ރިޔާސީ އިންތިޚާބެއްގައި ފުރަތަމަ ފަހަރަށް ކާންޔޭ ވެސްޓު ވޯޓުލައިފިއެވެ. މަޝްހޫރު ލަވަކިޔުންތެރިޔާ އަދި ޑިޒައިނަރު ކާންޔެ ވެސްޓުވަނީ އެމެރިކާގެ ރިޔާސީ އިންތިޚާބުގައި ވާދަކުރާނެކަމަށް ޖުލައި މަހުގެ 4ވަނަ ދުވަހު އިޢުލާނުކޮށްފައެވެ.
އިންތިޚާބުގައި ވާދަކުރާނެކަމަށް ކާންޔޭ ވެސްޓު އިޢުލާނުކޮށްފައިވަނީ އިންތިޚާބުގައި ބައިވެރިވުމަށް ނަން ހުށަހެޅުމަށް އޮންނަ ވަގުތު އެމެރިކާގެ ގިނަ ސްޓޭޓުތަކުގައި ހަމަވެފައި ވަނިކޮށެވެ. އެހެންކަމުން ކާންޔޭއާއި އޭނާގެ ރަނިންމޭޓު، މިޝެލް ޓިޑްބޯލްގެ ނަން ވޯޓު ކަރުދާހުގައި ހިމަނާފައިވަނީ މަދު ސްޓޭޓުތަކެއްގައެވެ. ކާންޔޭ ވޯޓުލާ ސްޓޭޓުކަމުގައިވާ ވަޔޮމިން އޭގެ ތެރޭގައި ނުހިމެނެއެވެ.
ރިޔާސީ އިންތިޚާބުގެ ވޯޓުލުން މިހާރު ނިމިފައިވާއިރު ކާންޔޭވަނީ ރިޔާސީ އިންތިޚާބެއްގައި ފުރަތަމަ ފަހަރަށް ވޯޓުލައި، އޭނާ ވޯޓުލީ އަމިއްލަ ނަމަކަމަށް ބުނެފައެވެ. ނަމަވެސް ކާންޔޭ އޭނާއަށް އަމިއްލައަށް ވޯޓުލީ 'ރައިޓު އިން' ވޯޓެއްގެ ގޮތުގައި ނުވަތަ އޭނާގެ ނަން ލިޔެގެން ކަމަށްވާތީ އޭނާއަށްލީ ވޯޓު ވޯޓެއްގެ ގޮތުގައި ގުނާނީ ބައެއް ލިޔެކިޔުންތައް ހުށަހެޅުމުންނެވެ.
ވޯޓުލުމުގެ ކުރިން ކާންޔޭވަނީ އޭނާގެ ވޯޓު ކަރުދާހުގެ ފޮޓޯއާއި ވީޑިއޯ ޓްވިޓާ މެދުވެރިކޮށް އާންމުކޮށްފައެވެ. އެ ފޮޓޯތަކުން އޭނާގެ ނަން އަމިއްލައަށް ލިޔެފައިވާތަން ފެންނައިރު ވޯޓު ކަރުދާހުގެ އިތުރު އެއްވެސް ބައެއް ފުރިހަމަ ކޮށްފައިހުރިތަނެއް ނުފެނެއެވެ.
The first vote of my life We are here to serve We pray for every servant leader in the world ? pic.twitter.com/UWSrKslCt1
— ye (@kanyewest) November 3, 2020
ވަޔޮމިންގ ސްޓޭޓުން ޢަމަލުކުރާ ޤަވާއިދުގެ ދަށުން ރައިޓް އިން ވޯޓުތައް އެމީހެއްގެ ނަމުގައި ގުނާނީ އެމީހަކަށް އިންތިޚާބު ކާމިޔާބުވެފައިވާ ނަމައެވެ. ވޯޓުލާ ގަޑިހަމަވުމުގެ އިރުކޮޅެއްގެ ތެރޭގައި އެސޯސިއޭޓެޑް ޕްރެސުންވަނީ އެ ސްޓޭޓު ކާމިޔާބުކުރެއްވީ މިހާރުގެ ރައީސް ޑޮނަލްޑް ޓްރަންޕުކަމަށް އިޢުލާނުކޮށްފައެވެ. އެހެންކަމުން ކާންޔޭގެ ވޯޓު އޭނާގެ ނަމުގައެއް ނުގުނާނެއެވެ.
ކާންޔޭގެ ވޯޓު އޭނާގެ ނަމުގައި ގުނޭނެ ދެވަނަ ގޮތަކީ ލިޔެކިޔުންތަކެއް ހުށަހަޅައި ކަމާބެހޭ އިދާރާއަށް ކޮންމެވެސް ވަރެއްގެ ފީއެއް ދެއްކުމުންނެވެ. އެހެން ނޫންނަމަ ހުރިހާ ރައިޓު އިން ވޯޓެއް ގުނާނީ އެއްކޮށެވެ. ވަޔޮމިންގެ ސެކެޓްރީ އޮފް ސްޓޭޓުގެ ތަރުޖަމާނުވަނީ މިހާތަނަށް އެއްވެސް ފަރާތަކުން އެމީހަކަށް ލިބިފައިވާ ރައިޓްއިން ވޯޓު އެމީހެއްގެ ނަމުގައި ގުނުމަށް ހުށަހަޅާފައިނުވާކަމަށް ބުނެފައެވެ.
ނަމަވެސް އިންތިޚާބު ނިމުމަށްފަހު ދެ ދުވަސް ވަންދެން އެ ފުރުޞަތު އޮންނާނެކަމަށް އޭނާ ބުންޏެވެ. ކާންޔޭ މިހާރުވަނީ އޭނާއަށް އިންތިޚާބު ކާމިޔާބުވެފައިނުވާކަމަށް ބަލައިގަނެ 2024ވަނަ އަހަރުގެ އިންތިޚާބުގައި ވާދަކުރާނެކަމަށް ބުނާފަދަ މޭރުމަކުން ޓުވީޓެއް ކޮށްފައެވެ.