މިމަހުގެ 23 ވަނަ ދުވަހު މާލޭގައި ހިނގި މާރާމާރީގެ ޙާދިސާގައި ޒަޚަމްވި މީހާއަށް ވަގުތުން އެހީވެ ހޮސްޕިޓަލަށް ގެންގޮސްދިން ފަރާތަކީ ވަރަށް ހިތްވަރުގަދަ މީހެއްކަމަށާއި އެއީ އިންސާނިއްޔަތުގެ މަތިވެރި ޢަމަލެއްކަމުގައި ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ސީޕީ ޙަމީދުކުރެއްވި ޓުވީޓެއްގައި ވިދާޅުވީ، ފުރާނަ ސަލާމަތްކުރުމުގެ މިޢަމަލަކީ ޙަގީގީ ބަޠަލުންގެ ސިފައެއްކަމަށާއި އެކަމަށް ހިއްވަރު ދެއްވާކަމަށެވެ.
މާރާމާރީއެއްގައި ޒަޚަމްވި މ.އަސަލް އަޙްމަދު ޝަމާލް އައިޖީއެމްއެޗަށް ގެންގޮސްފައި ވަނީ އެވަގުތު އެސަރަޙައްދުގައި ހުރި ޢާއްމުންގެ މީހެކެވެ. އެހެންނަމަވެސް އިތުރު ފަރުވާއަށް އޭނާ ފަހުން އޭޑީކޭއަށް ބަދަލުކޮށްފައިވާކަމަށް މަޢުލޫމާތު ލިބެއެވެ. އޭޑީކޭގައި ކުރި އޮޕަރޭޝަނަށް ފަހު އޭނާގެ ޙާލު މިހާރު ރަނގަޅުކަމަށް މަޢުލޫމާތު ލިބެއެވެ.
ޢާއިލީ މައްސަލަތަކެއްގައި ހިނގި މިމާރާމާރީގައި ޒަޚަމްވި ޝަމާލްއަށް އެހީވި މީހާ ހޯދުމަށް އޭނާ ވަނީ ފަހުން ސޯޝަލް މީޑިއާ މެދުވެރިކޮށް ޢާއްމުންގެ އެހީތެރިކަމަށް އެދިފައެވެ. އެގޮތުން ޝަމާލްގެ ފުރާނަ ސަލާމަތްކުރުމަށް އެހީވިމީހާ ވަނީ އޭޑީކޭއަށް ގޮސް އޭނާއާއި ބައްދަލުކޮށްފައެވެ.
ރާއްޖޭގައި ހިނގާ މާރާމާރީގެ ހުއްޓުވުމަށް ފުލުހުން އަންނަނީ ގިނަ މަސައްކަތްތަކެއް ކުރައްވަމުންނެވެ.
މިފަދަ ޙާދިސާތަކުގައި ޢާއްމުގޮތެއްގައި އެހީތެރިވުމަށް މީހުން ފަސްޖެހުނު ނަމަވެސް މިމަހުގެ 23 ވަނަ ދުވަހުގެ ރޭ މާލޭގައި ހިނގި މިޙާދިސާގައި ޒަޚަމްވި މީހާއަށް އެހީތެރިވި ޢާއްމުމީހާއަށް މީހުން އަންނަނީ ތަޢުރީފުކުރަމުންނެވެ.