ދެވަނައަށް އެންމެ ގިނަ މީހުންނަށް ކޯވިޑް-19 ޖެހިފައިވާ ޤައުމަކަށް އިންޑިޔާވެއްޖެއެވެ. ދެވަނައަށް އެންމެ ގިނަ މީހުންނަށް ކޯވިޑް-19 ޖެހިފައިވާ ޤައުމުގެ ގޮތުގައި ކުރިން އޮތް ބްރެޒިލަށްވުރެ އިންޑިޔާގައި ވައިރަސް ޖެހިފައިވާ މީހުންގެ ޢަދަދު މިހާރުވަނީ އިތުރުވެފައެވެ.
ދެވަނައަށް އެންމެ ބޮޑު އާބާދީ އޮންނަ އިންޑިޔާގައި މިހާތަނަށް 4،204،613 މީހުންނަށްވަނީ ކޯވިޑް-19 ޖެހިފައެވެ. އެއީ ބްރެޒިލުގައި ބަލިޖެހިފައިވާ 4،137،606 މީހުންނަށްވުރެ ގާތްގަނޑަކަށް 70،000 ކޭސް އިތުރު ޢަދަދެކެވެ. އެއާއެކު 6 މިލިއަނަށްވުރެ ގިނަ މީހުންނަށް ބަލިޖެހިފައިވާ އެމެރިކާއަށްފަހު ދެވަނައަށް އެންމެ ގިނަ މީހުންނަށް ބަލިޖެހިފައިވާ ޤައުމުގެ ގޮތުގައި އިންޑިޔާވަނީ ފާހަގަވެފައެވެ.
ފާއިތުވި 24 ގަޑިއިރުގެ ތެރޭގައި 90،802 މީހުންނަށް އިންޑިޔާގައިވަނީ ބަލިޖެހިފައެވެ. އެއީ ދުވާލެއްގެ މައްޗަށް އެންމެ ގިނަ ޢަދަދެއްގެ މީހުންނަށް ބަލިޖެހިފައިވާ ޢަދަދެވެ.
ކޯވިޑް-19 ޖެހިގެން އެ ޤައުމުގައި މިހާތަނަށް މަރުވެފައިވަނީ 71،642 މީހުންނެވެ. އެއީ އެ ޤައުމުގައި ބަލިޖެހިފައިވާ މީހުންގެ ޖުމްލަ ޢަދަދާބަލާއިރު ދަށް ޢަދަދެއްކަމަށް ޞިއްޙީ މާހިރުންވަނީ ފާހަގަކޮށްފައެވެ. ނަމަވެސް ފާއިތުވި ފަސް ދުވަހުގެ ތެރޭގައި ކޯވިޑް-19 ޖެހިގެން ދުވާލަކު 1،000އަށްވުރެ ގިނަ މީހުން އެ ޤައުމުގައި ދަނީ މަރުވަމުންނެވެ.