އެމެރިކާގެ ޤާނޫނުހަދާ މަޖިލީހުގެ ތިރިގެ، ހައުސް އޮފް ރެޕްރެސެންޓޭޓިވްސްގެ އަޣުލަބިއްޔަތު އިދިކޮޅު ޑިމޮކްރަޓުން ދަމަހައްޓާނެކަމަށް ބެލެވިއްޖެއެވެ. ޑިމޮކްރަޓުންނަށް ހައުސް އޮފް ރިޕްރެސެންޓޭޓީވްގެ އަޣުލަބިއްޔަތު ދެމެހެއްޓިއްޖެނަމަ އެކަން ވެގެންދާނީ ފާއިތުވި 25 އަހަރުގެ ތެރޭގައި ޖެހިޖެހިގެން ދެ އަހަރުގެ ދެ ދައުރަށް ޑިމޮކްރަޓުންގެ ބާރުގެ ދަށުގައި ހައުސްގެ ބާރު އޮތް ދެވަނަ ފަހަރަށެވެ.
އެމެރިކާގައި ރިޔާސީ އިންތިޚާބާއި މަޖިލީހުގެ އިންތިޚާބާއި ގަވަރުނަރުންގެ އިންތިޚާބު ކުރިއަށް ގެންދަނީ އެކުއެކީގައި އެއް ދުވަހެއްގައެވެ.
2018ވަނަ އަހަރުގެ ޤާނޫނުހަދާ މަޖިލީހުގެ ތިރިގޭގެ އިންތިޚާބުގައި ޑިމޮކްރަޓުންވަނީ 41 ގޮނޑިއާއިއެކު ހައުސްގެ އަޣުލަބިއްޔަތު ހޯދާފައެވެ. އެއީ 1974ވަނަ އަހަރަށްފަހު ޑިމޮކްރަޓުންނަށް އެވަރުގެ ކާމިޔާބީއެއް ލިބުނު ފުރަތަމަ ފަހަރެވެ. އެފަހަރު ހައުސް އޮފް ރެޕްރެޒެންޓޭޓިވްސްގެ ގޮނޑިއެއް އަލަށް ކާމިޔާބުކުރި އުންމީދީ އަދި އާންމުންގެ ތެރޭގައި މަގުބޫލު ނިއު ޔޯކުގެ އެލެކްސެންޑްރިއާ އޯކޭސިއޯ-ކޯޓެޒް އާއި މިނެސޮޓާގެ އިލްހާން އޮމާރުވަނީ ނޮވެމްބަރު 3ވަނަ ދުވަހުގެ އިންތިޚާބުގައި ދެވަނަ ދަޢުރަކަށް
ހޮވިވަޑައިގެންފައެވެ. ހައުސް އޮފް ރެޕްރެސެންޓޭޓިވްސްގެ އަޣުލަބިއްޔަތު އިދިކޮޅު ޑިމޮކްރަޓުން ދަމަހައްޓާނެކަން ޔަޤީންވެފައިވާ ނަމަވެސް އައު ގޮނޑިތައް ކާމިޔާބުކުރުމުގައި ޑިމޮކްރަޓުންނަށް މާ ބޮޑު ކުރިއެރުމެއް ލިބިފައެއް ނުވެއެވެ.
ރިޕަބްލިކަނުންވެސްވަނީ އިންތިޚާބުގައި މުހިންމު ކާމިޔާބީތަކެއް ހޯދާފައެވެ. އެގޮތުން މާޖޮރީ ޓޭލާ ގްރީންވަނީ ޖޯޖާގެ ފޯޓީންތު ކޮންގުރެޝަނަލް ޑިސްޓްރިކްޓު ކާމިޔާބުކުރައްވާފައެވެ. ޖޯޖާގެ ގޮނޑިއަށް ވާދަކުރައްވާ ބޭފުޅުންގެ ތެރޭގައި ޑިމޮކްރަޓެއް ކުރިން ހިމެނިފައިވާނަމަވެސް ފަހު ވަގުތު އިންތިޚާބުން ވަކިވެވަޑައިގަތުމުން އޭގެ ބަދަލުގައި ޑިމޮކްރަޓުންގެ އިތުރު ކެނޑިޑޭޓަކަށްވަނީ ބައިވެރި ނުވެވިފައެވެ.