށް ލިބިފައިވަނީ ވޯޓުގެ 47.8 އިންސައްތައެވެ. އެ ސްޓޭޓުގައި ނުގުނާ ހުރި ވޯޓުގެ ޢަދަދު 784،000އަށްވުރެ އިތުރެވެ.

20 އިލެކްޓޯރަލް ވޯޓު ލިބޭ ޕެންސިލްވޭނިއާގައި އިންތިޚާބުގެ ކުރިން ޕޯސްޓު މެދުވެރިކޮށް ފޮނުވާފައިވާ ވޯޓު އިންތިޚާބުގެ ތާރީޚަށްފަހު ތިން ދުވަސް ވަންދެން ބަލައިގަންނާނެއެވެ. ދެ ކެންޑިޑޭޓުންނަށް ލިބޭ ވޯޓުގެ ޢަދަދުގައި 0.50 އިންސައްތައަށްވުރެ ކުޑަ ފަރަގެއް ހުރިނަމަ ވޯޓު އަލުން ގުނުމަށް އެ ސްޓޭޓުގެ ޤާނޫނުން ލާޒިމްކުރެއެވެ.

ޓްރަންޕުގެ ކެންޕެއިން ޓީމުން ވަނީ ޕެންސިލްވޭނިއާގެ ވޯޓު ގުނުން ވަގުތީ ގޮތުން މެދުކަނޑާލުމަށް ހުށަހަޅާފައެވެ. އޭގެ އިތުރުން އެ ސްޓޭޓުގެ ޕޯސްޓު މެދުވެރިކޮށް ފޮނުވާ ވޯޓުތަކާއި ގުޅިގެން ސުޕްރީމް ކޯޓަށް ހުށަހަޅާފައިވާ މައްސަލައަކަށް ތަދައްޚުލްވުމަށް ޓްރަންޕުގެ ކެންޕެއިން ޓީމުން ވަނީ އެދިފައެވެ.

ޖޯޖިއާ

މި ސިޓީގެ ވޯޓުގެ 98 އިންސައްތަ މިހާރުވަނީ ގުނާ ނިމިފައެވެ. 16 އިލެކްޓޯރަލް ވޯޓުލިބޭ ޖޯޖިއާގައި އަދި ނުގުނާ 100،000 ވޯޓު އެބަހުއްޓެވެ. ކުޑަ ތަފާތަކުން މިވަގުތު އެ ސްޓޭޓުގައި މިވަގުތު ކުރީގައި އުޅުއްވަނީ ޓްރަންޕެވެ. ޓްރަންޕަށް 49.6 އިންސައްތަ ވޯޓު ލިބިފައިވާއިރު ބައިޑަނަށް ލިބިފައިވަނީ 49.2 އިންސައްތަ ވޯޓެވެ. މިއަދުގެ ވަގުތެއްގައި އެ ސްޓޭޓުގެ ނަތީޖާ ލިބޭނެކަމަށް ބެލެވެއެވެ.

ޖޯޖިއާގެ ޤާނޫނުގައި ބުނާގޮތުން ދެ ބޭފުޅުންނަށް ލިބިފައިވާ ވޯޓުގެ މެދުގައި 0.5 އިންސައްތައަށްވުރެ ކުޑަ ފަހަރެއް ހުރިނަމަ ރަސްމީ ނަތީޖާ އިއުލާނުކުރުމުގެ ދެ ދުވަސް ތެރޭގައި ވޯޓު އަލުން ގުނުމަށް އެދުމުގެ ހައްޤު ދެ ކެންޑިޑޭޓުންނަށް ލިބެއެވެ.

ޖޯޖިއާ ސްޓޭޓުގެ ބައެއް ވޯޓު ގުނުން ހުއްޓުވުމަށް ރައީސް ޑޮނަލްޑް ޓްރަންޕުގެ ކެންޕެއިނުންވަނީ ކޯޓަށް މައްސަލައެއް ހުށަހަޅާފައެވެ. ޝަތަން ކައުންޓީ ބޯޑު އޮފް އިލެކްޝަންސާއި ދެކޮޅަށް ޓްރަންޕުގެ ކެންޕެއިނުން ހުށަހަޅާފައިވާ މައްސަލައިގައި އެދިފައިވަނީ ޖޯޖިއާގައި ޕޯސްޓު މެދުވެރިކޮށް ފޮނުވާފައިވާ އަދި މިހާތަނަށް ލިބިފައިނުވާ ވޯޓުތައް އެހެން ވޯޓުތަކާއި ވަކިކޮށްދިނުމަށެވެ.

އެގޮތުން ނޮވެމްބަރު މަހުގެ 3ވަނަ ދުވަހުގެ ރޭގަނޑު 7ގެ ފަހުން ލިބިފައިވާ ހުރިހާ ވޯޓެއް ވަކިކޮށްދިނުމަށް ޓްރަންޕު ހުށަހެޅި މައްސަލައިގައިވަނީ އެދިފައެވެ. އެގޮތަށް ޢަމަލުކުރަން ޓްރަންޕުގެ ކެންޕެއިނުން ހުށަހަޅާފައިވަނީ ލަހުން ލިބޭ ވޯޓުތައް ކުރިން ލިބިފައިވާ ވޯޓުތަކާއި އެއްވެ މަސްހުނިވެފައިވާކަމަށް މައުލޫމާތު ލިބިފައިވާތީކަމަށް ކެންޕެއިނުން ބުންޏެވެ.