އެމެރިކާގެ ރިޔާސީ އިންތިޚާބުގައި އެރިޒޯނާ ސްޓޭޓުގެ އަޣުލަބިއްޔަތު އިދިކޮޅު ރިޔާސީ ކެންޑިޑޭޓު ޖޯ ބައިޑަން ކާމިޔާބުކުރައްވައިފިއެވެ. މިއީ 1996ވަނަ އަހަރުން ފެށިގެން އެރިޒޯނާ ސްޓޭޓުގެ އަޣުލަބިއްޔަތު ޑިމޮކްރަޓުންނަށް ލިބުނު ފުރަތަމަ ފަހަރެވެ.
7.279 މިލިއަން މީހުންގެ އާބާދީއެއް އޮންނަ އެރިޒޯނާ ސްޓޭޓަށް ލިބެނީ 11 އިލެކްޓޯރަލް ވޯޓެވެ. އެ ސްޓޭޓަކީ އިންތިޚާބަށް ވަރަށް މުހިންމު ސްޓޭޓެއްގެ ގޮތުގައި ދެކި ދެ ވާދަވެރިންވެސްވަނީ އެ ސްޓޭޓުގައި މުހިންމު ކެންޕެއިނުތަކެއް ކުރައްވާފައެވެ.
އެތައް އަހަރެއް ވަންދެން ރިޕަބްލިކުންނަށް ތާޢީދުކުރާ ސްޓޭޓެއްގެ ގޮތުގައި އޮތް އެރިޒޯނާ ސްޓޭޓު ޑިމޮކްރަޓުންނަށް ކާމިޔާބުވުމަށް ޖޯ ބައިޑަން ދިޔައީ ވަރަށް ބޮޑަށް އުންމީދުކުރައްވަމުންނެވެ. އެ ސްޓޭޓުގެ އަޣުލަބިއްޔަތު ލިބިވަޑައިގަތުމާއެކު މިދިޔަ އިންތިޚާބުގައި ރައީސް ޓްރަންޕަށް އެ ސްޓޭޓުން ލިބިވަޑައިގެންނެވި 11 އިލެކްޓޯރަލް ވޯޓު މި އިންތިޚާބުގައި ލިބޭނީ ބައިޑަނަށެވެ.
މި އަހަރުގެ އިންތިޚާބުގައި އެރިޒޯނާ ސްޓޭޓޫގައި ރެކޯޑު ޢަދަދެއްގެ މީހުންވަނީ އިންތިޚާބުގެ ތާރީޚުގެ ކުރިން ދުރާލާ ވޯޓުލައިފައެވެ. އެގޮތުން 2.6 މިލިއަން މީހުންވަނީ ކުރިއަށް ވޯޓުލާފައެވެ. އަންގާރަ ދުވަހުގެރޭ ޓްރަންޕަށް ވަފާތެރި ނޫސް އިދާރާއެއްކަމަށްވާ ފޮކްސް ނިއުސުން ބައިޑަނަށް އެރިޒޯނާ ކާމިޔާބުވެފައިވާކަމަށް ރިޕޯޓުކުރުމުން ޓްރަންޕުވަނީ އެކަމާ ނުރުހުން ފައުޅުކުރައްވާފައެވެ.