އެމެރިކާގެ ރިޔާސީ އިންތިޚާބުގެ މިޝިގަން ސްޓޭޓުގައި ވޯޓު ގުނުން ހުއްޓުމަށް އެދި އެ ޤައުމުގެ ރައީސް އަދި ރިޔާސީ ކެންޑިޑޭޓު ޑޮނަލްށް ޓްރަންޕުގެ ކެންޕޭނުން ކޯޓަށް މައްސަލައެއް ހުށަހަޅައިފިއެވެ.
މިޝިގަން ސްޓޭޓަކީ ރިޔާސީ އިންތިޚާބު ކާމިޔާބުކުރުމަށް ހޯދަންޖެހޭ 270 އިލެކްޓޯރަލް ވޯޓު ޔަޤީންކުރުމަށް ވަރަށް މުހިންމު ސްޓޭޓެކެވެ. އެ ސްޓޭޓަށް 16 އިލެކްޓޯރަލް ވޯޓު ލިބެއެވެ. އެންމެ ފަހުގެ ނަމްބަރުތަކުން ދައްކާގޮތުގައި މިޝިގަން ސްޓޭޓުގައި ކުޑަ ފަރަގަކުން މިވަގުތު ކުރި ހޯއްދަވަމުންދަނީ އިދިކޮޅު ކެނޑިޑޭޓު އަދި ކުރީގެ ނައިބު ރައީސް ޖޯ ބައިޑަނެވެ. ވޯޓުގެ 96 އިންސައްތަ މިހާރު ގުނާފައިވާއިރު ބައިޑަނަށް މިހާތަނަށް ވޯޓުގެ 49.7 އިންސައްތަވަނީ ލިބިވަޑައިގަންނަވާފައެވެ.
ޓްރަންޕުގެ ކެންޕެއިނުން ނެރުނު ބަޔާނެއްގައި ބުނީ ވޯޓުގުނަމުންދާ މަރުކަޒުތަކަށް ހާޒިރުވެތިބެ ވޯޓު ގުނުމުގެ މަރުހަލާ ކައިރިން ބެލުމުގެ ފުރުޞަތު ނުދޭހާ ހިނދަކު ވޯޓުގުނުން ހުއްޓުވުމަށް މިޝިގަން ކޯޓް އޮފް ކްލެއިމްސްއަށް މައްސަލައެއް ހުށަޅާފައިވާކަމަށެވެ. އަދި ވޯޓު ގުނާ މަރުކަޒުތަކުގައި ހާޒިރުވެ ތިބެ ގުނުމުގެ މަރުހަލާ ކައިރިން ނުބެލޭ ޙާލަތުގައި މިހާ ހިސާބަށް ހުޅުވާފައިވާ އަދި ގުނާފައިވާ ހުރިހާ ވޯޓު ކަރުދާސްތައް އަލުން މުރާޖަޢާކުރުމަށް އެދިފައިވާކަމަށް އެ ބަޔާނުގައި ވެއެވެ.
އިންތިޚާބު ކާމިޔާބުކުރުމަށް 270 އިލެކްޓޯރަލް ވޯޓު ބޭނުންވާއިރު ރައީސް ޓްރަންޕަށް މިހާތަނަށް ލިބިވަޑައިގެންފައިވަނީ 214 ވޯޓެވެ. އަދި ބައިޑަނަށް ލިބިވަޑައިގެންފައިވަނީ 248 ވޯޓެވެ. ބޭނުންވާ ޢަދަދަށް އިލެކްޓޯރަލް ވޯޓު ހަމަކުރުމަށް ދެ ބޭފުޅުންނަށްވެސް މިޝިގަން ހިމެނޭގޮތަށް އިތުރު ދެ ސްޓޭޓެއްގެ އަޣުލަބިއްޔަތު ހޯދުންވަނީ ވަރަށް މުހިންމުވެފައެވެ. އެ ދެ ސްޓޭޓަކީ ޕެންސިލްވޭނިއާއާއި ވިސްކޮންސިންއެވެ.
ރައީސް ޓްރަންޕުގެ ކެންޕެއިނުންވަނީ ބައިޑަން ކުޑަ ފަރަގަކުން ކުރި ހޯއްދަވާފައިވާ ވިސްކޮންސިންގެ ވޯޓު އަލުން ގުނުމަށް ހުށަހަޅާނެކަމަށް ބުނެފައެވެ.