މާލެ ކައިރި ފަޅެއްގައި އެންދަމަން ނިކުމެ އުޅުނު ދޯންޏެއްގެ ފަޅުވެރިއަކު މަރުވެއްޖެއެވެ.
ނ މާޅެންދޫ ރަށު ކައުންސިލްގެ ރައީސް މުޙައްމަދު ޝާޙް މޫސާ ވިދާޅުވީ މިޙާދިސާގައި ނިޔާވެފައި ވަނީ އެރަށަށް ނިސްބަތްވާ ޢުމުރުން 56 އަހަރުގެ ޢަބްދުއްރަޝީދު ޢަބްދުލްޣަފޫރު ކަމަށެވެ. ޙާދިސާ ހިނގިގޮތުގެ މާބޮޑު ތަފްސީލެއް ނޭނގޭކަމަށާއި މިޙާދިސާ ހިނގާފައި ވަނީ މާލެ އަތޮޅު ގުޅީފަޅު ކައިރީގައިކަމަށް އޭނާ ވިދާޅުވެއެވެ. އޭނާ ދޯންޏަށް ނެގީ އެންދަމަން އުޅެނިކޮށް ވަރުދެރަވާން ފެށުމުންކަމަށް މަޢުލޫމާތު ލިބެއެވެ.
މިމީހާ އައިޖީއެމްއެޗަށް ގެންދިޔައިރުވެސް ނިޔާވެފައިވާކަމަށްވެސް މަޢުލޫމާތު ލިބެއެވެ.
ފީނުމުގައި ޙަރަކާތްތެރިވާއިރު ހިނގާ މިފަދަ ހިތާމަވެރި ޙާދިސާތައް އަންނަނީ އިތުރުވަމުންނެވެ.
މަސްވެރިކަމުގަޔާއި އެނޫންވެސް ކަންކަމުގައި ފީނާ މީހުން އެކަނި ނުފީނުމަށާއި ރައްކާތެރިކަމަށް ސަމާލުކަން ދިނުމަށް ކަމާއި ގުޅޭ އިދާރާތަކުން އަންނަނީ އިލްތިމާސްކުރައްވަމުންނެވެ.